ROMA 4 - Wunta Mempori

I Burahima pinokomentee hangano pompe'ala-ala 4:1-25

¹ Gaagi hapake kita mpotae mongkona i Burahima, uempu'uto montonda tuwu ngkoroi?

² Hangano tewala i Burahima pinokomentee hangano wineweuno, onae hinao pu'uno ka imawongko, sine komba i aro-Do Ue Ala.

³ Hangano hapake pinauno Wunta Mempori? ”Ka i'amba mompe'ala-alaomo i Burahima ndi Ondae i Ue, ka onaemo Dopementeeakono i Ue hangano pompe'ala-alano atuu.”

⁴ Tewala hinao mia anu mo'angga, tambono komba wineeako gagi pompowee, sine gagi tiano.

⁵ Sine tewala hinao mia anu nahi po'angga, sine ipe'ala-ala Ira anu mompokomentee mia buunto, pompe'ala-alano kinitaako gagi menteea.

⁶ Kana koa mbo'u i Daudi pauo me'ura mia anu Dopementeeo Ue Ala komba me'empehiako wineweuno,

⁷ ”Me'uraomo mia anu inampuniako luwuno halano, ka anu tinutuwi luwuno halano;

⁸ me'uraomo mia anu nahi Dopototoiakono i Ue salano.”

⁹ Nde butu koa a mia mpetindike konaano pau me'ura andio ke saru mbo'u a mia nahi dompetindi? Hangano kimempauomo, nine ndi Burahima pompe'ala-ala kinitaako gagi menteea.

¹⁰ A nteweweu kana'umpeke mongkona atuu ipinototoiako? Naapo ke umarino tinindi? Komba umarino tinindi, sine tempono napi tinindi.

¹¹ Ka tondonino petindi atuu itarimao gagi petondoni menteea me'empehiako pompe'ala-ala anu pinopokitano se'eluno napi petindi. Kanandiomo ka ipokogagi amado luwuno mia mpompe'ala-ala anu nahi dompetindi, ka menteea pinototoi ndi ondae,

¹² ka gagi mbo'u amado mia mpetindi, onaemo ondae anu komba butu mpetindi, sine mentondao mbo'u pelempano pompe'ala-alano i Burahima, uempu'uto, i tempono napi tinindi.

¹³ Nde komba hangano songka Taura ka idinandiako i Burahima ka inuleno, nine onae ta me'umbuo wawontolino, sine hangano menteea, me'empehiako pompe'ala-ala.

¹⁴ Nde tewala ondae anu mpomperorohi inso a songka Taura, mpontarima tia anu dinandi-Do Ue Ala, ka nami hina tuduno pompe'ala-ala ka nami gagi dandi atuu.

¹⁵ Hangano songka Taura mompokohina tekuda, sine isua nahina songka Taura, i tu'ai nahina koa mbo'u polaloa songka.

¹⁶ Onaemo pu'uno menteea me'empehiako pompe'ala-ala ka ikana pompehohawa, ranta ka ipo'ia dandi atuu hawe a luwu inuleno i Burahima, komba butu ndi ondae anu mentuwu inso a songka Taura, sine ndi ondae mbo'u anu mentuwu inso a pompe'ala-alano i Burahima. Hangano i Burahima onaemo amato luwu, –

¹⁷ kana hinao teburi, ”Omue Kupakosikomo gagi amado hadio tongku” – i aro-Do Ue Ala anu pine'ala-alano onaemo Ondae Ue Ala anu mompotuwu mia mate ka anu mokogagiakono pau-Do hapa anu nahina gagi hinao.

¹⁸ Hangano maupo nahina pepu'uano ka ipomperorohi, sine i Burahima momperorohi koa mbo'u ka ipe'ala-alao, nine onae ta gagi amado hadio tongku, montonda anu pinauomo, ”Kanandiomo te'ipua hadiono inulemu.”

¹⁹ Pompe'ala-alano komba gagi molema, maupo ito'orio, nine koroino tedoaomo molema, hangano tinuwuno bara'ura asa etu nta'umo, ka nine i Sara nami ta me'ana.

²⁰ Sine mongkona dandi-Do Ue Ala nahi porerengkoo hangano nahi pompe'ala-ala, tendeano onae pinokoroso a laro pompe'ala-alano ka i'unde-unde Ira Ue Ala,

²¹ ka ipe'ala-alao ntu'u, nine Ondae Ue Ala pabawa mokogagio hapa anu Dodandiomo.

²² Onaemo pu'uno mongkona andio dinoaako ndi onae gagi menteea.

²³ Luwuno pau andio, onaemo ”mongkona andio pinototoiako ndi onae,” komba binuri butu tiano i Burahima,

²⁴ sine binuri saru koa mbo'u tiato; hangano ndi ontae mbo'u Dopototoio Ue Ala, hangano tompe'ala-ala Ira, anu wangu Iramo i Yesu, Ueto, inso i olodo mia mate,

²⁵ onaemo Ondae i Yesu, anu pineweengako Iramo hangano halato ka winangu Ira hangano pokomenteeto.