Puu Pontutulu 3 - Wunta Mempori

Luwuakoano hinao tempono 3:1-15

¹ A luwuakoano hinao tempono, maupo tiano hapa i totono langi hinao tempono.

² Hinao tempono pine'anaako ka hinao tempono mate, hinao tempo mompaho ka hinao tempo mobuta anu pinaho;

³ hinao tempo mompepate ka hinao tempo mompokotompa; hinao tempo mohoa ka hinao tempo mowangu;

⁴ hinao tempo mengese ka hinao tempo mengingisi; hinao tempo monsabangi ka hinao tempo mo'ense-ense;

⁵ hinao tempo montadi watu ka hinao tempo mopumpu watu; hinao tempo mekopui ka hinao tempo nahi pekopui;

⁶ hinao tempo mo'ungke ka hinao tempo rugi; hinao tempo monaa ka hinao tempo montadi;

⁷ hinao tempo moberi ka hinao tempo monseu; hinao tempo komino ka hinao tempo mepau;

⁸ hinao tempo mompehohawa ka hinao tempo mo'o'aliaako; hinao tempo metea ka hinao tempo mesintuwu.

⁹ Hapa ura anu hinaweno puu mpo'angga inso a mpe'iseino?

¹⁰ Kukitaomo marepaa anu Doweeako ira Ue Ala anano mia ka domemarepaakono.

¹¹ Luwuakoano Doweweuo tekosi ia tempono, tendeano Dopoweeako ira anu nahi bali a laro aroado. Sine, mia nahi pokohawe laroo anggaa anu wineweu-Do Ue Ala inso a pompu'uano hawe pokotompaano.

¹² Kuto'orio nine nahina anu lalu dompemoikoo sekonopo memawongko ka mpembasaio sanaa a laro ntumuwudo.

¹³ Ka nine sompo mia mokompongkaa mo'inu, ka membasaio sanaa a laro luwuno pine'iseino; onaemo pompowee-Do Ue Ala.

¹⁴ Kuto'orio nine luwuakoano anu wineweu-Do Ue Ala ta kongko mpiha ranta nahina tampulaano, nahi pinokotiangi ke pinokura. Ondae Ue Ala weweuo kanatuu ka idoito mia ndi Ondae.

¹⁵ Hapa anu hina kanandio-andio hinaomo i ndi'ipua, ka hapa anu ta hina tehineomo hina, ka Ondae Ue Ala mo'ungke anu telaloomo.

Luwuno mengkena teweweuno 3:16–4:6

¹⁶ Hinao mbo'u anu kinitaku i totono mata'oleo: a mpebitaraa, i tu'ai hinao poweweu mosa'o, ka a mpo'ianga moleoa, i tu'ai hinao poweweu nahi moleo.

¹⁷ Kupotae i laro aroa, ”Ondae Ue Ala Ira mobitara, moiko mia mentee maupo mia moweweu mosa'o, hangano tiano luwuakoano ka luwuno anggaa hinao tempono.”

¹⁸ Mongkona anano mia kupotae i laro aroa, ”Ondae Ue Ala umarahako ira ka mopokitao ndi ondae nine ondae butu anano wula.”

¹⁹ Hangano teweweuno mia mengkena saru teweweuno kondehora, teweweu anu mengkena umalu ira; kana'umpe imate anu asa, kanatuu koa mbo'u anu susua. Oruano hinao penaa anu mengkena, ka mia nahi me'uraopo sekono kondehora. Menteeano, luwuno nahina tuduno.

²⁰ Oruano te'aro a asa mpo'ianga. Oruano gagi inso a pampawu ka oruano mekule a pampawu.

²¹ Isemake anu tumo'orio nine penaano mia mewuatako i wawono ka penaano kondehora metii i totono tolino?

²² Kukitao nine nahina anu lalu pinemoikono mia sekonopo mawongko a laro inanggano, hangano onaemo tiano. Menteeano, isema anu ta mopokitaakono hapa anu gagi umarino onae?