Sakaria 13 - Wunta Mempori

Poropua lahumoa ka nabi nahi mentee 13:1-6

¹ ”I tempo atuu ta te'ungkahi asa mata uwoi tiano somborino i Daudi ka palilino Yerusale gagi powo'ohi hala ka mokoburua.

² I tempo atuu, kanandiomo pau-Do Ueno luwuakoano, Aku mokotampulao luwuno neeno lahumoa inso i wita andio, ranta nahi ira mempinau mbo'u. Luwuno mbo'u nabino ka luwuno tinoo mokoburu Aku mokotampulao inso i wita atuu.

³ Tewala asa mia da mentade gagi nabi, asalakono ama ka ineno anu me'anaakono, ira motae ndi onae, ’Nahi moiko ukongko tuwu, hangano pegaupi anu pinaumu a nee-Do i Ue!’ Ka i'amba ama ka ineno, anu me'anaakono, ira tumoboo tempono ipompau anu ta gagi.

⁴ I tempo atuu luwuno nabi andio singge mia ta mo'o'anu hangano pongkitano tempono ipompau anu ta gagi, ka nahina mbo'u inso i olodo anu mompokona lemba meloe mewulu ta megaupi;

⁵ sine singge mia ta motae: Ongkue andio komba asa nabi, tendeano asa mia puu mpo'angga wita, hangano wita kupe'ueo mompu'u da kukodei.

⁶ Ka tewala hinao mia mesikeno ndi onae: Lara hapake anu a ngkoroimu? Ka i'amba ta sumangki: Onaemo mobela anu hinaweku a rahado sambe-sambe'eku!”

Bawaa-Do i Ue pinokomempori 13:7-9

⁷ ”Hei ponai, pelelumo ewaio puu pompakambi-Ku, ewaio mia anu umpeda ndi Ongkue!”, kanandiomo pau-Do Ueno luwuakoano. ”Pepateomo puu mpopakambi, ka dontesiarawo asa bawaa bembe bimba! Aku woliteo kae-Ku maupo ndi ondae anu molema.

⁸ Ka a luwuno wita, kanandiomo pau-Do i Ue, orua ntia otolu inso i olono ta pinokotampula ka ropu, sine asa ntia otolu inso i olono ta kongko mo'ia i tu'ai.

⁹ Aku numaao anu asa ntia otolu atuu a laro api ka mokomempori ira kana mompokomempori salaka. Aku umara-arahako ira, kana mo'ara-arahako wulaa. Ira mpoboio nee-Ku, ka Aku sumangki ira. Aku mepau: Ondaemo bawaa-Ku, ka ira mesangki: Ondae i Ue Ondaemo Ue Alaku!”