ROMA 7 - Wunta Mempori

Pengkonaano songka Taura 7:1-12

¹ Nde nahi imento'orioke, pepaekompo – hangano kupepau ndi ondae anu mponto'ori songka – nine asa mia ipabawaio songka tempono mia atuu tuwu?

² Hangano aasa beine anu mekombiaomo te'onggoako songka a ntamano tempono ituwu tamano atuu. Sine tewala tamano atuu mate, tolaomo inso a songka anu umonggoo a ntamano atuu.

³ Gaagi tempono tuwu tamano onae pinotaeako monsosabo, tewala onae gagi beineno tama susua; sine tewala mateomo tamano, onae tolaomo inso a songka, ranta onae komba monsosabo, tewala onae gagi beineno tama susua.

⁴ Onaemo pu'uno, pepaekompoku, omiu mbo'u memateakonomo songka Taura hangano koroi-Do i Kerisituu, ka imegagi miado mia susua, onaemo mia-Do anu winangu Iramo inso i olodo mia mate, ka tompewua tia-Do Ue Ala.

⁵ Hangano tempono da tomentuwu a laro tuwu ntolino, po'eheno koroi tehala, mo'angga a luwuno parewa ngkoroito anu pinotuwuno songka Taura, ka tompewua tiano matea.

⁶ Sine kanandio-andio mempinotola kitamo inso a songka Taura, hangano tomemateakonomo, anu umuko kita, onaemo ontae kanandio-andio mpopekakaako a nteweweu wo'ohu montonda Penaa ka komba a nteweweu tehineomo montonda burino songka Taura.

⁷ Tewala kanandio, hapake kita mpotae? Nde halake songka Taura atuu? Mentee ntu'u naahi! Sine, tendeano hangano songka Taura ka kuto'oriomo hala. Hangano nahi kuto'orio koa mbo'u hapa atuu mosisiri, ba nahi pauo songka Taura, ”Si mosisiri!”

⁸ Sine a laro parenta atuu hala mohawe tempo mokotesingkao i laroku mperupa-rupa mosisiri; hangano ba nahina songka Taura, hala mate.

⁹ I ndi'upua kutuwu nahina songka Taura. Sine mansano hawe parenta atuu, hala mompu'u tuwu,

¹⁰ sine ongkue mate. Ka parenta anu bakanaano mowawa tuwua, tendeano mengkaa ndi ongkue mowawa matea.

¹¹ Hangano i larono parenta atuu, hala mohawe tempo mopo'oo aku ka hangano parenta atuu ipepate aku.

¹² Gaagi songka Taura lano mempori, ka parenta mbo'u atuu mempori, mentee ka moiko.

Peteano songka Taura ka hala 7:13-26

¹³ Tewala kanandio, nde anu moiko atuu gagi matea ndi ongkue? Mentee ntu'u naahi! Sine ka imengkaa, nine onaemo hala, onaemo ka ipakeo hala anu moiko mowawaakune matea, ka ilalu mengkaa mbo'u teweweuno hala hangano parenta atuu.

¹⁴ Hangano tomento'orio, nine songka Taura onaemo tuwu nsuruga, sine ongkue tuwu tolino, inasa a mpabawano hala.

¹⁵ Hangano hapa anu wineweuku, nahi kuto'orio. Hangano komba hapa anu ineheku anu wineweuku, sine hapa anu ku'o'aliaakono, onaemo anu wineweuku.

¹⁶ Gagi tewala kuweweuo hapa anu nahi ineheku, kupementeeo, nine songka Taura atuu moiko.

¹⁷ Tewala kanandio komba ongkue mbo'u anu weweuo, sine hala anu kongko i laroku.

¹⁸ Hangano kuto'orio, nine i laroku, onaemo i laroku kana mia, nahina maupo hapa anu moiko. Hangano po'eheno aroa lano hinao i laroku, sine komba mongkona moweweu hapa anu moiko.

¹⁹ Hangano komba hapa anu ineheku, onaemo anu moiko, anu wineweuku, tendeano hapa anu nahi kupe'eheo, onaemo anu mosa'o, anu wineweuku.

²⁰ Gagi tewala kuweweuo hapa anu nahi kupe'eheo, ka komba ongkue mbo'u anu weweuo, sine hala anu mo'ia i laroku.

²¹ Kanandiomo kuhaweo songka andio: tewala ineheku moweweu hapa anu moiko, anu mosa'o atuu kongko ndi ongkue.

²² Hangano i laro aroaku ineheku songka-Do Ue Ala,

²³ sine a luwuno parewa koroiku mongkita aku songka susua anu metea umewaio songka pinewowolo molinoku ka weweu aku gagi tinawano songka hala anu kongko a laro luwuno parewa ngkoroiku.

²⁴ Ongkue, mia masola! Isemake anu ta motola aku inso a ngkoroi matea andio?

²⁵ Pontarimakasi ndi Ondae Ue Ala! hangano Ondae i Yesu Kerisituu, Ueto.

²⁶ Gaagi a mpinewowolo molinoku kupekakaakono songka-Do Ue Ala, sine a ngkoroi ntolinoku kupekakaakono songkano hala.