Puu Mpobitara 8 - Wunta Mempori

¹ Mpotae iramo to Eparai ndi Gideo, ”Hapa ke anu wineweumu atuu ndi omami! Tembio ka nahi upoboi kami, tempono ulako me'iwaliako ira to Midia?” Tedoa domentekudaakono.

² Sangkino ndi ondae, ”Hapamo lahi ke anu wineweuku ba ipinongkena saru anu wineweu miu? Nde komba moikoopo ke po'opuado tongku Eparai anu kopenduano sekono po'opua anggoro tongku Abieseri?

³ Ondae Ue Ala Dopeweengakonomo orua mokoledo to Midia atuu, i Oreba ka i Seebe, ia ngkaemu. Hapamo lahi ke anu hinaweku, ba pinongkena saru omiu?” Umari motae kanandio, menaa-naaomo tekudado ndi onae.

Tenangido to Midia, luwuno mokoledo pinepate

⁴ Mansano i Gideo hawe ia ngkoro Yarade, mesakiakoomo saru tolu etu mia anu merongaakono. Maupo memokendo iramo, kongkodo mpepolulu.

⁵ Ka i'amba motae a nto Sukoti, ”Poweeako iramo ba te'opia roti tiado puu mpetea anu tumonda aku, nde memokendo iramo. Kontongaaku lumuluo i Sebaha ka i Salamuna, mokoledo to Midia.”

⁶ Sine mesangki ira petewawa to Sukoti atuu, ”Nde ipokonangiomo ke i Sebaha ka i Salamuna, ranta kami mpoweeako ira roti sorodadumu?”

⁷ Motae i Gideo, ”Ba te'ingka Dowee aku i Ue i Sebaha ka i Salamuna a ngkaeku, aku beri-beriakono rui ka tolungo pada one koroimu.”

⁸ Melempaomo inso tahane lumako i Panueli, ka motae koa mbo'u kanandio a to Panueli, sine mesangki ira mia atuudo mengkena koa kana to Sukoti.

⁹ Motae mbo'u ndi ondae to Penueli, ”Ba da tuwu aku ba kupekule, aku rumongkao menara andio.”

¹⁰ Kontongaano atuu i Sebaha ka i Salamuna kongko i Karakoro saru bara'ura hopulu ka olima nsowu sorodadudo, luwuno sorodadu anu da mentuwu, luwuno mia inso a sabaano oleo. Sorodadu anu memate asa etu ka rua pulu nsowu mia, luwuno mpeponai.

¹¹ I Gideo lumako monsapoi montonda salado mia anu mpo'ia a ngkema i sabaano oleo Noba ka Yogobeha, ka inangi ira puu mpetea atuu, i tempono puu mpetea atuu merodo.

¹² I Sebaha ka i Salamuna molai, sine i Gideo mepolulu ka irakoo i Sebaha ka i Salamuna, orua ira mokoledo to Midia atuu. Luwuno puu mpetea atuu mpolai medoito.

¹³ Ka i'amba i Gideo anano i Yoasi mekule inso a mpeteaa, mesala ia porakea Heresi.

¹⁴ Irakoo asa mia mongura te'inso ia palili Sukoti. Mansano sinikeno, mia atuu moburiakono i Gideo needo petewawa ka mia motota'u i Sukoti, pitu pulu ka opitu mia hadiono.

¹⁵ Lumakoomo i Gideo tepohaweako ira mia Sukoti ka ipotae, ”Ondaemo ndio i Sebaha ka i Salamuna; hangano ondae imentata akumo ka impotae, ipokonangiomo ke i Sebaha ka i Salamuna atuu ranta ka kami moweeako ira roti a luwuno miamu anu memokendo atuu?”

¹⁶ Ipumpu ira mia memota'u i kota atuu, ka ipo'ala rui pada one ka tolungo, ka ibomboako ira mia Sukoti.

¹⁷ Menara Penueli irongkao mbo'u ka ipepate ira mia a kota atuu.

¹⁸ Ka i'amba mesikeno ndi Sebaha ka ndi Salamuna, ”Kana'umpe ira mia anu pinepate miu i Tabori atuu?” Mesangki ira, ”Mia atuudo kana omue, mengkana ira anano mokole.”

¹⁹ Ka i'amba motae i Gideo, ”Ondae atuu pepaekompoku, anado Ineku! A nee-Do i Ue anu tuwu, ba impo'inee ira mentuwu, nahi aku mepate komiu.”

²⁰ Motaeomo ndi Yetera anano anu aka, ”Lakomo, pepate iramo.” Sine mia mongura atuu nahi butao ponaino, hangano doito, nde onae da mongura.

²¹ Motaeomo i Sebaha ka i Salamuna, ”Aiwamo, omuemo koa mepate kami, nde kana miano, kanatuu koa mbo'u morosono.” Lumakoomo i Gideo, mepateo i Sebaha ka i Salamuna. Ka i'amba umalao peramba-ramba anu a we'uno untado.

I Gideo nahi behe gagi to poparenta

²² Ka i'amba mpotae iramo to Isaraeli ndi Gideo, ”Po'ineeomo omue parenta kami, omue, anamu ke ba ana uemu, nde omuemo anu tumolosi kami inso a ngkaedo to Midia.”

²³ Isangki ira i Gideo, ”Komba aku perenta komiu, kanatuu koa mbo'u anaku nahi ta parenta komiu, sine Ondae i Ue anu perenta komiu.”

Pokotompaano tinuwuno i Gideo

²⁴ Motae mbo'u i Gideo ndi ondae, ”Asa koa kumingki umemao ndi omiu: Ipada mpeweengakono ndi ongkue tole-tole anu pinomurumiu.” Iwali atuu lano mpetole-toleako ira wulaa, nde ondae to Isumaeli.

²⁵ Mesangki ira, ”A mawongkono aroa mami kami mpeweengakono.” Onaemo ka domewileo asa hawu, ka sompo-sompo mia mewunoakono tole-tole anu pinomuruno i wawono hawu atuu.

²⁶ Mobeano luwuno tole-tole wulaa anu inemano atuu asa nsowu pitu etu sikala wulaa, napi saru enu-enu, tole-tole ka sangka anu wungo-wungo, anu pinakedo mokole to Midia, ka enu-enu rante ia we'uno untado.

²⁷ Ka i'amba i Gideo moweweu asa epo lahumoa inso ia luwuakoano atuu, ka inaao i kotano, i Opara. I ra'ai luwudo to Isaraeli mpelahumoa, mpesombaio epo lahumoa atuu. Onaemo anu gagi sala leluno i Gideo saru pe'asa rahano.

²⁸ Kanandiomo to Midia domentenangi a to Isaraeli ka nahi dompokompe'ewa mbo'u. Rodoomo wita atuu pato pulu nta'u tehineno tempono i Gideo.

²⁹ Ka i'amba onae, i Yerubaala anano i Yoasi lumako ka mo'ia i rahano.

³⁰ Anano i Gideo anu tama pitu pulu, luwuno ana ngkoroino nde kombiano hadio.

³¹ Samburueno anu mo'ia i Sikemi me'ana mbo'u asa tama, ka ineeakono i Abimele.

³² I Gideo anano i Yoasi mate tempono moputeomo luwu wuuno. Onae kinaburu a mpekaburuano i Yoasi, amano, i Opara kotado to Abieseri.

³³ Mansano mate i Gideo, wali iramo mbo'u mpelahumoa to Isaraeli saru mentondao Baala ka mpesombaio Baala-Beriti.

³⁴ To Isaraeli nami dompewowolo Ira i Ue, Ue Alado, anu motola ira inso a ngkaedo luwuno iwali pehori-horido.

³⁵ Ondae nami dompopokitao pompehohawado ia tongku Yerubaala onaemo i Gideo, mototo luwuno wineweuno anu moiko, a nto Isaraeli.