ROMA 3 - Wunta Mempori

Polaluado to Yahudi ka pe'aroa-Do Ue Ala nahi bali 3:1-8

¹ Tewala kanandio, hapake polaluado to Yahudi ka hapake tuduno petindi?

² Hadio ntu'u, ka i larono luwuakoano. Amba-ambano: hangano ndi ondaemo ipine'ala-alaako pau-Do Ue Ala.

³ Gagi kana'umpe, tewala i olodo hinao anu nahi petenunu, polioke nahi petenunua atuu nahi pokogagio pe'aroa-Do Ue Ala anu nahi bali?

⁴ Naahi ntu'u! Tendeano: Ondae Ue Ala mentee Ira, ka luwuno mia marampegaupi ira, kana hinao teburi, ”Ka imengkaa mentee Komiu a luwuno pau-Miu, ka monangi ba Ibinitara.”

⁵ Sine tewala nahi menteeto mokomengkaao mentee-Do Ue Ala, hapake kita mpotae? Nahi Domoleoke Ue Ala – mia aku kupotae – tewala Dopopokitao rupa-Do?

⁶ Naahi ntu'u! Tewala kanatuu, kana'umpeke ka Dopokobitarao Ue Ala wawontolino?

⁷ Sine tewala mentee-Do Ue Ala kolangka-langkaino pokomaramba-Do hangano pegaupiku, tembio ka da kubinitara mbo'u kana mia tehala?

⁸ Kombake nahi mentee pomposebedo mia anu motae, nine mpotae kita, ”Aiwamo ka tompoweweu anu mosa'o, ka ipesabaako anu moiko inso ndi onae.” Mia kanatuu tekonaomo ipohawe pohuku.

Luwuno mia onaemo mia mentehala 3:9-20

⁹ Gaagi kana'umpe? Hinaoke polaluato inso a mia susua? Naahi ntu'u. Hangano hieno tomentuluri iramo moiko to Yahudi, maupo to Yunani, nine luwudo ipabawai iramo hala,

¹⁰ kana hinao teburi, ”Nahina anu mentee, maupo te'asa mia nahina.

¹¹ Nahina maupo te'asa mia anu molino pinewowolono, nahina maupo te'asa mia anu umungke Ira Ue Ala.

¹² Luwuno mia mepansia iramo, luwudo nahina tuduno, nahina anu moweweu moiko, maupo te'asa mia nahina.

¹³ Burokodo kana kaburu anu menganga, elodo mo'o'ahiti, wiwido me'ipo.

¹⁴ Ngangado bukeako pontotonaa,

¹⁵ karudo magasi mpo'uwu rea.

¹⁶ Tekalea ka matea domenaa ira a nsalado,

¹⁷ ka sala sintuwu nahi domento'orio;

¹⁸ doitoako Ira Ue Ala nahina a mia atuu.”

¹⁹ Sine tomento'orio, nine luwuakoano anu teburi a Wunta Taura tiado anu mentuwu i totono songka Taura, ka ite'onso sompo nganga ka asa wawontolino ntedonta i totono pohuku-Do Ue Ala.

²⁰ Hangano nahina maupo te'asa mia anu pinokomentee i aro-Do Ue Ala hangano pontondano songka Taura, tendeano hangano songka Taura mia tumo'orio hala.

Mia pinokomentee hangano pompe'ala-ala 3:21-31

²¹ Sine kanandio-andio, nahina songka Taura, pinokomengkaaomo mentee-Do Ue Ala, kana anu sinakosii a Wunta Taura ka wuntado luwuno nabi,

²² onaemo mentee-Do Ue Ala hangano pompe'ala-ala ndi Ondae i Yesu Kerisituu tiado luwuno mia anu mpompe'ala-ala. Hangano nahina teposisinggeno.

²³ Hangano luwuno mia mpoweweu iramo hala ka nami hina maramba-Do Ue Ala ndi ondae,

²⁴ ka hangano pompehohawa mempinokomentee iramo mpena hangano pontolosia ndi Ondae i Kerisituu Yesu.

²⁵ Ondae i Kerisituu Yesu Dopakosi Iramo Ue Ala gagi sala pesintuwua hangano pompe'ala-ala, a rea-Do. Mongkona andio Doweweuo mopokitao moleo-Do, hangano Dopo'ineeomo luwuno hala anu gagiomo i ndi'upua i tempono da Dosabara.

²⁶ Tinoo-Do onaemo mopokitao moleo-Do i tempo andio, ka imengkaa, nine mentee Ira ka mokomentee ira mbo'u mia anu mpompe'ala-ala ndi Ondae i Yesu.

²⁷ Tewala kanandio, hapake pu'uno ka tomemawongko? Nahina! Me'empehiako hapa? Me'empehiako wineweu? Naahi, tendeano me'empehiako pompe'ala-ala!

²⁸ Hangano kimpe'ala-alao, nine mia pinokomentee hangano pompe'ala-ala, ka komba hangano itondao songka Taura.

²⁹ Ke Ondae Ue Ala butu koa Ue Alado to Yahudi? Kombake Ondae mbo'u Ue Alado tongku susua? Humbee, mentee. Ondae mbo'u Ue Alado tongku susua!

³⁰ Pengkonaano, tewala hinao aasa Ue Ala, anu mokomenteeo moiko mia mpetindi hangano pompe'ala-ala, maupo mia mbo'u anu nahi petindi hangano pompe'ala-ala.

³¹ Tewala kanatuu, nde kimpebungkuioke songka Taura hangano pompe'ala-ala? Naahi ntu'u! Tendeano kimpokomorosoo.