ROMA 14 - Wunta Mempori

Si mpobitara pepaekompomiu 14:1-12

¹ Imentarimaomo mia anu memolema pompe'ala-alano ka siimo imempopauo pohaweno aroano.

² Anu asa mia me'ala-alao, nine moiko ikaano luwuno rupano kaanga, sine mia anu molema pompe'ala-alano butu koa mongkaa inahu.

³ Isema anu mongkaa, si pokongkodeio mia anu nahi pongkaa, ka isema anu nahi pongkaa, si bitarao mia anu mongkaa, hangano Dotarimaomo Ue Ala mia atuu.

⁴ Isemake omiu, ranta ka imebitarao atano mia susua? Ke onae mentade ke onae tebangku, to'oriano koa ueno. Sine ta koa mentade mpiha, hangano Ondae i Ue pabawa dumagaio mpiha ka ipentade.

⁵ Anu asa mia tumuduo oleo anu aasa laluaopo sekono anu mehano, sine anu mehano tumuduo luwuno oleo mengkena koa. Asalakono sompo mia ka ipe'ala-alao ntu'u i laro aroano onaeno.

⁶ Isema anu me'ini a aasa oleo anu tepakosi, iweweuomo hangano Ondae i Ue. Ka isema mongkaa, iweweuomo hangano Ondae i Ue, hangano onae montarima kasi ndi Ue Ala. Ka isema nahi pongkaa, iweweuo hangano Ondae i Ue, ka onae koa mbo'u montarima kasi ndi Ondae Ue Ala.

⁷ Hangano nahina maupo te'asa mia i oloto anu tuwu tiano koroino onaeno, ka nahina maupo te'asa mia anu mate tiano koroino onaeno.

⁸ Hangano ba tomentuwu, tomentuwu tia-Do i Ue, ka ba tomemate, tomemate tia-Do i Ue. Gaagi moiko tuwu ke mate, ontae mia-Do i Ue.

⁹ Hangano onaemo Domateako i Kerisituu ka wali tuwu, ka Dogagi Ue, moiko a mia memate, maupo a mia mentuwu.

¹⁰ Sine omue, tembio ka ubitarao pepaekompomu? Ke tembio ka upokongkodeio pepaekompomu? Hangano luwuto asalakono mewinawa i arono kadera pobitaraa-Do Ue Ala.

¹¹ Hangano hinao teburi, ”Hangano Ongkue tuwu, kanandiomo pau-Do i Ue, luwuno mia ira mpenggolontu i aro-Ku ka luwuno mia ira me'unde-unde Ira Ue Ala.”

¹² Kanandiomo sompo mia i oloto ta sumangki Ira Ue Ala mongkona koroino onaeno.

Si mpompowee watu tetidua 14:13-23

¹³ Onaemo pu'uno siimo tomambebitara mbo'u! Sine moikoopo imentondao pohawe laro andio: Si toweweuo pepaekompoto ka itedonta ke tetidu!

¹⁴ Kuto'orio ka kupe'ala-alao ndi Ondae Ue Yesu, nine nahina te'asa anu mokoburu inso a ngkoroino onaeno. Butu a mia anu tumuduo, nine hapamo koa mokoburu, a miamo atuu hapamo koa atuu mokoburu.

¹⁵ Hangano tewala upokomahakio aroano pepaekompomu hangano hapa anu kinaamu, onaemo ka nami utuwu mbo'u montonda inemano pompehohawa. Si solangio pepaekompomu hangano kaangamu, hangano Domateakonomo i Kerisituu.

¹⁶ Hapa anu moiko, anu hina ndi omiu, si mpo'ineeo ipinosebe.

¹⁷ Hangano Poparentaa-Do Ue Ala komba mongkona kaanga ka inua, sine mongkona menteea, rodoa ka mawongkoa hangano Penaa Mempori.

¹⁸ Hangano ba isema anu mekakaako Ira i Kerisituu kanandio, onae Dopemoikoo Ue Ala ka dompelangkaio mia.

¹⁹ Onaemo pu'uno aiwamo tome'ungkeo hapa anu mowawa rodoa ka anu mentudu ka tomambepokoroso.

²⁰ Si solangio inangga-Do Ue Ala hangano kaanga! Luwuakoano mempori, sine masolaomo mia, tewala hangano kaangano mia susua tetidu!

²¹ Laluopo omue si pongkaa bau ke mo'inu anggoro, ke hapamo koa anu gagi watu tetiduno pepaekompomu.

²² Pe'inimo a pompe'ala-alamu atuu, tiano koroimu omuemu i aro-Do Ue Ala. Me'uraomo onae, anu nahi hukuo koroino onaeno a laro hapa anu ipemoikoo ba iweweuo.

²³ Sine ba isema anu nanta-nanta, ba ikaano, onae hinukuomo, hangano nahi weweuo me'empehiako pompe'ala-ala. Ka luwuakoano anu nahi pe'empehiako pompe'ala-ala, onaemo hala.