Puu Pontutulu 1 - Wunta Mempori

Puu Mpau

¹ Pauno Puu Mpontutulu, anano i Daudi, mokole i Yerusale.

² Butu mpena nahina tuduno, ipotae Puu Mpontutulu, butu mpena nahina tuduno, luwuno nahina tuduno.

³ Hapa tuduno a mia luwuno pe'isei anu wineweuno i totono mata'oleo?

Te'atorano ka gagiano

⁴ Inule anu asa lumako ka inule anu susua hawe, sine tolino kongko mpiha.

⁵ Mata'oleo saba, mata'oleo sumoo, ka i'amba mompari-pari mekule a nsabaano.

⁶ Angi mepuuri i selata, ka i'amba mebolili i utara, motilalo mpiha mebolili ka a laro mpebolilino angi atuu mekule.

⁷ Luwuno korono waa a ntahi, sine tahi nahi hori buke; a waaano korono, i tu'aimo korono ipekule waa.

⁸ Luwuakoano mompokomokendo, nahi hori pingko domempauo mia; mata nahi mowohi mengkita, biri nahi te'osa moronge.

⁹ Hapa anu horio hina ta hina mbo'u, ka hapa anu horio wineweu ta wineweu mbo'u; nahina te'asa anu wo'ohu i totono mata'oleo.

¹⁰ Hinaoke te'asa anu pinokopau, ”Kitaomo, ndio wo'ohu!”? Atuu hinaomo i ndi'ipua, tehine se'eluno napi tomehina.

¹¹ Nahina rorambeado mia i tempo telalo, maupo a mia i tempo koramaino mbo'u nahi ta hina rorambeado anu mentuwu umarino ondae.

Pinembasaino Puu Mpontutulu mongkona ponto'ori

¹² Ongkue, Puu Mpontutulu, onaemo mokoledo to Isaraeli i Yerusale.

¹³ Kupo'asao aroaku aku paresao ka mepenteeakono ponto'ori luwuno anu gagi i totono langi. Onaemo atuu marepaa anu mompokomasusa, anu Doweeako ira Ue Ala a anado mia ka domemarepaako.

¹⁴ Kukitaomo luwuno poweweu anu wineweudo mia i totono mata'oleo, sine kitaomo, luwuno atuu nahina tuduno ka perokuhi mobuani angi.

¹⁵ Anu molengku nahi polio pinokomoleo, ka anu nahina nahi pinokodoa.

¹⁶ Kupotae i laro aroa, ”Kitaomo, kupokolangkaiomo ka tumiangio ponto'ori lalua sekonopo sompo mia anu moparenta i Yerusale se'eluno ongkue, ka aroaku mohaweomo hadio ponto'ori.”

¹⁷ Kupokobobotoliomo aroaku ka kupokonto'orio ponto'ori ka pande, anu nahina tuduno ka benge-bengea. Sine, kupokonto'orio nine mongkona mbo'u andio perokuhi mobuani angi.

¹⁸ Hangano, i larono hadio ponto'ori hadio pe'o'olea, ka isema mompokohadio ponto'ori, mompokohadio masusaa.