ROMA 6 - Wunta Mempori

Mate ka mewangu saru Ondae i Kerisituu 6:1-14

¹ Tewala kanandio, hapake kita mpopau? Moiko koake tompo'iamo koa a laro hala, ka ikoteti-tetiangino pompehohawa atuu?

² Naahi ntu'u! Kombake memate kitamo a hala, kana'umpeke ka da kita mpokotuwu i larono?

³ Ke nahi imento'orioke, nine luwuto anu mebinaho kitamo ndi Ondae i Kerisituu, mebinaho kitamo a mate-Do?

⁴ Hangano kanandio mengkinaburu kitamo meronga saru Ondae hangano pebahoa a matea, ka ipengkena kana Dowinangu i Kerisituu inso i olodo mia mate hangano maramba-Do i Ama, kanandio koa mbo'u ontae kita mentuwu a laro ntuwua anu wo'ohu.

⁵ Hangano tewala ntepe'asa kitamo saru hapa anu mengkena saru mate-Do, kita koa mbo'u ntepe'asa saru hapa anu mengkena saru pewangu-Do.

⁶ Hangano tomento'orio, nine mia laanoto pinasoomo a ngkeu pinotamba, ka itetadi pabawano koroi ntehalato, ka si tontepe'ata mbo'u a hala.

⁷ Hangano isema anu mateomo, tolaomo inso a hala.

⁸ Gagi tewala memate kitamo saru Ondae i Kerisituu, tompe'ala-alao, nine kita koa mentuwu mbo'u saru Ondae.

⁹ Hangano tomento'orio, nine Ondae i Kerisituu, umari-Do mewangu inso i olodo mia mate, nami Domate mbo'u: matea nami pabawai Ira mbo'u.

¹⁰ Hangano mate-Do onaemo matea a hala, pohona ka ranta nahina tampulaano, ka tuwu-Do onaemo tuwua ndi Ondae Ue Ala.

¹¹ Kanandiomo ba imengkitao: nine imemateakonomo hala, sine mentuwu komiu tia-Do Ue Ala ndi Ondae i Kerisituu Yesu.

¹² Onaemo pu'uno siimo ipabawa mbo'u hala a ngkoroimiu anu ta mate, ka si mentondao mbo'u po'eheno.

¹³ Ka si mpeweengakono luwuno parewa ngkoroimiu a hala ka ipinake gagi parewa poweweu mosa'oa, sine impeweengakonomo koroimiu ndi Ondae Ue Ala kana mia anu i ndi'upua mate, sine anu kanandio-andio tuwu. Ka ipeweengakonomo luwuno parewa ngkoroimiu ndi Ondae Ue Ala ka igagi parewa menteea.

¹⁴ Nde nami ta pabawai komiu mbo'u hala, hangano omiu komba mpo'ia i totono songka Taura, sine i totono pompohohawa.

Orua rupa te'ataa 6:15-23

¹⁵ Gaagi kana'umpe? Nde kita mpoweweu halake, hangano nahi tompo'ia i totono songka Taura, sine i totono pompehohawa? Naahi ntu'u!

¹⁶ Nde nahi imento'orioke, nine tewala impeweengakono koroimiu a asa mia gagi ata ka impetenunuio, omiumo atano mia atuu, anu asalakono impetenunuio, moiko a hala anu wawa komiu a matea, maupo a mpetenunu anu wawa komiu a menteea?

¹⁷ Sine pontarimakasimo ndi Ondae Ue Ala! I ndi'upua omiu lano atano hala, sine kanandio-andio mpetenunu komiumo tompaano aroamiu a pompaguru anu pinotilaloakoomo ndi omiu.

¹⁸ Mempinokomaradeka komiumo inso a hala ka imegagi atano menteea.

¹⁹ Kupauo mongkona andio a mpinewowolono mia hangano molemamiu. Hangano mengkena kana omiu impeweengakonomo luwuno parewa ngkoroimiu gagi atano mokoburua ka buuntoa anu wawa komiu a buuntoa, kanandiomo teweweumiu kanandio-andio asalakono impeweengakono parewano koroimiu gagi atano menteea anu wawa komiu a pompokomemporia.

²⁰ Hangano tempono inte'ata a hala, mentola komiu inso a menteea.

²¹ Ka wua hapake anu inopumiu inso ndi onae? Luwuno atuu weweu komiu memokoko'ii kanandio-andio, hangano poko'ariano luwuno atuu onaemo matea.

²² Sine kanandio-andio, umarimiu mempinokomaradeka inso a hala ka mansamiu megagi tetenaa-Do Ue Ala, mpohawe komiu wua anu wawa komiu a pompokomemporia ka gagi poko'ariano onaemo tuwua anu nahina tampulaano.

²³ Hangano tambono hala onaemo matea; sine pompehohawa-Do Ue Ala onaemo tuwua anu nahina tampulaano ndi Ondae i Kerisituu Yesu, Ueto.