ROMA 5 - Wunta Mempori

Wuano pompokomenteea 5:1-11

¹ Onaemo pu'uno, ontae anu mempinokomentee hangano pompe'ala-ala, mentuwu kita a laro rodoa saru Ondae Ue Ala hangano Ondae Ueto, i Yesu Kerisituu.

² Hangano Ondae ontae mbo'u mpohawe sala mpewinso hangano pompe'ala-ala a pompehohawa andio. I larono pompehohawa andio ontae mpentade ka tompo'unde a laro pomperorohia kita mpontarima maramba-Do Ue Ala.

³ Ka komba butu onae atuu. Tendeano kita koa mpo'unde mbo'u a laro marasaiato, hangano tomento'orio, nine marasaia atuu mompokohina pompedato,

⁴ ka morosono aroa mompokohina mentiino pinewowolo ka mentiino pinewowolo mompokohina pomperorohi.

⁵ Ka Pomperorohi komba mompokomasusa, nde pompehohawa-Do Ue Ala mewinsoomo i laro aroato hangano Penaa Mempori anu mewineeako kitamo.

⁶ Hangano tempono da memolema kita, mate Iramo i Kerisituu tiato mia anu buunto a tempo anu Dopakosiomo Ue Ala.

⁷ Hangano komba moruana asa mia behe mate tiano mia anu mentee – sine bara'ura ba mia anu me'aroa hinao anu mosia mate –.

⁸ Sine Ondae Ue Ala mopokitao pompehohawa-Do ndi ontae, hangano Ondae i Kerisituu mate Iramo tiato, tempono da mentehala kita.

⁹ Tamoako, hangano ontae kanandio-andio mempinokomentee kitamo hangano rea-Do, manasa kita mengkinadudui inso a ntekuda-Do Ue Ala.

¹⁰ Hangano tewala ontae, tempono da me'ewa, mepinokosintuwu saru Ondae Ue Ala hangano mate-Do ana-Do, tamoako ontae, anu kanandio-andio mempinokosintuwu kitamo, manasa kita mengkinadudui hangano tuwu-Do!

¹¹ Ka komba butu onae! Tendeano kita memawongko ndi Ondae Ue Ala hangano Ondae i Yesu Kerisituu, Ueto, hangano Ondae ka tompotarimamo pesintuwua atuu.

I Adama ka i Kerisituu 5:12-21

¹² Onaemo pu'uno, mengkena kana hala mewinsoomo i wawontolino hangano asa mia ka hangano hala mbo'u atuu ka ihina matea, kanandiomo matea atuu hawe a luwuno mia, hangano luwuno mia mpoweweu iramo hala.

¹³ Hangano napi hina songka Taura, hinaomo hala i wawontolino. Sine hala atuu nahi dinoa ba nahina songka Taura.

¹⁴ Maupo kanatuu pabawaomo matea inso a tempono i Adama hawe a tempono i Musa saru mbo'u ndi ondae, anu nahi dompoweweu hala mengkena kana anu iweweuomo i Adama, anu onaemo gambara-Do anu Ira hawe.

¹⁵ Sine pompowee-Do Ue Ala nahi pengkena saru tehalano i Adama. Nde tewala hangano tehalano asa mia tedontaomo luwuno mia a laro mpabawano matea, tedoaopo lalu langkai mbo'u pompehohawa ka pompehohawa-Do Ue Ala ka pe'aroa-Do, anu Doweeako ira luwuno mia hangano asa mia, onaemo Ondae i Yesu Kerisituu.

¹⁶ Ka pompehohawa nahi petoto saru halano asa mia. Hangano bitaraano aasa hala atuu mompokohinaomo pohukua, sine pompoweea pe'aroa a hala hadio atuu mompokohina pompokomentee.

¹⁷ Nde, tewala hangano halano asa mia, pabawaomo matea hangano asa mia atuu, ka lalua irapo mbo'u mementee, anu mpontarima iramo hadio ntu'u pe'aroa ka pompehohawa menteea, ira mentuwu ka mempabawa hangano asa mia atuu, onaemo Ondae i Yesu Kerisituu.

¹⁸ Onaemo pu'uno, mengkena kana aasa hala luwuno mia mpohawe pohukua, kanandio koa mbo'u hangano aasa wineweu mentee luwuno mia mpohawe pompokomentee ka domentuwu.

¹⁹ Gaagi mengkena kana hangano asa mia nahi petenunu luwuno mia megagi iramo mia ntehala, kanandio koa mbo'u hangano petenununo asa mia luwuno mia gagi mia mentee.

²⁰ Sine songka Taura tiniangi, ka igagi kohadi-hadiono hala; ka ba isua itetiangi hadio hala, i ra'ai pompehohawa gagi hadio ntu'u,

²¹ ka ipengkena kana pabawano hala a laro matea, kanatuu pompehohawa ta pabawa hangano menteea a ntuwua anu nahina tampulaano, hangano Ondae i Yesu Kerisituu, Ueto.