Ruti 2 - Wunta Mempori

I Ruti tepohaweakono i Boasi

¹ Hinao pe'etuno i Naomi te'inso ia ntamano, asa mia anu tedoa mompoli, inso pe'etuno Elimele, neeno i Boasi.

² Motaeomo i Ruti, beine to Moabi ndi Naomi, ”Po'ineeomo ka kulako ia lere, mobini jelai anu tebibinta i bungkudo mia mensowi anu mehohawa aku.” Sumangki i Naomi, ”Lakomo anaku.”

³ Lumakoomo, hawe ia lere ka ipobini jelai anu tebibinta i bungkudo mia mensowi, ka ikonaio witano i Boasi, inso ia pe'etuno i Elimele.

⁴ Haweomo i Boasi inso i Beteleme. Mepauomo ia mia mensowi, ”Ondae i Ue kumongkomi komiu.” Domesangkio, ”Ondae i Ue kumongkomi komiu.”

⁵ Motaeomo i Boasi ia mia anu modagai mia mensowi, ”Inso isuake beine andio?”

⁶ Mia anu modagai mia mensowi atuu sumangki, ”Beine rau to Moabi perongano i Naomi mekule inso i wita Moabi.

⁷ Hieno ipotae: Ba imebeheakune aku mobini ka mopumpu jelai ibungkudo mia mensowi. Kanatuumo kohaweno kongkono mo'angga inso mo'oru ranta kanandio nahi hori menaa-naa.”

⁸ Umari atuu motaeomo i Boasi ndi Ruti, ”Rongeo ari anaku! Siimo lako pobini jelai ia lere susuaano, ka siimo ulako te'inso i ndi'ai, sine kongkomo umpedaako ira beine anu mpo'angga.

⁹ Kitaomo koa lere anu tekonai sinowido. Tonda bungku ira beine tuudo. Nde ku'oliwi iramo tama anu mpo'angga kasi domensosanggeloko. Ba mokorangako lakomo po'inu uwoi anu inso ia kusi ka dompotambuakomu mia mpo'angga raudo.”

¹⁰ Menggolontuomo i Ruti, ra'ino tii a wita ka ipotae, ”Tembio ka kupohawe pompehohawa kanandio inso ndi omiu, ka iperio aku, hinaano ongkue andio mia anu hawe?”

¹¹ Sumangki i Boasi, ”Domempauakunemo mia motae luwuakoano anu wineweumu ia mponimu, umarino mate tamamu, ka kana'umpe ubinta ira ama ka inemu, ka wita hinaamu ka ulako ia tongku, anu se'e-se'eluno nahi uto'orio.

¹² Ondae i Ue anu sumuloo wineweumu atuu, ka Dopoweeakomu tambo te'inso ndi Ondae i Ue, Ue Alado to Isaraeli, anu i totono pani-Do haweko mepetulungi.”

¹³ Onaemo ka ipotae i Ruti, ”Lano aku mohawe pompehohawa te'inso ndi omiu, o ueku, nde omiu tumarero aku, ka ipokorodoo aroaku, maupo nahi kupengkenaako ira beine tetenaamiu.”

¹⁴ Itempono iramo mpongkaa, ipotaeakono i Boasi, ”Aiwamo ramai, kaano roti andio, emoo ia olo.” Mentoroomo i horido anu mensowi atuu, ka i Boasi tumasiakono gandu anu hinole; mongkaaomo i Ruti ranta ka imowohi, ka dahinao toreano.

¹⁵ Mansano mentade ta lumako mobini gandu, metenaomo i Boasi a miano anu mpo'angga, ”Te'inso ia gandu anu inalado moiko koa ipo'ala kasi sinosanggelo,

¹⁶ tendeano ka impe'inungako mpompadii ntededei inso ia wutuno gandu atuu gagi tiano ka domebintao, ka ibinio. Kasi domentekudaakono.”

¹⁷ Mobiniomo ia lere atuu hawe ngkiniwia, ka isesao anu bininino, bara'ura asa efa jelai hadiono.

¹⁸ Iwawaomo gandu atuu lumako i kota. Mansano ponino kumitao anu bininino atuu, iluarakono ka iweeako ira ponino saru toreano anu kinaano.

¹⁹ Ipotaeakono ponino, ”Isua upobini ka upo'angga oleo andio? Doronsoomo i Ue mia anu mepepenteeko atuu.” Itutuluakonomo ponino ndi sema ipo'angga, ipotae, ”Neeno mia po'anggaaku i'oleo andio onaemo i Boasi.”

²⁰ Umari atuu motaeomo i Naomi ia ponino, ”Doronsoomo i Ue mia atuu, Ondae i Ue anu mompowee pompehohawa-Do ia mia anu tuwu ka anu mate.” Motae mbo'u i Naomi ndi onae, ”Mia atuu pe'etuto, onaemo mia anu tumolosi kita.”

²¹ Motaeomo i Ruti to Moabi atuu, ”Ipotaeakune mbo'u: Kongkomo rumangkuhi ira mia anu mpo'anggaakune, ranta ka i umari konsowia ia lereku.”

²² Motaeomo i Naomi ndi Ruti ponino atuu, ”O, anaku, laluopo perongaako ira beine anu mpo'angga ndi onae, kasi dompokosusako mia anu ia lere susuaano.”

²³ Kanandiomo i Ruti kongkono umpedaako ira beine anu mpo'angga ndi Boasi mobini ranta ka i umari konsowia jelai ka gandu. Ka itempono atuu kongkono mo'ia a mponino.