Puu Pontutulu 9 - Wunta Mempori

Teweweuno luwuno mia mengkena 9:1-12

¹ Menteeano, luwuno andio kupekokoongakonomo, luwuno andio kuparesaomo: mia mentee ka mia monto'ori saru luwuno wineweudo kongko a ngkae-Do Ue Ala, moiko pompehohawa ke maupo mbo'u po'o'aliako; mia nahi to'orio maupo hapa anu sumikorio.

² Luwuakoano mengkena a luwuno mia; teweweu atuu mengkena moiko a mia mentee maupo a mia mosa'o gauno, a mia moiko peleluno ka mempori maupo a mia mokoburu, a mia anu mompesombaako pesomba maupo anu nahi pompesombaako pesomba; Kana'umpe mia moiko peleluno, kanatuu koa mbo'u mia tehala; kana'umpe mia mesumpa, kanatuu koa mbo'u mia anu doito mesumpa.

³ Ndiomo urasa'o a laro luwuakoano anu gagi i totono mata'oleo: teweweuno luwuno mia mengkena. Aroado anano mia mbo'u bukeako anu mosa'o, ka anu nahi mentudu kongko a laro aroado asa ntinuwu, umarino atuu ondae mpe'aro a mpo'iangado mia mate.

⁴ Sine, isema anu tewinso i olono mia tuwu hinao pompe'osaia, hangano dahu anu tuwu moikoopo sekonopo singa anu mate.

⁵ Hangano, mia anu tuwu domento'orio nine ira memate, sine mia anu mate nahi ponto'ori hapa-hapa, nahina mbo'u tambodo, maupo rorambeado tampulaomo.

⁶ Moiko pompehohawa, po'o'aliako, maupo mosirido tehineomo tetadi, ka ranta nahina tampulaano nahina mbo'u tiado a laro luwuakoano anu gagi i totono mata'oleo.

⁷ Hio, kaanomo rotimu temawongko, ka inuomo anggoromu saru aroa mawongko, hangano tehineomo Dopemoikoo Ue Ala wineweumu.

⁸ Po'ineeomo sangkamu wela mopute ka asalakono ka ihina lana a wawo ulumu.

⁹ Pesanaaomo tuwu saru kombiamu anu pinehohawamu asa ntinuwumu anu nahina tuduno, anu Doweeakomu i Ue i totono mata'oleo asa ntinuwumu anu nahina tuduno. Hangano onaemo tiamu a laro ntumuwu ka a wineweu anu pine'iseiakomu i totono mata'oleo.

¹⁰ Hapamo koa anu pinoko'anggano kaemu, anggaomo tompaano rosomu. Hangano, nahina anggaa, pontimbanga, ponto'ori ka monto'ori a ntolinodo mia mate, ba isua ta lakoamu.

¹¹ Ka mbo'u kukitao i totono mata'oleo nine ponangia a mpetandia komba tiano anu magasi, ka peteaa komba tiano anu moroso, ka roti mbo'u komba tiano anu monto'ori, pompoli komba tiano anu pande mompewowolo, ka pompelangkai komba tiano anu pande mo'ungke akala, hangano tempo ka teweweuno dompembasaio luwu.

¹² Menteeano, mia nahi to'orio tempono. Kana bou anu konarako a laro buani anu monsolangi, ka kana manu-manu anu kona rako a laro oho, kanatuumo anado mia kona oho a tempo anu urasa'o tempono mongkona atuu mepobingko umalu ira.

Ponto'ori moikoopo sekono pabawa 9:13-18

¹³ Mongkona mbo'u andio kukitao kana ponto'ori i totono mata'oleo ka menteeano mentudu ndi ongkue:

¹⁴ Hinao asa kota kodei ka palilino nahi hadio. Asa mokole langkai monsapoi, kumaduo ka wangu ira rere watu pongkadua anu langkai ndi onae.

¹⁵ I tu'ai hinawe asa mia mongkokolaro anu monto'ori ka saru ponto'orino ikaduduio kota atuu. Sine, nahina maupo te'asa mia anu mewowoloo mia mongkokolaro atuu.

¹⁶ Ka ku'amba motae, ”Ponto'ori moikoopo sekono roso ka mosia, sine ponto'orino mia mongkokolaro tinata ka pauno nahi domerongeo mia.”

¹⁷ Pauno mia monto'ori anu pinohawe molusa-lusa tekonaopo sekono peboolino mia pabawa i olodo mia benge-benge.

¹⁸ Ponto'ori moikoopo sekono parewa mpetea, sine asa mia anu moweweu sala mokonsolangio hadio mongkona anu moiko.