Puu Pontutulu 10 - Wunta Mempori

Hangano benge-bengea 10:1-20

¹ Lale mate gagi pu'uno mina-mina anu weweuo mana moboo; kanatuu koa mbo'u benge-benge tedei pabawaopo sekono ponto'ori ka pompelangkai.

² Aroano mia monto'ori te'aro i koana, sine aroano mia benge-benge te'aro i manggali.

³ Ka tempono mbo'u mia benge-benge melempa a nsala, pinewowolono pudu-pudu, ka ipokomengkaao a sompo mia nine onae benge-benge.

⁴ Tewala tesingka tekudano anu pabawa ndi omue, siimo bintao po'iangamu, hangano sabara olaiakono poweweu hadio sala anu langkai.

⁵ Hinao asa wineweu mosa'o anu kinitaku i totono mata'oleo gagi sala anu nahi pine'inungako anu mepu'u inso a asa mia pabawa:

⁶ Mia benge-benge ninaa a hadio potoro anu mantande, sekono mia mompoli mpetorokio po'ianga anu i totono.

⁷ Kukita ira ata mpesawi a ngara ka anu langkai potorodo mpelempa karu kana luwuno ata.

⁸ Ba isema mongkeke bolo ta tedonta i larono, ka ba isema morumpa rere watu ta tumungkuo ule.

⁹ Ba isema mompeha watu ta mobelaako watu; ba isema mobansi keu ta mobelaako keu.

¹⁰ Tewala uase gagi boonda ka matano nahi inaha, asalakono mia mokolangkaio rosono, sine anu mentudu ka mehasili onaemo ponto'ori.

¹¹ Tewala ule motungku napi pinau basa-basano, asalakono puu mpobasa-basa nahi ta mehasili.

¹² Pau inso a ngangano mia monto'ori buke pompehohawa, sine wiwino mia benge-benge tumeleo mia atuu.

¹³ Pompu'uano pau inso a ngangano onaemo benge-bengea, ka poko'ariano pinauno onaemo nahi mentudu anu monsolangi.

¹⁴ Mia benge-benge hadio pauno, kahinaano mia nahi to'orio hapa anu ta gagi. Isemake anu ta pauakono hapa anu ta gagi umarino onae?

¹⁵ Pine'iseino mia benge-benge mokomokendoo koroino onaeno, hangano onae nahi to'orio sala lumako a ngkota.

¹⁶ Masolakomo wita, tewala mokolemu asa ana mongura, ka anu langkai potorodo ndi omue mo'oru mpongkaa iramo!

¹⁷ Me'urakomo wita, tewala mokolemu inso a nsuku moiko leluno, ka anu langkai potorodo mpongkaa a tempono gagi roso ka komba molangu!

¹⁸ Hangano memoluwe teresaomo ato, ka hangano mobea kae ma'itiomo raha.

¹⁹ Maroa pengingisido mia mpopatinda kaanga; anggoro mokomawongkoo tumuwu ka doi mokohinao luwuno atuu.

²⁰ Maupo a laro mpinewowolo omue si totonaa ira mokole, ka a laro bolongko poturia omue si totonaao mia mompoli, hangano manu-manu i laro meene bara'ura ira mpohaweo pinaumu, ka luwuno anu mepani mpokompohaweo hapa anu pinaumu.