Puu Pontutulu 8 - Wunta Mempori

¹ Isemake kana mia monto'ori? Ka isemake anu tumo'orio pengkonaano? Ponto'orino mia mokogagio rupano mewanta ka baliomo rupano.

Petenunu ndi mokole 8:2-8

² Tondaomo parentado mokole kana sumpamu ndi Ondae Ue Ala.

³ Si madara lako inso i arono, si pekorahako a wineweu anu mosa'o, hangano onae moweweu hapa anu ineheno.

⁴ Hangano petenano mokole pabawa, isemake anu ta motaeakono, ”Hapa anu wineweumiu mokole?”

⁵ Isema anu tumondao parenta nahi ta membasaio mongkona anu monsolangi, ka aroano mia monto'ori tumo'orio tempo pobitaraa.

⁶ Hangano, a luwuakoano hinao tempo pobitaraa ka urasa'ono mia dumadoo koroino.

⁷ Menteeano, nahina maupo te'asa mia tumo'orio hapa anu ta gagi, isema anu ta motaeakono kana'umpe mongkona atuu ta gagi?

⁸ Nahina maupo te'asa mia pabawa mokompenaa-naao angi ka nahina maupo te'asa mia pabawa a oleo matea. Nahina tolaa a laro mpeteaa, ka pelelu mosa'o nahi ta motolao mia anu weweuo.

Wineweu-Do Ue Ala nahi pokohawe laroo mia 8:9-17

⁹ Luwuno andio kukitaomo ka kupekokoongakono luwuno poweweu anu wineweu i totono mata'oleo, tempono mia anu asa pabawaio anu susua ranta ka imasola.

¹⁰ Kukita ira mbo'u mia mosa'o gaudo mengkinaburu, ondae anu hieno mpewinso mpeluarako a mpo'ianga mempori. Mia anu mpelelu mentee tendeano kinolupe a laro ngkota. Ndio mbo'u nahina tuduno.

¹¹ Hangano pohuku a wineweu mosa'o nahi ronga pinolempa, aroado anano mia buke pontoo ira mpoweweu mosa'o.

¹² Maupo mia tehala anu te'asa etumo ipoweweu mosa'o tehine tuwuno, sine kuto'orio mia anu doitoako Ira Ue Ala ta moiko tuwuno, hangano domedoitoakono maramba-Do.

¹³ Sine mia mosa'o gauno nahi ta moiko tuwuno ka kana eo-eo nahi ta tehine ituwu, hangano nahi doitoakono maramba-Do Ue Ala.

¹⁴ Hinao asa anu nahina tuduno gagi i wawontolino: hinao mia mentee anu membasaio hapa anu tekona tiano wineweuno mia mosa'o gauno, ka hinao mia mosa'o gauno anu membasaio hapa anu tekona tiano wineweuno mia mentee. Kupotae, ”Ndio mbo'u nahina tuduno!”

¹⁵ Onaemo pu'uno, ku'unde-undeo mawongkoa, hangano nahina anu pinemoikono mia i totono mata'oleo, sangkadio mongkaa mo'inu ka memawongko ntu'u. Onaemo atuu anu kumongkomio a laro mpine'iseino asa ntinuwuno anu Doweeakono Ue Ala i totono mata'oleo.

¹⁶ Tempono kupokobobotoliomo aroaku aku me'ihilaroo ponto'ori ka kumitao poweweu anu wineweuno mia i wawontolino anu nahi dompepusu meene ka wongi,

¹⁷ ka mengkaaomo ndi ongkue luwuno anu wineweu-Do Ue Ala, nine mia nahi pokohawe laroo anggaa anu wineweu i totono mata'oleo. Maupo mokendo mia umungkeo, nahi ta mokohawe laroo. Maupo mia anu monto'ori pauo nine onae tumo'orio, onae mbo'u nahi pokohawe laroo.