ROMA 11 - Wunta Mempori

To Isaraeli anu da tebinta 11:1-10

¹ Onaemo ka kupesikeno: Polioke bawaa-Do Ue Ala Dopebungkui ira? Mentee ntu'u naahi! Hangano ongkue isa'a mbo'u to Isaraeli, inso a inuleno i Burahima, inso a nsuku Benami.

² Ondae Ue Ala komba Dopebungkui ira bawaa-Do anu bininiki-Do. Ke nahi imento'orio, hapa anu pinauno Wunta Mempori mongkona i Elia, tempono ipohaweo poweweudo to Isaraeli ndi Ondae Ue Ala,

³ ”Ue, luwuno nabi-Miu dompepate iramo, luwuno meda pontunua pesomba ndi Omiu domerongkaomo; butumo koa ongkue asa-asaku anu da tuwu ka inehedo mpepate aku.”

⁴ Sine kana'umpeke pau-Do Ue Ala ndi onae? ”Da pitu nsowupo mia Kupobinta tia-Ku anu nahi dohori mpesomba a Baala.”

⁵ Kanatuu koa mbo'u i tempo andio hinao mo'ia toreano, montonda pobinikino pompehohawa-Do.

⁶ Sine tewala mongkona atuu gagi hangano pompehohawa, ka komba mbo'u hangano wineweu, hangano tewala komba kanatuu, asalakono pompehohawa atuu komba pompehohawa mbo'u.

⁷ Gaagi kana'umpe? To Isaraeli nahi domehaweo hapa anu inungkedo, sine mia anu tebiniki mpohawe iramo. Ka mia anu mehano moteaomo aroado,

⁸ kana hinao teburi, ”Ondae Ue Ala weweu ira ntekoturi rodo, moweeako ira mata ka si dompongkita ka biri ka si domporonge, hawe a oleo kanandio-andio.”

⁹ Ka i Daudi motae, ”Po'ineeomo kaanga pinatindado gagi oho ka pompete'umala, pompokotesaa ka pombaloa ndi ondae.

¹⁰ Ka po'ineeomo matado ka igagi wongi-wongi, ranta nahi dompongkita, ka weweuomo torukudo ka imelongku mpiha.”

To Isaraeli ntetidu, tongku susua ntekadudui 11:11-24

¹¹ Onaemo ka kupesikeno: Nde ntetidu irake ka asalakono ntebangku? Mentee ntu'u naahi! Sine hangano halado, tekaduduia haweomo a luwuno tongku susua, weweu ira ka domemonsiri.

¹² Hangano tewala salado pengkonaano kaeano wawontolino, ka makurado kaeado luwuno tongku susua, tamoako mbo'u ba dompompe'ala-ala.

¹³ Kupauakomiu, hei luwuno tongku komba to Yahudi. Hangano ongkue Tinena a luwuno tongku komba to Yahudi, kutuduo atuu marambano pompekakaakoku,

¹⁴ onaemo ba kumansa mokontesingkao monsiri i laro aroado pe'asa tongkuku montonda tuwu ntolino ka mokontekaduduio ba opia mia inso ndi ondae.

¹⁵ Nde tewala nahi domentarimao pengkonaano sintuwua i wawontolino, polioke pontarimado hinao pengkonaano susua sekono tuwu inso i olodo mia mate?

¹⁶ Tewala mempori roti amba-ambano, asalakono luwuno anu sinalo mempori koa mbo'u, ka tewala mempori haka, asalakono luwuno sampano mempori koa mbo'u.

¹⁷ Onaemo pu'uno tewala pinuduomo ba te'opia sampano ka omiu kana tumba susua pinotakoomo i olono ka mpohawe mbo'u tia a hakano saitu anu buke uwoino,

¹⁸ si memawongkoakono luwuno sampa atuu! Tewala memawongko komiu, impewowoloo, nine komba omiu anu tumumboo haka atuu, tendeano haka atuu anu tumumbo komiu.

¹⁹ Bara'ura komiu mpotae: hinao ba opia sampano anu pinudu, ka kupinotako i olono kana tumbano.

²⁰ Moikoomo! Mempinudu ira hangano nahi dompompe'ala-ala, ka omiu tepontade moleo hangano pompe'ala-ala. Si mpompelangka-langkai, sine imedoitomo!

²¹ Nde ba nahi Dopehohawa ira Ue Ala lano sampano, nahi Ira mehohawa komiu mbo'u.

²² Onaemo pu'uno imengkitaomo pe'aroa-Do Ue Ala ka motea-Do, onaemo motea Ira a mia anu mentedonta iramo, sine ndi omiu pe'aroa-Do, onaemo tewala mekongko komiu mpiha a mpe'aroa-Do; tewala naahi, komiu koa me'inonini mbo'u.

²³ Sine ondae mbo'u ira wali mempinotako, tewala komba mekongko ira mpiha a laro nahi pompe'ala-alado, hangano pabawa Ira Ue Ala wali motako ira.

²⁴ Hangano tewala me'inonini komiu kana sampano saitu anu tuwu onaeno, ka nahi pengkena saru teweweumiu atuu mempinotako komiumo a ngkeu saitu ntu'u, tamoako lahi ondae andio, anu montonda insoado ira mempinotako a ngkeu saitudo ondaedo.

Pongkaduduia to Isaraeli 11:25-36

²⁵ Hangano, ka si mpotae mempande komiu pepaekompo, ineheku ka imento'orio rahasia andio: Asa ntia inso a nto Isaraeli megagi iramo motea aroa hawe ka isompo doado luwuno tongku susua mpewinso.

²⁶ Kanandiomo pesalaano luwuno to Isaraeli ira mengkinadudui, kana hinao teburi, ”Inso i Sioni Ira hawe Pontolosi, Ira umoninio luwuno pinogauno i Yako anu mosa'o.

²⁷ Ka onaemo andio pedandia-Ku saru ondae, tewala Ku'oniniako ira halado.”

²⁸ Mongkona Lele Mawongkoa dome'ewai Ira Ue Ala hangano omiu, sine mongkona pobiniki ondae pinehohawa-Do Ue Ala hangano uempu'u.

²⁹ Hangano komba Dope'o'oleakono Ue Ala pompehohawa ka pepoboi-Do.

³⁰ Hangano mengkena kana omiu i ndi'upua nahi mpetenunu ndi Ondae Ue Ala, sine kanandio-andio mpohawe pe'aroa hangano nahi dompetenunu,

³¹ kanatuu koa mbo'u ondae kanandio-andio nahi dompetenunu, hangano pe'aroa anu hinawemiumo, ondae koa mbo'u mpohawe pe'aroa.

³² Hangano Do'uko iramo Ue Ala luwuno mia a laro nahi dompetenunu, ka Dopopokitao pe'aroa-Do ndi ondae luwudo.

³³ O, tedoa ntu'u ondalo kaea-Do, ponto'ori-Do ka pande-Do Ue Ala! Mentee ntu'u nahi pinokompepentee luwuno pomputusi-Do ka mentee ntu'u nahi pinokonto'ori luwuno pesalaa-Do!

³⁴ Hangano, isemake anu tumo'orio pinewowolo-Do i Ue? Ke isemake anu horio gagi puu pompatudu-Do?

³⁵ Ke isemake anu horio moweeako Ira hapa-hapa, ranta asalakono Ira umeuo?

³⁶ Hangano luwuakoano inso ndi Ondae, ka hangano Ondae, ka ndi Ondae: Ndi Ondaemo marambaa hawe nahina tampulaano!