ROMA 16 - Wunta Mempori

Tabea 16:1-16

¹ Ku'emao ka imperioo i Pebe, pepaekompoto beine anu mekakaako ira bawaa i Kengkerea,

² ka imentarimao hangano Ondae i Ue, kana pototodo mia mempori, ka imentulungio tewala ikereo. Hangano hadioomo mia tinulungino, saru mbo'u ongkue.

³ Impohaweo tabeaku ndi Perisikila ka ndi Akiwila, wali-wali pe'asa mpo'anggaku ndi Ondae i Kerisituu Yesu.

⁴ Dopeta'oakonomo penaado tiano tuwuku. Ndi ondae komba butu ongkue anu montarima kasi, sine luwuno mbo'u bawaa komba to Yahudi.

⁵ Tabea mbo'u a bawaa i rahado. Tabea ndi Epenetu, pepaekompo anu pinehohawaku, anu onaemo wua amba-ambano inso i wita Asia tia-Do i Kerisituu.

⁶ Tabea ndi Maria, anu ipo'anggaakomiumo ntu'u.

⁷ Tabea ndi Andoroniku ka ndi Yuniasi, pepaekompoku mpe'asa tongku, anu hori ira tinorungku meronga saru ongkue, ondaemo mia anu tinudu i olodo luwuno tinena ka anu se'elu iramo gagi to Kerisituu sekono ongkue.

⁸ Tabea ndi Ampiliatu anu pinehohawaku ndi Ondae i Ue.

⁹ Tabea ndi Urabanu, walimami mpo'angga ndi Ondae i Kerisituu, ka tabea ndi Setaki, anu pinehohawaku.

¹⁰ Tabea ndi Apele, anu pine'ala-alaomo ndi Ondae i Kerisituu. Tabea ndi ondae, pe'asa rahano i Arisitobulu.

¹¹ Tabea ndi Herodioni, waliku pe'asa tongkuku. Tabea ndi ondae pe'asa rahano i Narikisu, anu mpompe'ala-ala ndi Ondae i Ue.

¹² Tabea ndi Teripena ka ndi Teriposa, anu mo'angga meteahako ntu'u a mpo'anggaa-Do i Ue. Tabea ndi Peresi, anu pinehohawaku, anu mo'anggaomo meteahako ntu'u a mpo'anggaa-Do i Ue.

¹³ Tabea ndi Rupusi, mia bininiki ndi Ondae i Ue, ka tabea ndi ineno, anu kupe'ineo koa mbo'u.

¹⁴ Tabea ndi Asinikiritu, ndi Pelego, ndi Heremesi, ndi Patoroba, ndi Heremasi ka luwuno pepaekompo anu pe'asado.

¹⁵ Tabea ndi Pilologu, ka ndi Yulia, ndi Nereusu ka a mpepaekompono beine, ka ndi Olimipasi, ka a luwuno mbo'u mia mempori anu pe'asado.

¹⁶ Imemambetabeamo a mpewoo-woo mempori. Tabea ndi omiu inso a luwuno bawaa-Do i Kerisituu.

Pompopoto'ori 16:17-24

¹⁷ Sine kupatudu komiu, pepaekompo, ka impetangkoro ndi ondae, anu tepobungku saru pompaguru anu tinarimamiumo, mompokohina tekale-kalea ka pompopandei. Onaemo pu'uno ime'olaiako ira!

¹⁸ Hangano mia kanandiodo komba dompo'anggaako Ira i Kerisituu, Ueto, sine mpo'angga tiano kompodo ondaedo. Ka saru luwuno paudo anu mpo'o'ahiti ka pepaudo anu momoiko mopo'oo ira mia anu moleo aroado.

¹⁹ Lele mongkona pomperorongeakomiu domerongeomo luwuno mia. Onaemo pu'uno ka kupo'undeakomiu. Sine po'eheku ka imempande mposongka a hapa anu moiko, ka ime'olaiakono hapa anu mosa'o.

²⁰ Po'ineeomo Ondae Ue Ala, pu'uno rodoa, ka Doronga puro-puroo i Mosa'o a ntoto ngkarumiu. Pompehohawa-Do i Yesu, Ueto, kumongkomi komiu!

²¹ Tabeano i Tomotiu ndi omiu, pe'asa mpo'anggaku, ka inso ndi Lukiusu, i Yasoni ka i Sosipateri, wali-waliku pe'asa tongkuku.

²² Tabea ndi omiu a ntepo'asaa ndi Ondae i Ue inso ndi ongkue i Teretiusu, anu burio wunta andio.

²³ Tabea ndi omiu inso ndi Gayusi, anu moweeakune peratoaku, ka a luwuno bawaa. Tabea ndi omiu inso ndi Erasitu, puu pompekaria doino inia, ka inso ndi Kuwaritu, pepaekompoto. [

²⁴ Pompehohawa-Do i Yesu Kerisituu, Ueto, kumongkomi komiu luwu! Ami.]

Luwuno marambaa tia-Do Ue Ala 16:25-27

²⁵ Ndi Ondae, anu pabawa mokoroso komiu, – montonda Lele Mawongkoa anu pinaleleku ka pompalelea mongkona Ondae i Yesu Kerisituu, menunu saru mengkaano winuni, anu kinominoako mapa'etu-etu nta'u tehineno,

²⁶ sine anu kanandio-andio pinokomengkaaomo ka montonda parenta-Do Ue Ala anu nahina tampulaano, pinaleleomo a luwuno tongku hangano wuntado luwuno nabi anu wawa ira ka dompetonda mpompe'ala-ala –

²⁷ ndi Ondae, butu Ondae Ue Ala anu buke ponto'ori mentee, hangano Ondae i Yesu Kerisituu: luwuno marambaa hawe nahina tampulaano! Ami.