ROMA 10 - Wunta Mempori

¹ Pepaekompo, po'eheno aroaku ka pekakaiku ndi Ondae i Ue onaemo, ka domengkinadudui.

² Hangano kupolio mesakosii mongkona ondae, nine mpeteahako ira ntu'u umungke Ira Ue Ala, sine nahina ponto'orido anu mentee.

³ Hangano, nahi domento'orio mentee-Do Ue Ala ka hangano mpeteahako ira mpowangu menteeado ondaedo, ka nahi dompe'urumako a mentee-Do Ue Ala.

Menteea hangano pompe'ala-ala 10:4-15

⁴ Hangano Ondae i Kerisituu Ondaemo umihiio songka Taura, onaemo ka dompohawe menteea sompo-sompo mia anu mompe'ala-ala.

⁵ Nde iburio i Musa mongkona menteea hangano songka Taura, ”Mia anu meleluakono, ta tuwuako onae.”

⁶ Sine menteea hangano pompe'ala-ala motae kanandio, ”Si potae i laro aroamu: Isemake ta mewuatako i suruga?” onaemo: ka iwawa Ira i Yesu metii,

⁷ ke, ”Isemake ta metii a mpo'iangado mia mate?”, onaemo: ka iwawa Ira i Kerisituu mewuatako inso i olodo mia mate.

⁸ Sine hapake pinauno? Ndiomo, ”Pau atuu umpeda ndi omue, onaemo a laro ngangamu ka i laro aroamu.” Onaemo atuu pauno pompe'ala-ala, anu pinalelemami.

⁹ Hangano tewala impe'induako wiwimiu, nine Ondaemo i Yesu Ue, ka impe'ala-alao i laro aroamiu, nine Dowangu Iramo Ue Ala inso i olodo mia mate, ka komiu mengkinadudui.

¹⁰ Hangano koa aroa mia mompe'ala-ala, ka pinokomentee, ka saru wiwi ipe'induako mia ka ikinadudui.

¹¹ Hangano pauno Wunta Mempori, ”Ba isema me'ala-ala Ira, nahi ta pinokoko'ii.”

¹² Hangano nahina teposisinggeno olono to Yahudi ka to Yunani. Hangano Ondae Ue Ala anu aasa atuu Ondaemo Uedo luwuno mia, kaeado luwuno mia anu mpebooli ndi Ondae.

¹³ Hangano, ba isema anu mebooli a nee-Do i Ue, ta kinadudui.

¹⁴ Sine kana'umpe ka dompokompebooli ndi Ondae, tewala nahi dompe'ala-ala Ira? Kana'umpe ka dompokompe'ala-ala Ira, tewala nahi domerongeo mongkona Ondae. Kana'umpe ira merongeo mongkona Ondae, tewala nahina anu palele Ira?

¹⁵ Ka kana'umpe ka dompokopalele Ira, tewala nahi domentinena? Kana hinao teburi, ”Tedoa tekosi hawedo anu mpowawa lele moikoa!”

To Isaraeli nahi dompompe'ala-ala 10:16-21

¹⁶ Sine komba luwuno mia mentarimaomo lele moiko atuu. I Yesaya isa'a motae, ”Ue, isemake anu me'ala-alao pompalelemami?”

¹⁷ Gaagi, pompe'ala-ala tepu'u inso a mporongea, ka anu rinonge pau-Do i Kerisituu.

¹⁸ Sine mesikeno aku: Nde nahi domerongeoke? Lano domerongeomo, ”Suarado hawe i asa wawontolino, ka paudo hawe i tompano tolino.”

¹⁹ Sine mesikeno aku: Domengkekebaakono koa to Isaraelike? Amba-ambano mepau i Musa, ”Kupokogagi komiu monsisiriako ira mia anu komba bawaa ka mokontekuda komiu a tongku anu memonge-monge.”

²⁰ Ka i Yesaya mosia mepau, ”Kupemoikoomo domehawe Aku anu nahi dome'ungke Aku, mepopokita Akumo ndi ondae anu nahi dompesikenoa-Kune.”

²¹ Sine mongkona Isaraeli ipotae, ”Asa oleo mpobutu Kutasiakono kae-Ku a tongku anu nahi dompetenunu ka mpengenge.”