Puu Pontutulu 4 - Wunta Mempori

¹ Kukitao mbo'u luwuno pompokonsii anu wineweu i totono mata'oleo. Kitaomo, uwoi matado mia anu mempinokonsii ka nahina anu tumarero ira. Ndi ondae anu mpompokonsii hinao pabawa, sine nahina koa mbo'u anu tumarero ira.

² Onaemo pu'uno ka kupotae mia mate, anu tehineomo mate, me'uraopo sekono mia anu kanandio-andio da tuuwu.

³ Sine, anu lalu moiko sekono orua ira atuu onaemo mia anu napi hina, anu napi kitao wineweu mosa'o, anu wineweu i totono mata'oleo.

⁴ Kukitao nine luwuno pene'isei ka luwuno pandeno mo'angga a laro anggaa mompu'u inso a mosisirino asa mia a mia susua. Ndio mbo'u nahina tuduno ka perokuhi mobuani angi.

⁵ Mia anu benge-benge ka moluwe butu kumaano bauno onaeno.

⁶ Asa raku rodoa moikoopo sekono orua raku pe'isei ka perokuhi mobuani angi.

Mentuduno pontulungi a laro ntumuwu 4:7-16

⁷ Kukitao mbo'u anu nahina tuduno i totono mata'oleo:

⁸ Hinao asa mia tuwu asa-asano, nahina anano tama ke pepaekompo tama. Nahi hori menaa-naa pine'isei mo'angga ka matano mbo'u nahi pesompoo pompolino. Ipotae, ”Tiano isema pine'iseiku ka tumempuo pompesanaa?” Ndio mbo'u nahina tuduno ka marepaa anu mompokomasusa.

⁹ Orua mia moikoopo sekono asa mia, hangano ondae montarima tambo anu moiko a laro mpe'iseido.

¹⁰ Hangano, tewala tedonta ira, anu asa tumandeo walino, sine wainto ntu'u mia anu tedonta ka nahina tumandeo!

¹¹ Ka tewala moturi orua mia, ondae gagi mokula-kula, sine kana'umpe asa mia koa ka ipolio gagi mokula-kula?

¹² Tewala asa mia pinokontenangi, orua mia mokompekorahako. Ula otolu koloro komba moruana ibinite.

¹³ Moikoopo asa mia mongura anu mongkokolaro sine monto'ori sekonopo asa mokole anu mota'u sine benge-benge, anu nahi behe mbo'u pinepauako.

¹⁴ Hangano, mia mongura atuu meluarako inso a ntorungku ka igagi mokole, maupo ipine'anaako mongkokolaro itempono poparentaano mia anu mota'u atuu.

¹⁵ Kukitao luwuno mia anu tuwu i totono mata'oleo mpelempa meronga mia mongura atuu, anu ta gagi umeuo mokole atuu.

¹⁶ Nahi hori pingko palili anu pinarentano, sine mia anu hawe lembui nahi pe'eheo. Onaemo atuu, ndio mbo'u nahina tuduno ka perokuhi mobuani angi.

Doitoako Iramo Ue Ala 4:17–5:6

¹⁷ Tangkoroomo pelempamu tempono upelempa lumako a Raha-Do Ue Ala! Me'umpedaako moronge moikoopo sekono mompesombaako pesomba anu wineweudo mia benge-benge, hangano nahi domento'orio nine mpoweweu ira mosa'o.