ROMA 13 - Wunta Mempori

Petenunu a nto poparenta 13:1-7

¹ Sompo-sompo mia asalakono metuundu a parenta anu i wawono, hangano komba hina to poparenta, anu komba inso ndi Ondae Ue Ala; ka luwuno to poparenta anu hina, Dopakosio Ue Ala.

² Onemo pu'uno ba isema mo'ewai to poparenta, i'ewaio pompakosi-Do Ue Ala ka isema anu weweuo, ta mohawe hukuno.

³ Hangano tewala asa mia moweweu moiko, siimo idoito a nto poparenta, sangkadio onae moweweu anu mosa'o. Mebehe komiuke mentuwu nahi medoito a nto poparenta? Impoweweumo anu moiko ka komiu mpohawe po'unde-unde inso ndi onae.

⁴ Hangano to poparenta onaemo tetenaa-Do Ue Ala tiano moikomiu. Sine tewala moweweuko mosa'o, doitoakonomo, hangano hapamo koa tuduno to poparenta ka dompotampi ponai. To poparenta onaemo tetenaa-Do Ue Ala mombaloakono tekuda-Do Ue Ala ndi ondae anu mpoweweu mosa'o.

⁵ Onaemo pu'uno ka tomenagio po'eheno koroi, komba butu hangano pontekudaako-Do Ue Ala, sine hangano koa mbo'u pompauno aroato.

⁶ Onae koa mbo'u pu'uno ka impo'owahi sima'ulu. Hangano ondae anu me'anggao mongkona atuu onaemo anu mpo'anggaako Ira Ue Ala.

⁷ Ime'owahiomo a luwuno mia hapa anu asalakono komiu me'owahio: sima'ulu a mia anu tekona montarima sima'ulu, sima'ulu susua a mia anu tekona montarima sima'ulu susua; imedoito a mia anu tekona idinoitoako ka impelangkaio mia anu tekona ipinelangkai.

Pompehohawa onaemo te'ihiino songka Taura 13:8-14

⁸ Si mpepasua hapa-hapa maupo ndi semamo koa, sine asalakono ka imambepehohawa. Hangano ba isema mehohawao pe'asa miano, i'ihiiomo songka Taura.

⁹ Hangano pau-Do: si ponsosabo, si pompepate, si ponako, si mosisiri ka pau-Do mehano maupo anu isua, teporokoomo a mpau-Do andio, onaemo: Pehohawaomo pe'asa miamu kana koroimu omuemu!

¹⁰ Pompehohawa nahi poweweu mosa'o a mpe'asa miano, hangano atuu pompehohawa onaemo ihiino songka Taura.

¹¹ Mongkona andio asalakono ka imeweweuo, hangano imento'orio tempo kanandio-andio, onaemo nine haweomo tempono ka impewangu umari mpoturi. Hangano kanandio-andio tekaduduiato rangkuomo susua sekonopo tempono tomegagi mpompe'ala-ala.

¹² Tehineomo wongi, tamo ronga meene. Onaemo pu'uno aiwamo ka tomebintao luwuno wineweu wongi-wongia ka tompokonao parewa mpetea mewine!

¹³ Aiwamo tomentuwu mponto'ori gau, kana tempono meene, komba a mpogawea nahina sa'uno ka memolangu, komba a mpebelesua ka montonda po'eheno aroa, komba a nteposisalaa ka mengkohili.

¹⁴ Sine impokogagi Iramo Ue Yesu Kerisituu gagi pepatinda parewa mpetea mewine ka si mpekariao koroimiu ka impotendeo po'eheno.