Ruti 4 - Wunta Mempori

I Ruti gagi kombiano i Boasi

¹ Lumakoomo i Boasi ia mpewowa inia ka ipentoro i ra'ai. Telaloomo pontolosi anu nineeno i Boasi atuu. Mepauomo i Boasi, ”Pepaekompoku aiwa ari ramai, pentoro i ndi'ai.” Merangkuhakoomo ka ipentoro.

² Ibiniki iramo hopulu ira mia mota'u anu i kota atuu, ka ipotae, ”Impentoromo i ndi'ai.” Ka mpentoro iramo.

³ Motaeomo a pontolosi atuu, ”Wita tiano pepaekompoto i Elimele ta umasao i Naomi, nde mekuleomo inso i wita Moabi.

⁴ Gaagi kupewowoloo: Moiko kupauakomiu, kanandio: I'oliomo wita atuu i arodo mia anu mpentoro i ndi'ai ka i arodo mia memota'u ia tongkuto. Tewala inehemiu tumolosio, itolosiomo. Sine ba nahi behe tumolosio, ipauakune, ka kuto'oriokoa, nde nahina mia anu mokontolosio, sangkadio omiu, ka umarino omiu, ongkue.” Ka ipotae, ”Aku koa tumolosio.”

⁵ Sine ipotae i Boasi, ”I tempono i olio wita atuu inso ndi Naomi, sarukoa mbo'u i Ruti beine to Moabi anu mateomo tamano, anu ta wanguo neeno mia atuu anu lano tia pusakano.”

⁶ Ka ipotae pontolosi atuu, ”Tewala kanandio, nahi aku mokontolosio, nde aku sumosa'orio anu lano tia pusakaku. Pomperorohiku, omue anu tumolosio, hapa anu lano aku tumolosio, nde lano nahi kupokontolosio.”

⁷ Kanandio anu lano gaudo nse'elu i Isaraeli, ia gau montolosi ka montobosi. I tempodo mia ira mpopokomoroso kara-kara, asalakono asa mia iluarakono sapatuno asambali ka ipeweengakono a mia anu susua. Kanandiomo gaudo mia mompokomoroso kara-kara i Isaraeli.

⁸ Ka mpontolosi atuu motae ndi Boasi, ”Omuemo anu umolio.” Ka ilohuomo sapatuno.

⁹ Motaeomo i Boasi, ia mia memota'u, ka luwuno mia anu i tu'ai, ”Omiumo oleo andio gagi sakosii, motae luwuakoano anuno i Elimele, ka luwuno anuno i Kilioni ka i Mahaloni ku'olio te'inso a ngkaeno i Naomi.

¹⁰ Ka i Ruti, beine to Moabi atuu, kombiano i Mahaloni gagi beineku, ta gagi powanguno neeno mia anu mate atuu gagi tia pusakano. Kanandiomo needo nahi ta tetadi inso ia olono pepaekompodo ka inso i olodo palili i kota. Omiumo oleo andio gagi sakosii.”

¹¹ Ka luwudo mia anu mehawe ia mpewowa inia atuu, ka mia memota'u mpotae ira, ”Omamimo gagi sakosii. Ondae i Ue Ira weweuo beine anu ta mewinso i rahamu atuu, kana i Raheli ka i Lea, anu wanguo tongku Isaraeli. Po'ineomo ka ugagi manangai i Eparata, po'ineomo neemu telele i Beteleme,

¹² po'ineeomo inulemu gagi kana inuleno i Peresi anu pine'anaakono i Tamari tiano i Yehuda nde hangano inule anu Ira weeko i Ue inso ia ana beine andio!”

¹³ I'alaomo i Boasi i Ruti, ka beine atuu gagi kombiano, ka ipewowaliakono. Gagi hangano pokongkomi-Do i Ue beine atuu mentia, ka ipe'anaako asa ana ntama.

¹⁴ Onaemo luwuno beine mpotae ira ndi Naomi, ”Po'unde-unde ndi Ondae i Ue, anu tumulungiko ia oleo andio Doweeko aasa pontolosi. Ka itelelemo neeno nana'ote atuu i Isaraeli.

¹⁵ Ka onaemo anu mokomawongkoo laromu ta mekariako i tempono wuumu moputeomo. Nde ponimu anu kumekewoiko, anu me'anaakono, beine atuu tedoa langkai i aromu sekono opitu ana ntama.”

¹⁶ I Naomi umalao nana'ote atuu ka i'awio ka onaemo anu mekakaakono.

¹⁷ Ka mia isinggerahano numeeakono nana'ote atuu, dompotae, ”Ndi Naomi pine'anaakomo asa ana ntama.” Domeneeakono i Obe. Onaemo amano i Isai, ka i Isai amano i Daudi.

Potudano anu me'anaakono i Daudi

¹⁸ Ndiomo inuleno i Peresi. I Peresi hinao anano neeno i Heseroni,

¹⁹ I Heseroni hinao anano neeno i Rami, i Rami hinao anano neeno i Aminada,

²⁰ i Aminada hinao anano neeno i Nahaso, i Nahaso hinao anano neeno i Salomo,

²¹ I Salomo hinao anano neeno i Boasi, i Boasi hinao anano neeno i Obe,

²² i Obe hinao anano neeno i Isai, ka i Isai hinao anano neeno i Daudi.