ROMA 12 - Wunta Mempori

Pesomba anu mentee 12:1-8

¹ Onaemo pu'uno, pepaekompo, hangano pe'aroa-Do Ue Ala kupatudu komiu, ka impesombaakono koroimiu gagi pesomba anu tuwu, anu mempori ka anu pinemoiko-Do Ue Ala: onaemo atuu pesombamiu anu mentee ntu'u.

² Omiu si mpengkenaakono wawontolino andio, sine impebalimo a wo'ohuno pinewowolomiu, ranta ka impokonto'orio po'ehe-Do Ue Ala: hapa anu moiko, anu pinemoiko-Do Ue Ala ka anu nahina makurano.

³ Me'empehiako pompehohawa anu kuwineeako, kupauakomiu nte'o'asa mia i olomiu: Si mpompewowolo mongkona anu lalu mantande sekonopo anu tekona impewowoloo, sine tendeano impompewowolomo temoiko, ranta ka impokopabawaio koroimiu montonda ukuruno pompe'ala-ala, anu Doweeakomiu Ue Ala sompo-sompo mia.

⁴ Hangano mengkena kana a asa koroito hadio parewa ngkoroi, sine komba luwuno parewa ngkoroi atuu mpohawe anggaa anu mengkena,

⁵ kanatuu koa mbo'u ontae, maupo tomehadio, mpe'asa ngkoroi ndi Ondae i Kerisituu; sine ontae singge mia onaemo parewa saru anu mehano.

⁶ Kanandiomo tompohawe pompowee anu mpesingge-singge montonda pompehohawa anu tomewineeako: Tewala pompowee atuu ka topompau anu ta gagi moikoomo tomeweweuo menunu saru pompe'ala-alato.

⁷ Tewala pompowee ka topompekakaako, moikoomo topompekakaako; tewala pompowee ka topompaguru, moikoomo topompaguru;

⁸ tewala pompowee ka topompatudu, moikoomo topompatudu. Isema anu montia hapa-hapa, asalakono ka iweweuo a moleono aroano; isema anu metewawa, asalakono ka i'anggao temokua; isema anu mopokitao pe'aroano, asalakono ka iweweuo a mawongkono aroa.

Patudu mentuwu a laro pompehohawa 12:9-21

⁹ Asalakono mompehohawa atuu si mpo'onde-onde! Ime'olaiakonomo anu mosa'o ka impoweweumo anu moiko.

¹⁰ Asalakono ka imambe pehohawa kana pepaekompo ka mambepese'elungi a mpompelangkai.

¹¹ Ka si mansa luuntu mokuamiu, po'ineeomo ka itensila penaamiu ka impo'anggaako Iramo i Ue.

¹² Impo'undemo a laro pomperorohia, imensabaramo a laro ma'isoa, ka si mpenaa-naa mpekakai!

¹³ Imentulungi iramo mia mempori a laro makurado ka po'ineeomo koroimu ka iwela koa mompowee peratoa!

¹⁴ Imeronsoomo isema anu bobarasai komiu, imeronsoomo ka si mpototonaa!

¹⁵ Impo'undemo saru mia anu mo'unde, ka impengesemo saru mia anu mengese!

¹⁶ Asalakono ka impe'asa aroa ka pompewowolo a laro ntuwumiu memoroko; siimo impompewowolo luwuakoano anu mantande, sine impompewowolomo a luwuakoano anu tekona. Si pompepande-pande!

¹⁷ Mosa'oa si pombaloakono mosa'oa; weweuomo hapa anu moiko a luwuno mia!

¹⁸ Tompa pinolimiu, tewala mongkona atuu montonda omiu, imentuwumo mpesintuwuako ira luwuno mia!

¹⁹ Pepaekompo luwu-luwu anu pinehohawaku, si mpombalo omiu-miu, sine impeweengakono a pontekudaako-Do Ue Ala, hangano hinao teburi: Pombaloa atuu tia-Ku. Ongkuemo anu mombalo, pau-Do i Ue.

²⁰ Sine, tewala iwalimu mokoninggo, imempakao; tewala mokoranga, impopo'inuo! Hangano mpoweweu komiu kanandio impohowuakono waro api a ntoro'uluno.

²¹ Si mentenagi a mosa'oa, sine mosa'oa imenangiakono moikoa!