Puu Pontutulu 12 - Wunta Mempori

¹ Pewowolo Iramo Anu mokogagiko i tempono umongura, se'eluno napi hawe oleo anu urasa'o ka me'umpedaako ta'u anu pinaumu, ”Nahina pompesanaaku i larono”;

² se'eluno mata'oleo ka mewine, wula ka anano wula gagi wongi-wongi, ka seru mpepokule umarino usa;

³ i tempono puu mpodagai raha melelu, ka mia memoroso mpe'odo, ka luwuno beine puu mpogili mpenaa-naa hangano memakura ira, ka anu mpengkita inso a mpentangoa gagi memorawu ira luwu,

⁴ ka luwuno pewowa a wiwi nsala tinondo, ka unino pogilia gagi molema, ka suara gagi kana u'unino manu-manu, ka luwuno puu mpenani mpetuundu molema,

⁵ mia mbo'u gagi medoitoako mantandeno ka masolaa hinao a nsala, keu badama mensisi, kosume me'isei rumendeo koroino ka nami hina aroano mongkaa; hangano mia lumako a rahano anu nahina balino ka puu mponsabangi mpolio-lio a nsala;

⁶ se'eluno napi inotuhi rante salaka ka hulu wulaa pineha, se'eluno kusi napi rinawo umpeda a mata uwoi ka rodano pontambu sinolangi a wawo nsumuru,

⁷ ka pampawu mekule gagi wita kana se'eluno ka penaa tuwu mekule ndi Ondae Ue Ala anu mewengakono.

⁸ Luwuno nahina tuduno, ipotae Puu Mpontutulu, luwuno nahina tuduno.

Pokotompaano pau

⁹ Umarino ponto'ori, Puu Mpontutulu mbo'u mompaguruako ponto'ori a bawaa. Onae montimbanga, mo'arahako ka mompotuda hadio powadi.

¹⁰ Puu Mpontutulu merokuhi humawe ira pau anu mompokosanaa ka burio a moleono aroa luwuno pau menteea.

¹¹ Pauno mia monto'ori kana untuno tuko ponsaari pinotuwu ka luwuno bawaano kana paso anu mentepaho, anu iweeakono asa puu mpompakambi.

¹² Ka mbo'u, anaku, petangkoromo! Moweweu hadio wunta nahi ta hina poko'ariano, ka hadio mepaguru mokomokendoo koroi.

¹³ Poko'ariano pau inso a luwuno anu rinonge onaemo doitoako Ira Ue Ala ka pekariaomo luwuno parenta-Do, hangano andio onaemo anu ta wineweudo sompo mia.

¹⁴ Menteeano Ondae Ue Ala Ira wawao luwuno wineweu a mpebitaraa anu tinonda a luwuno anu tewuni, ke atuu moiko, ke atuu mosa'o.