Puu Mpobitara 7 - Wunta Mempori

I Gideo Sumapoi ira to Midia

¹ I Yerubaala, onaemo i Gideo, mewangu da mo'oru saru luwuno palili anu merongaakono. Mpekema ira umpeda mata uwoi Harodi; sine pekemaado to Midia te'alaako i asambalino utara, umpeda pongku More, i lembono.

² Mepau iramo i Ue ndi Gideo, ”Palili anu merongaakomu Kupehadioo lahi ba kupeweengako ira to Midia a ngkaedo. Kasi mansa to Isaraeli mpompelangka-langkai ndi Ongkue, ka dompotae: Kaeku ongkueku anu tumolosi aku.

³ Kanandio, pauako ira palili: Isema anu doito ka mondende, po'ineeomo ipekule, bintao mentorukuno Gilea.” Ka do'amba mpekule rua pulu ka orua nsowu mia inso a palili atuu ka hopulu nsowu mia mokoa anu tebinta.

⁴ Sine mepau Ira i Ue ndi Gideo, ”Palili atuu da hadio lahi. Tena ira mpetii a uwoi, i tu'ai Aku binikiakomu. Mia anu pinau-Ku ndi omue, ’Onaemo anu tamerongaakomu’, mia atuu ta lumako merongaakomu, sine mia anu pinau-Ku ndi omue, ’onaemo anu nahi ta lumako merongaakomu,’ mia atuu nahi ta lumako.”

⁵ Itena iramo i Gideo palili atuu mpetii a uwoi, ka mepau Iramo i Ue ndi onae, ”Sompo mia anu monsile'i uwoi kana dahu, pakosio, kanatuu koa mbo'u sompo mia anu menggolontu ba ta mo'inu.”

⁶ Mia anu monsile'i uwoi montambuako kaeno wawao a ngangano, hadiono tolu etu mia, sine palili anu mehano mpenggolontuu ira mpo'inu uwoi.

⁷ Ka i'amba pau-Do i Ue ndi Gideo, ”Aku tumolosi komiu ka meweengako ira to Midia ia ngkaemu telalo otolu etu mia anu mponsile'i uwoi atuu. Sine palili anu susua atuu moikoomo dompekule ia mpo'iangaado.”

⁸ Mia anu otolu etu ira atuu mpo'ala kaangado ka tawuwua inso a palili. Ka i'amba tumena ira to Isaraeli pada mpekule ia kemado, sine otolu etu mia atuu itena ira mpo'ia. Kemado to Midia mo'ia i totono, i lembono.

⁹ Ia wongi atuu mepau Ira i Ue, ndi onae, ”Pewangumo, petiimo sapoi ira ia kemado atuu, nde Kupeweengako iramo ia ngkaemu.

¹⁰ Sine ba doitoko metii i loane, petiimo saru i Pura, atamu, ia pekemaado atuu,

¹¹ ka u'amba perorongeakono hapa pinopaudo. Umari atuu ikomo mosia metii sumapoio kemado atuu.” Ka i'amba metii merongaakono i Pura, atano, hawe ia podagaia anu i arono ntu'u a mpekemaado.

¹² To Midia, to Amale ka luwudo mia anu te'inso i sabaano oleo atuu tesiarawo ira i lembono, kana kosume hadiono, ka untado nahi pinokodoa, kana one i wiwi ntahi hadiono.

¹³ Mansano i Gideo hawe i tu'ai, tekonai hinao asa mia montutulu mo'ipino ia walino, ipotae, ”Rongeo, mo'ipi aku, kukitao roti jelai anu bonggoli telundi a kemado to Midia. Mansano hawe a ngkema, irumpaio kema atuu ranta kai terongka ka telundi, kanatuumo iterongka kema atuu.”

¹⁴ Ka i'amba sumangki walino, ”Ndio asalakono ponaino i Gideo anano i Yoasi, to Isaraeli atuu. Dopeweengakonomo Ue Ala to Midia ka luwuno kema andio ia ngkaeno.”

¹⁵ Mansano rumongeo i Gideo mo'ipi atuu itinutuluako saru pengkonaano, menggolontuuomo mesomba. Ka i'amba mekule ia pekemaado to Isaraeli, ka ipotae, ”Pewangumo, nde Ondae i Ue Dopeweengakonomo pekemaado to Midia ia ngkaemu.”

¹⁶ Itia ira mia anu otolu etu atuu gagi otolu ntia puu mpetea, ka ipoweeako ira tawuwua ka kusi mooa saru pansona i larono kusi atuu.

¹⁷ Ipotaeako iramo, ”Imengkita aku ka imeweweuo kana anu wineweuku. Ba hawe akumo itompano pekemaa atuu, imeweweuomo kana anu wineweuku.

¹⁸ Ba ongkue ka luwuno mia anu tumonda aku puurio tawuwua, ka omiu asalakono imempuurio koa mbo'u tawuwua liimbu luwuno pekemaa atuu, ka impebooli: ’A nee-Do i Ue ka neeno i Gideo!’ ”

¹⁹ I Gideo ka anu asa etu mia anu tumondao hawe ia tompano pekemaado atuu itempono pompu'uano po'eua daga ntonga wongi. Ka do'amba mempuurio tawuwua ka domempehao kusi a ngkaedo.

²⁰ Kanatuumo otolu ntia puu mpetea atuu mempuurio tawuwua ka mempehao kusi, manggalido mpo'ini pansona ka ikoanado tawuwua anu ta pinuuri, ka dompebooli, ”Ponai a nee-Do i Ue, ka a neeno i Gideo!”

²¹ Kontongaano atuu kongkodo mpentade a mpo'iangado lumimbuo pekemaa atuu, luwudo sorodadu iwali mpolai, ka mpebooliki ira.

²² Itempono otolu etu mia atuu mpopuuri tawuwua, ia luwuno mpekemaa atuu Doweweuo i Ue ponaido ipo'aroo ia walino. Puu mpetea atuu mpolai ira hawe i Bete-Sita, te'aro i Serera hawe i wiwino Abeli-Mehola umpeda i Tabati.

²³ Umari atuu mentinena iramo to Isaraeli inso a tongku Napatali ka a tongku Asieri ka inso a luwuno tongku Manase, ka domelulu ira to Midia atuu.

²⁴ I Gideo montena mbo'u mia lumako a luwuno mentorukuno Eparai ka ipe'oliwi, ”Impetiimo umaropi ira to Midia, ka impetorokio luwuno korono hawe i Bete-Bara, ka hawe i Koro Yarade.” Luwudo to Eparai mentinena ira ka dompentorokio luwuno korono hawe i Bete-Bara, ka hawe i Koro Yarade.

²⁵ Domerakoo orua mokole to Midia, i Oreba ka i Seebe. I Oreba pinepate ia torukuno watu Oreba ka i Seebe pinepate ia pontirisaa anggoro Seebe. Dolulu ira to Midia atuu, ka i'amba uluno i Oreba ka i Seebe domewawao ndi Gideo i asatowano koro Yarade.