Sakaria 12 - Wunta Mempori

Pompotolaa Yerusale 12:1-9

¹ Pau-Do i Ue mongkona Yerusale. Kanandiomo pau-Do i Ue anu wileo langi ka anu numaao empehino tolino ka anu weweuo penaa a laro ngkoroino mia,

² ”Menteeano, Aku weweuo Yerusale gagi sangkiri anu weweuo luwuno tongku petengi-tengino kobangku-bangku. Pongkadua Yerusale ta umaluo mbo'u Yehuda.

³ I tempo atuu Aku weweuo Yerusale gagi watu pompokomobea a luwuno tongku. Isemamo koa anu mokomobeaakono watu atuu koroino ta mobela langkai. Luwuno tongku i tolino ira mpepumpu me'ewaio.

⁴ I tempo atuu, kanandiomo pau-Do i Ue, Aku weweuo luwuno ngara mebulalingo ka anu mpesawikio mpekombe. A nsuku Yehuda, Aku wileo mata-Ku, sine ngarado luwuno tongku Aku mokomorawuo.

⁵ Umarino atuu luwuno petewawa suku Yehuda ira mpotae a laro aroado, ’Palilino Yerusale gagi rosoku hangano Ondae Ueno luwuakoano, Ue Alado.’

⁶ I tempo atuu Aku weweu ira luwuno petewawa suku Yehuda kana polu me'api i tonga-tongano howuno keu ka kana pansona me'api i tonga-tongano howuno tonggino gandu. Api ko'oruano ta kumaano luwuno tongku petengi-tengino, i koana ka i manggali. Sine Yerusale lembuino ta kongko mpiha a mpo'iangano, i Yerusale.

⁷ Ondae i Ue Ira moweeakono poponangia se'elu a luwuno kemado to Yehuda, kasi popelangkaino somborino i Daudi ka popelangkaido palilino Yerusale lumaloio Yehuda.

⁸ I tempo atuu Ondae i Ue Ira dumagaio palilino Yerusale. Mia anu molema telusa i olodo i tempo atuu ta gagi kana i Daudi, ka somborino i Daudi ira mpetewawa kana Ondae Ue Ala, kana Mala'eka-Do i Ue, i arodo.

⁹ I tempo atuu Aku mo'asao aroa-Ku rumopuo luwuno tongku anu sumapoio Yerusale.”

Ponsabangia ndi onae anu kona ntobo 12:10-14

¹⁰ ”Aku motiio penaa pompehohawa ka po'emano somborino i Daudi ka palilino Yerusale. Ira mengkita Aku anu tinobodo. Ira mensabangio kana mia monsabangi ana anu asa-asa, ka ira mpengeseio a laro masukarano tumuwu kana mia mompengesei ana aka.

¹¹ I tempo atuu ta hina ponsabangia langkai i Yerusale kana ponsabangia Hadadi-Rimoni i lembono Megido.

¹² Mia i wita atuu ira mponsabangi, singge mia a mpe'etuno onaeno: pe'etu inuleno i Daudi ka kombiado nte'o'asa mia; pe'etu inuleno i Natani ka kombiado nte'o'asa mia;

¹³ pe'etu inuleno i Lewi ka kombiado nte'o'asa mia; pe'etuno i Simei ka kombiado nte'o'asa mia;

¹⁴ luwuno mbo'u pe'etu anu tebinta, sompo pe'etu ka kombiado nte'o'asa mia.”