ROMA 15 - Wunta Mempori

Mia anu molema ka mia anu moroso 15:1-13

¹ Ontae, anu moroso, asalakono ka tomentembio molemano mia anu nahi moroso ka si tompo'ungke sanaato ontaeto.

² Sompo mia i oloto asalakono mo'ungkeakono sanaano pe'asa miato a moikoano ka ipokomorosoo.

³ Hangano Ondae mbo'u i Kerisituu nahi Dopo'ungke sanaa-Do Ondae-Do, sine kana hinao teburi, ”Luwuno pompepaukido, anu mepaukia-Komiu, konaomo ndi ongkue.”

⁴ Hangano luwuakoano anu binuri i ndi'upua, binuriomo ka igagi pepaguruato, ka tomemoroso mpe'ini a pomperorohia hangano modato aroa ka pontarero inso a Wunta Mempori.

⁵ Po'ineeomo Ondae Ue Ala, anu pu'uno moroso aroa ka pontarero, moweeakomiu sintuwua, menunu saru po'ehe-Do i Kerisituu Yesu,

⁶ ranta ka impe'asa aroa ka mpe'asa mpau umunde-unde Ira Ue Ala ka Ama-Do Ueto, i Yesu Kerisituu.

⁷ Onaemo pu'uno imambetarimamo, mengkena mbo'u kana Ondae i Kerisituu Dotarima kitamo, ka Dopinokomaramba Ondae Ue Ala.

⁸ Tinooku onaemo, nine hangano mentee-Do Ue Ala Ondae i Kerisituu gagi Iramo puu pompekakaakodo mia mpetindi mokorosoo dandi anu Doweeako iramo uempu'uto,

⁹ ka weweuo luwuno tongku mpelangkai Ira Ue Ala hangano pe'aroa-Do, kana hinao teburi, ”Onaemo pu'uno aku melangkai Komiu i olodo luwuno tongku ka menaniako penani umunde-undeo nee-Miu.”

¹⁰ Ka potilalono, ”Impo'undemo, hei luwuno tongku, saru bawaa-Do.”

¹¹ Ka mbo'u, ”Unde-unde Iramo i Ue, hei luwumiu tongku, ka po'ineeomo luwuno suku tongku me'unde-unde Ira.”

¹² Ka motae mbo'u i Yesaya, ”Tumba inso a mpu'uno i Isai ta mesabaako, ka onae ta mentade parentao luwuno tongku, ka ndi Ondaemo pomperorohiado luwuno tongku.”

¹³ Po'ineeomo Ondae Ue Ala, pu'uno pomperorohia, mokobukeakomiu luwuno po'undea ka rodoa a laro pompe'ala-alamiu, ka imemare'e a laro pomperorohia hangano roso-Do Penaa Mempori.

I Paulu mokolosao luwuno pepu'uano binurino 15:14-21

¹⁴ Pepaekompoku luwu-luwu, lano kupe'ala-alao ongkueku mongkona omiu, nine omiu mbo'u bukeakoomo moikoa ka luwuno ponto'ori ka imempolio mambe patudu.

¹⁵ Sine, hangano pompehohawa anu Dowee akumo Ue Ala, i ra'ai i ndi'ai memosiaako akumo moburi wunta mopoto'oriakomiu,

¹⁶ onaemo nine moiko kugagi puu pompekakaako-Do i Kerisituu Yesu a luwuno tongku komba to Yahudi a pompekakaakoa mompalele Lele Mawongkoa-Do Ue Ala, ka Dotarima ira koa Ue Ala luwuno tongku komba to Yahudi gagi pesomba anu Dopemoikoo, anu pinokomempori-Do Penaa Mempori.

¹⁷ Gaagi ndi Ondae i Kerisituu moiko kumawongkoakono mongkona kupo'anggaako Ira Ue Ala.

¹⁸ Hangano nahi aku sapa mepau mongkona hapa anu susua, sangkadio mongkona hapa anu Doweweuomo i Kerisituu hangano ongkue, onaemo wawa ira tongku susua ka dompomperorongeako, hangano pau ka wineweu,

¹⁹ hangano pabawano luwuno petondoni ka anu mengkinohali-haliako ka hangano pabawa-Do Penaa. Kanandiomo a laro pelempaa sumompoo wita inso i Yerusale hawe i Ilirikumi kupaleleomo luwu Lele Mawongkoa-Do i Kerisituu.

²⁰ Ka a laro pompalelea atuu kutuduo gagi pompelangkaiku, nine nahi kuweweuo a luwuno po'ianga, anu domento'oriomo mia nee-Do i Kerisituu, ka si kupowangu a wawo empehino, anu domenaaomo mia susua,

²¹ sine menunu saru anu hinao teburi, ”Ondae, anu napi domehori mpontarima lele mongkona Ondae, ira mengkita Ira, ka ondae anu nahi domerongeo, ira mpokonto'orio.”

Pomperorohino i Paulu ta aiwa i Roma 15:22-33

²² Onaemo pu'uno ka kuwela terenggo-renggo aiwa tepohaweakomiu.

²³ Sine kanandio-andio, hangano nami hina mbo'u po'anggaaku i wita andio ka hangano ba opia nta'umo tehineno kumingki tepohaweakomiu,

²⁴ kuperorohio a laro pelempaaku lumako i Sipano aku mokontetoro a mpo'iangamiu ka tepohaweakomiu, ranta ka imempolio menteo aku lumako raane, umariku mewali-waliakomiu sarai.

²⁵ Sine kanandio-andio kontongaaku a laro pelempaa lumako i Yerusale mowawa petulungi a mia memempori.

²⁶ Hangano Makedonia ka Akaya domempakosiomo mpompowee petulungi a mia memongkokolaro i olodo mia memempori i Yerusale.

²⁷ Lano domempakosiomo, sine atuu lano ira meweweuo. Hangano, tewala luwuno tongku susua mpohawe iramo tia arataa rohanido to Yahudi, ka luwuno tongku susua mbo'u atuu asalakono ka domentulungi ira to Yahudi mpoweeako ira arataado.

²⁸ Tewala kupoko'umariomo anggaa atuu ka kupeweengakonomo hasilino inanggado luwuno tongku susua atuu ndi ondae, aku melungka lumako i Sipano lumaloo kotamiu.

²⁹ Ka kuto'orio, nine tewala aiwa aku tepohaweakomiu, aku hawe bukeako poronso-Do i Kerisituu.

³⁰ Sine hangano Ondae i Kerisituu, Ueto, ka hangano pompehohawa-Do Penaa, kupatudu komiu, pepaekompo, ka impokowali aku pekakaiakune ndi Ondae Ue Ala,

³¹ ka kutepekaria inso a mia anu nahi dompomperorongeako i wita Yudea, ka pompekakaakoku i Yerusale ka dompemoikoo mia mempori i ra'ai,

³² ka kupo'unde hawe ndi omiu hangano po'ehe-Do Ue Ala, ka kupohawe roso meronga-rongaakomiu.

³³ Ondae Ue Ala, pu'uno rodoa, kumongkomi komiu luwu! Ami.