ROMA 9 - Wunta Mempori

Tebinikido to Isaraeli 9:1-29

¹ Ongkue mompau menteea hangano Ondae i Kerisituu, nahi kupegaupi. Pompauno aroaku mesakosii mbo'u hangano Penaa Mempori,

² nine tedoa aku mompemasusa ka wela masusa aroa.

³ Tendeano, ineheku tetotonaa ka teponsia inso ndi Ondae i Kerisituu hangano luwuno pepaekompoku, pe'asa tongkuku montonda tuwu ntolino.

⁴ Hangano ondae to Isaraeli, nahi domempinotoro gagi ana, ka mpontarima iramo marambaa, ka luwuno pedandia, ka songka Taura, ka mpesomba, ka luwuno dandi.

⁵ Ondae inuledo luwuno uempu'u, anu umule Ira i Mesia a nteweweu-Do kana mia, anu i wawono luwuakoano. Ondaemo Ue Ala anu asalakono inunde-unde ranta nahina tampulaano. Ami!

⁶ Sine pau-Do Ue Ala komba nahi ta gagi. Hangano komba luwuno mia anu nte'inso i Isaraeli ondae to Isaraeli,

⁷ ka komba mbo'u luwuno anu tewinso a inuleno i Burahima ondae anano i Burahima, sine, ”Anu nte'inso ndi Saki anu ta nineeako inulemu.”

⁸ Pengkonaano: komba ana montonda koroi ntolino onaemo ana-Do Ue Ala, sine ana pedandia anu nineeako inule anu mentee.

⁹ Hangano pau-Do Ue Ala andio hinao dandi, ”A tempomo kanandio Aku hawe ka i Sara ta hinao aasa anano tama.”

¹⁰ Sine komba butu onaemo koa. Lalu mengkaa mbo'u onaemo i Ribeka anu mentia inso a asa mia, onaemo inso ndi Saki, uempu'uto.

¹¹ Hangano tempono napi dopine'anaako nana'ote atuudo ka napi dopoweweu anu moiko ke anu mosa'o, – ka ipinokoroso tinoo-Do Ue Ala mongkona pobiniki-Do, komba me'empehiako wineweu, sine me'empehiako pepoboi-Do –

¹² pinauako i Ribeka, ”Ana anu aka gagi atano ana anu uai,”

¹³ kana hinao teburi, ”Kupehohawao i Yako, sine Ku'o'aliaakono i Esau.”

¹⁴ Tewala kanandio, hapake anu kita mempauo? Nde nahi Domoleoke Ondae Ue Ala? Komba mentee!

¹⁵ Hangano mepau Ira ndi Musa, ”Aku mehohawao ndi isema anu inehe-Ku mehohawao ka Aku me'aroa ndi isema anu inehe-Ku me'aroaakono.”

¹⁶ Gagi mongkona atuu komba montonda po'eheno mia, sine a pompehohawa-Do Ue Ala.

¹⁷ Hangano Wunta Mempori mepau ndi Pirao, ”Onaemo pu'uno ka Kupontadeko, onaemo ka Kupopokitao pabawa-Ku ndi omue, ka ipinalele nee-Ku i asa wawontolino.”

¹⁸ Gagi Dopehohawao ndi sema anu inehe-Do ka Dopokomoteao aroano isema anu inehe-Do.

¹⁹ Kanandio-andio komiu mpotae ndi ongkue, ”Tewala kanandio, hapapo mbo'u anu da Dopokonsalao? Hangano isema anu umewaio po'ehe-Do?”

²⁰ Isemake omiu, hei mia, ka ime'ewai Ira Ue Ala? Polioke anu pinokogagi motaeakono anu mokogagio, ”Tembioke ka upokogagi aku kanandio?”

²¹ Nde nahina pabawanoke puu mponsuu kuro a wita puluno, ka iweweuo inso a aasa boto anu mengkena aasa parewa ka ipinake a ntinoo anu maramba ka aasa parewa susua anu pinake a ntinoo anu biasa?

²² Gaagi, tewala Ira mopokitao tekuda-Do ka mokomengkaao pabawa-Do, Ondae Ue Ala monaa sabara-Do anu langkai a luwuno parewa tekudaa-Do, anu pinatindaomo tiano matea –

²³ tendeano ka ipinokomengkaa kaeano maramba-Do a luwuno parewa pompehohawa-Do anu Dopatindaomo tiano marambaa,

²⁴ onaemo ontae, anu Dopoboi kitamo komba butu inso i olodo to Yahudi, sine inso mbo'u a luwuno tongku susua,

²⁵ kana anu Dopauo koa mbo'u a wuntano Nabi Hosea, ”Anu komba bawaa-Ku Aku numeeakono: bawaa-Ku ka anu komba kinekewoi: Aku numeeakono kinekewoi.”

²⁶ Ka a mpo'ianga, ba isua ira mempinauako, ”Omiu andio komba bawaa-Ku,” i ra'ai ira mempinauako, ”Ana-Do Ue Ala anu tuwu.”

²⁷ Ka i Yesaya mebooli mongkona Isaraeli, ”Maupo porokono anano i Isaraeli kana one a ntahi, sine butu toreano ta kinadudui.

²⁸ Hangano hapa anu Dopauomo, Ira ronga weweuo i Ue i wawontolino soompo ntu'u.”

²⁹ Ka kana anu pinauno i Yesaya se'eluno, ”Bakanaano Ondae Ueno luwuakoano nahi Dopobintaakita inule, megagi kitamo kana Sodomo ka mengkena kana Gumora.”

Tekaduduido tongku susua ka tesosaelodo to Isaraeli 9:30–10:3

³⁰ Tewala kanandio, hapake anu kita mpompau? Ndio: nine luwuno tongku susua anu nahi dompo'ungke menteea, mpohawe iramo menteea, onaemo menteea hangano pompe'ala-ala.

³¹ Sine: nine to Isaraeli, maupo dome'ungkeo songka anu ta mowawa menteea, nahi domehaweako a songka atuu.

³² Hapa pu'uno? Hangano to Isaraeli me'ungkeo komba hangano pompe'ala-ala, sine hangano wineweu. Mentetidu ira a watu tetidua,

³³ kana hinao teburi, ”Menteeano, Aku numaao i Sioni aasa watu tetengkua ka aasa watu tetidua, ka ba isema anu me'ala-ala Ira, nahi ta pinokoko'ii.”