Puu Pontutulu 2 - Wunta Mempori

Ponto'ori ka benge-bengea nahina tuduno 2:1-26

¹ Mepau aku a laro aroa, ”Hio, Aku mo'arahako mo'unde! Membasaio sanaa! Sine kitao, atuu mbo'u nahina tuduno,”

² Mongkona mengingisi mo'unde kupotae, ”Atuu benge-benge!”, ka mongkona po'unde, ”Hapa tuduno?”

³ Kupepenteeakono pinewowoloku kana'umpe mokorosoakono anggoro koroiku, kontongaano pinewowolo molinoku kongkono metewawaako ponto'ori, ka kana'umpe mbioano benge-bengea, ranta ka kuto'orio hapa anu moiko tiado anano mia ka domeweweuo i totono langi asa ntinuwudo.

⁴ Kuweweuo luwuno anggaa langkai, kuwanguo luwuno rahaku, mompahoakono luwuno lere anggoroku;

⁵ kuweweuo luwuno lereku ka bonde po'ianga mesana-sanaa, saru mompahoakono mperupa-rupa keuno wua ngkeu;

⁶ Kuweweuo luwuno limbo uwoi ka i'uwoio tobuno keu mongura inso i ra'ai.

⁷ Ku'oli ira ata tama ka beine, ka hinao ata anu hina i rahaku. Ongkue mbo'u hadio sapiku ka asa bawaa bembe bimba lumaloio maupo isema anu tuwu i Yerusale se'eluno ongkue.

⁸ Ongkue mbo'u mopumpu tiaku salaka ka wulaa, arataado mokole ka wita poparentaa. Ku'ala ira puu mpenani moiko tama maupo beine, ka hadio samburue, pinesompodo anano mia.

⁹ Bakanatuu ongkue gagi langkai, tendeano langkaiopo sekono isemamo koa anu tuwu i Yerusale se'eluno ongkue. I larono luwuno atuu ponto'oriku mo'ia mpiha ndi ongkue.

¹⁰ Nahi ku'onsoio mataku inso a hapamo koa anu ineheno, ka nahi ku'ontoo aroaku inso a mawongkoa hapamo koa, hangano aroaku mawongkoakono luwuno pine'iseiku. Onaemo wuano luwuno pine'iseiku.

¹¹ Tempono kulako paresao luwuno anggaa anu wineweuno kaeku ka luwuno pine'isei anu kuweweuomo tiano atuu, kitaomo, luwuno atuu nahina tuduno ka perokuhi mobuani angi; nahina anu mentudu i totono mata'oleo.

¹² Ka ku'amba mewolili paresao ponto'ori, saru mbo'u anu nahi mentudu ka benge-bengea. Menteeano, hapa anu pinokoweweuno mia anu umeuo mokole sangkadio anu wineweuomo?

¹³ Kukitao nine ponto'ori mentuduopo sekono benge-benge, kana mewine mentuduopo sekono wongi-wongia.

¹⁴ Matano mia monto'ori kongko a uluno, sekono mia anu benge-benge melempa a laro wongi-wongia, sine kuto'orio koa mbo'u nine teweweu anu mengkena umalu ira luwu.

¹⁵ Motae aku mbo'u i laro aroa, ”Teweweuno mia benge-benge ta koa mbo'u umalu aku. Hapa tuduno ongkue i ndi'ipua tedoa monto'ori?” Ka ku'amba mepau i laro aroa nine andio mbo'u nahina tuduno.

¹⁶ Hangano, nahina rorambea anu nahi ta bali moiko a mia monto'ori maupo mia benge-benge. A oleo anu ta hawe luwuno tehineomo ikinolupe. Mia monto'ori mate koa mbo'u kana mia benge-benge!

¹⁷ Onaemo pu'uno ku'o'aliaakono tuwu, hangano hapa anu wineweu i totono mata'oleo kupemasusao. Menteeano, luwuno atuu nahina tuduno ka perokuhi mobuani angi.

¹⁸ Ku'o'aliaakono luwuno perokuhi anu kuweweuakono pine'isei i totono mata'oleo, hangano asalakono aku bintao a mia anu hawe umarino ongkue.

¹⁹ Ka i'amba isema anu tumo'orio ba monto'ori koake mia atuu ke benge-benge? Maupo kanatuu onae ta pabawa a luwuno perokuhi anu wineweuku saru pine'isei i totono mata'oleo ka saru mompake ponto'ori. Ndio mbo'u nahina tuduno.

²⁰ Mompu'uomo nahina pompe'osaiaku a luwuno perokuhi anu kuweweuo saru pine'isei i totono mata'oleo.

²¹ Hangano, tewala hinao mia me'i'iseiako ponto'ori, ka pande mo'angga, onae asalakono mobinta tiano a mia anu nahi pe'iseiakono atuu. Ndio mbo'u nahina tuduno ka urasa'o anu langkai.

²² Hapa anu mentudu hinaweno mia inso a luwuno pine'isei ka po'eheno aroa anu wineweuno i totono mata'oleo?

²³ Asa ntinuwuno buke masusaa ka hapa anu inanggano bukeako masusa aroa, maupo ntonga wongi aroano nahi rodo. Ndio mbo'u nahina tuduno.

²⁴ Nahina anu lalu moiko a mia sekonopo mongkaa mo'inu ka mesana-sanaa a laro mpine'iseino. Kupokonto'orio nine andio mbo'u inso a ngkae-Do Ue Ala.

²⁵ Hangano isema mokompongkaa ka menamio mo'ahino sangkadio ndi Ondae?

²⁶ Hangano, a mia anu Dopekonoo Dopoweeakono ponto'ori ka mawongko, sine mia tehala Dotenao ka ipopumpu ka mohowu hapa-hapa anu lembuino asalakono iweeakono mia anu Dopekonoo Ue Ala. Ndio mbo'u nahina tuduno ka perokuhi mobuani angi.