Puu Mpobitara 9 - Wunta Mempori

Abimele gagi mokole i Sikeme

¹ I Abimele anano i Yeruba'ala lumako i Sikeme ia mpe'etuno ineno ka ipauako ira ka ia luwuno tongku te'inso ia ineno,

² ”Tabea miu imempauako ira luwuno mia i kota Sikeme: ’Isua ke anu lalu moikomiu, pitu pulu mia anu parenta komiu, onaemo luwuno anano i Yeruba'ala, ke anu asa mia?’ Impewowoloo, motae ongkue pe'asa reamiu.”

³ Itempono dompohaweakono pepaekompono ineno luwuno pau atuu gagi moikoado luwuno mia i kota Sikeme, aroado mia atuu inehedomo ndi Abimele, hangano dompotae, ”Onae pepaekompoto!”

⁴ Ka i'amba dompoweeakono pitu pulu lempe doi salaka inso ia raha mpesomba Ba'ala-Beriti, ka i'amba i Abimele montambo mia tesosaelo ka mia mporisui ka domentondao.

⁵ Lumakoomo ia rahano amano i Opara, ka ipepate ira pitu pulu pepaekompono, luwuno anano i Yeruba'ala, i wawono asa watu. Sine i Yota, tompasusuno i Yeruba'ala kongko tuwu, hangano mewuni.

⁶ Tepumpu iramo luwudo palili i kota Sikeme ka Beti-Milo; melako ira mempotoroo i Abimele gagi mokole umpeda ia ngkeu tarabanti, tugu i Sikeme.

Pasinggirino i Yota a mokole

⁷ Mansano luwuno atuu pinauako i Yota, lumakoomo ia torukuno Gerisimi ka ipentade i punsuno, ka ipebooli tedoa meroku ndi ondae, ”Imeronge aku, omiu palili Sikeme, Ondae Ue Ala ta rumonge komiu!

⁸ Asa tempo hadio keu melako ira me'urapio anu ta gagi mokoledo. Dompotae a ngkeu saitu: Gagimo mokole ndi omami!

⁹ Sine sumangki keu saitu atuu ndi ondae: Nde kana'umpe ke ka aku menaa-naa moluarako lanaku anu pinake mompelangkai ndi Ondae Ue Ala ka mia, ka butu mekawe-kawe iwawono keu?

¹⁰ Ka i'amba mpotae ira keu atuudo ia keu ara: Aiwa, gagi mokolemami!

¹¹ Sine sumangki keu ara atuu ndi ondae: Nde kana'umpe ke ka aku menaa-naa moluarako anu mesiu ka luwuno wua anu moiko, ka butu mekawe-kawe iwawono keu?

¹² Dompotae luwuno keu atuu ia ngkeu anggoro: Aiwa, gagi mokolemami!

¹³ Sine sangkino keu anggoro atuu ndi ondae: Nde kana'umpe ke ka aku menaa-naa moluarako uwoi wua anggoroku, anu inehe-Do Ue Ala ka mia, ka butu mekawe-kawe iwawono keu?

¹⁴ Ka dompotae luwuno keu atuu ia ewo rui: Aiwa, gagi mokolemami!

¹⁵ Sangkino ewo rui a luwuno keu atuu: Ba lano inehemiu ntu'u mempotoro aku gagi mokolemiu, ime'aiwa mpo'ia i totoku. Sine ba naahi, po'ineeomo api ka ipeluarako te'inso ia ewo rui ka itunuo luwu keu arasi Libano.

¹⁶ Gaagi, mentee ke mpetenunu komiu ka moleo aroa mempotoroo i Abimele gagi mokole? Mentee ke moikoomo wineweu miu ndi Yeruba'ala ka pe'etuno ka imensuloo menunu pe'aroano?

¹⁷ Nde komba amaku ke anu me'iwali kumorahako komiu ka tuma'o penaano anu ka ipotola komiu inso a ngkaedo to Midia?

¹⁸ Sine, kanandio mpe'ewa komiu a mpe'etudo amaku ka impepate ira anado, pitu pulu mia, i wawono asa watu. Tendeano imempotoroo i Abimele, anano ata beine, gagi mokole i Sikeme, hangano onae pepaekompomiu.

¹⁹ Gagi oleo andio ba mpetenunu komiu ka moleo aroa miu ndi Yeruba'ala ka pe'etuno, po'ineeomo imemawongko hangano i Abimele ka po'ineeomo imawongko hangano omiu.

²⁰ Ba nahi, po'ineeomo ipeluarako api inso ndi Abimele ka itunu ira luwu mia i kota Sikeme ka Beti-Milo, ka po'ineeomo ipeluarako api inso i kota Sikeme ka Beti-Milo tumunuo i Abimele.”

²¹ Ka i'amba molai i Yota lumako i Be'ere, ka ipo'ia i ra'ai hangano doito ndi Abimele, pepaekompono atuu.

Pe'ewai ndi Abimele

²² Mansano otolu nta'u ipeparenta i Abimele ia nto Isaraeli,

²³ Ondae Ue Ala sumingkao pe'ewa i olodo i Abimele ka palili kota Sikeme, ranta mpalili i kota Sikeme atuu nami dompetenunu ndi Abimele.

²⁴ Nde kanandiomo lambahado a pitu pulu anano i Yeruba'ala tembalo ka reado pinopokonaiako ndi Abimele, pepaekompodo anu mepate iramo ka a mpalili kota Sikeme anu mokowalio mepate ira luwuno pepaekompono atuu.

²⁵ Palili kota Sikeme atuu mpontena mia tumowokio i punsuno mentorukuno ka ipomuru ira luwuno mia anu lumalo ira a nsala atuu. Mongkona atuu pinohaweako ndi Abimele.

²⁶ Kontongaano atuu haweomo i Ga'ala anano i Ebedi ka pepaekompono, mpelimba i kota Sikeme. Palili i kota Sikeme dompe'ala-alao.

²⁷ Melako iramo ia lere mpopumpu wua anggorodo, domelandao kai tepuro'i, ka do'amba mpogawe. Melako ira a raha mpelahumoaado, mpongkaa ka mpo'inu saru mentotonaao i Abimele.

²⁸ Motaeomo i Ga'ala anano i Ebedi, ”Isema ke i Abimele ka isema ke ontae to Sikeme, ranta ka to gagi atano? Nde nahi komba anano i Yeruba'ala atuu ka i Sebula, sarungkaruno, hori ira gagi atado to Hemori, amano to Sikeme. Tembio ke ka kita gagi atano?

²⁹ Ba mansa mia ia kota andio a ngkaeku, asalakono aku mepateo i Abimele.” Onaemo kai ewaio i Abimele, ipotae, ”Pokorosoo sorodadumu! Aiwamo!”

³⁰ Tempono i Sebula, topoparenta kota atuu, rumongeo pauno i Ga'ala anano i Ebedi, tedoa tekuda.

³¹ Onae montena mia lumako ndi Abimele i Aruma ka ipe'oliwi, ”I Ga'ala anano i Ebedi ka luwuno pepaekompono mehawe iramo i Sikeme ka imento'oriokoa motae ondae bula ira palili kota atuu umewaiko.

³² Onaemo, pelungkamo tempono da woongi, omue ka palili anu merongaakomu, ka pontowokimo ia mpada.

³³ Tisomo mo'oru, itempono saba mata oleo, asalakono kau sapoiomo kota atuu. Kontongaano onae saru palili anu merongaakono mpeluarako me'aropiko, weweuomo ndi onae kana anu pinokoweweumu.”

³⁴ Lumakoomo i Abimele saru luwuno palilino tempono wongi ka dompotowoki opaa ntia puu mpetea ndi Sikeme.

³⁵ Tempono i Ga'ala anano i Ebedi meluarako ka mentade i arono pewowa kota, meluarako mbo'u i Abimele ka palili anu merongaakono atuu inso a pontowokia.

³⁶ Mansano i Ga'ala kumitao palili atuu, motaeomo ndi Sebula, ”Kitao, hadio mia mpontindulu inso a punsu mentorukuno,” Sumangki i Sebula ndi onae, ”Atuu eo-eono mentorukuno, anu potaemu mia.”

³⁷ Motae mbo'u i Ga'ala, ”Kitao hadio mia mpontindulu te'inso ia torukuno Taburu Eresi, ka asa bawaa puu mpetea aiwa inso a nsala Keu Tarabanti Me'onenimi.”

³⁸ Sumangki i Sebula ndi onae, ”Kanandio, isua wiwimu anu motae: ’Isema i Abimele atuu, ranta kato megagi atano?’ Komba mia andiodo ke anu pinokongkodeimu? Lakomo, kau pe'iwaliako ira.”

³⁹ Ka i'amba i Ga'ala metewawa i arodo palili kota Sikeme, mpeteakono i Abimele.

⁴⁰ Sine i Abimele lumuluo, ka ipolai inso i arono. Hadio mia anu memate tumambole hawe a pewowano kota.

⁴¹ I Abimele mo'ia i Aruma, sine i Sebula sumaario i Ga'ala ka pepaekompono, ranta ka nahi dompokompo'ia i Sikeme.

⁴² Tisomono mia ia kota atuu melako i lere. Mansano atuu pinauako i Abimele,

⁴³ iwawa ira palilino, itia ira otolu ntia puu mpetea, ka dompontowoki i lere. Mansano kumita ira mia atuu mpeluarako inso i kota, lumakoomo sumapoio ka ipepate ira.

⁴⁴ I Abimele ka puu mpetea anu merongaakono mensapoio ka mpentorokio pewowano kota, sine orua puu mpetea mehano mesapoi ka mepate ira luwu mia anu mekongko a mpada.

⁴⁵ Aasa oleo i Abimele sumapoio kota atuu. Irontuo kota atuu ka ipepate ira mia i larono. Ka i'amba rumongka-rongkao kota atuu ka irawosiakono ohia.

⁴⁶ Rumongeo mongkona atuu, mpewinso iramo luwuno palili kota Menara-Sikeme ia aa i totono pelahumoa Ele-Beriti.

⁴⁷ Pinauako i Abimele, motae luwuno palili kota Menara-Sikeme mpepumpu iramo i ra'ai.

⁴⁸ Ka i'amba i Abimele ka luwuno palili anu merongaakono mporake a torukuno Salamona. I Abimele mo'ala uase, ka ipole ira sampa keu. Itandeo ka ipo'ahao, ka ipotaeako ira palilino anu merongaakono, ”Impomparipari meweweuo kana anu kinitamiu kuweweuomo!”

⁴⁹ Ka do'amba palili atuu pada pompole sampa keu ka domentondao i Abimele. Domenaao i wawo aa ka domentunuo aa atuu i wawo uludo mia atuu. Kanandiomo luwuno palili Menara-Sikeme domemate, bara'ura asa nsowu tama ka beine.

Mateno i Abimele

⁵⁰ Ka i'amba i Abimele lumako i Tebesi; ikaduo ka irontuo.

⁵¹ Sine hinao asa menara moroso i tongano kota, ka luwuno palili kota atuu, tama ka beine, mpolai ira i tu'ai. Domentondoo pewowa anu i bungkuno ka dompewuatako i wawono menara atuu.

⁵² Haweomo i Abimele ia menara atuu. Isapoio, ka mokompewinso rumangkuhio tondono menara atuu ta sumongkoo.

⁵³ Sine aasa beine modontai asa watu pogilia ia uluno i Abimele kai tepeha taku uluno.

⁵⁴ Mompari-pari moboio tetenaano anu mo'ini sangka peteano ka ipotae, ”Butao ponaimu ka upepate aku, kasihina paudo mia mongkona ongkue, ’Aasa beine mepateo’.” Ka i'amba tetenaano tumoboo ranta ka imate.

⁵⁵ Mansado mengkitao to Isaraeli motae mateomo i Abimele, melako iramo pada mpekule a mpo'iangaado.

⁵⁶ Kanandiomo Ondae Ue Ala mbaloo wineweuno i Abimele anu mosa'o ndi amano, onaemo pompepatea pitu pulu pepaekompono.

⁵⁷ Ka mbo'u luwuakoano wineweudo to Sikeme anu mosa'o dopokokonaako ira Ondae Ue Ala ndi ondae. Kanandiomo petotonaano i Yota anano i Yeruba'ala kumonai ira.