Sakaria 10 - Wunta Mempori

Butu Ondae i Ue anu mompowee usa 10:1-2

¹ Po'emamo usa ndi Ondae i Ue a mpokotampulaano pepo'euano tempo motu'i ka wula usa! Ondaemo i Ue anu weweuo seru mo'ito, ka usa marombo Ira mompotii ndi ondae ka luwuno pinopaho a tonga mpada a sompo mia.

² Hangano hapa anu pinauno terapimi onaemo mosa'o, ka anu kinitado mia anu nahi manasa ta gagi onaemo pegaupi, ka luwuno mo'ipi anu mempinaudo nahina pengkonaano; ondae mpontarero anu nahina tuduno. Onaemo pu'uno tongku atuu mpelakopi kana bawaano bimba ka pompemarasai hangano nahina puu mpompakambi.

To Isaraeli mempinotola inso a luwuno pabawa susua 10:3–11:3

³ ”A luwuno puu mpopakambi tekuda-Ku ta tensila ka a luwuno petewawado bawaano bembe Aku moweweu pombaloa, hangano Ueno luwuakoano merioo suku Yehuda, bawaano pinotuwu-Do, ka weweu ira kana ngara maramba-Do a laro mpeteaa.

⁴ Inso ndi ondae ta me'umbaako siuno watu, inso ndi ondae ta me'umbaako pandorano kema, inso ndi ondae ta me'umbaako pana mpetea, inso ndi ondae ta me'umbaako luwuno anu mempabawa mperonga-ronga.

⁵ Ondae ira kana puu mpetea anu mpololanda iwali a laro rege a mpeteaa. Ira mpetea, hangano Ondae i Ue kumongkomi ira ka dompokoko'ii ira sorodadu mpengara.

⁶ Aku mokomorosoo suku Yehuda, ka Aku kumaduduio inuleno i Yusupu. Aku mokomoikoo tuwudo, hangano Kupehohawa ira. Ondae ira megagi kana nahi Kuhori tumempu ira, hangano Ongkuemo Ue, Ue Alado, ka Aku sumangki ira.

⁷ I Eparai ta gagi kana asa mia puu mpe'iwali, aroado ta mawongko kana molanguako anggoro. Luwuno anado ira mengkitao, ka do'amba memawongko ka aroado mpeboo-booli hangano Ondae i Ue.

⁸ Aku momansu moboi ira ka Aku pumpu ira, hangano Kupotola iramo, ka ira megagi hadio kana i ndi'ipua.

⁹ Maupo Kusiarawo iramo i olodo luwuno tongku, sine a luwuno po'ianga anu olai ira merambe Aku. Ondae ira mentuwu mperonga-ronga saru luwuno anado ka ira mpekule.

¹⁰ Aku wawa ira mpekule inso i wita Masiri, ka inso i Asuri Aku pumpu ira. Aku wawa ira i wita Gileadi ka i Libano, ranta nahina mbo'u po'iangado.

¹¹ Tahi molue masusaa ta sinaki, bombano tahi ta winombaki, ka luwuno ondaloano a ngkoro Nili gagi motu'i. Anu pino'undeakodo to Asuri ta dinontai ka tuko poparentaano Masiri ta tampula.

¹² Aku mokomoroso ira ndi Ondae i Ue, ka ira mentuwu a laro nee-Do,” kanandiomo pau-Do i Ue.