Puu Mpobitara 6 - Wunta Mempori

Tepoboino i Gideo gagi puu Mpobiara

¹ Sine to Isaraeli mpoweweu anu mosa'o i aro-Do i Ue. Onaemo Ondae i Ue meweengako ira ia ngkaedo to Midia, opitu nta'u tehineno,

² pabawado to Midia a nto Isaraeli ko moro-morosono. Hangano medoito ira ia to Midia atuu, to Isaraeli mpoweweu ira pewuniado a mentorukuno, onaemo kunepo ka bente.

³ Ba me'umari iramo to Isaraeli mpopaho, me'aiwa iramo to Midia, to Amale ka mia anu nte'inso ia sabaano oleo, melako sumapoi ira.

⁴ Mpoweweu iramo kema i witado, ka domeropuo wua pinopaho hawe umpeda i Gasa. Nahi dompobinta kaanga hapamokoa i Isaraeli, ka bimba, sapi, ke kalide.

⁵ Mia atuudo me'aiwa saru pinotuwu ka kemado kana kosume anu tedoa hadio. Hadiodo saru untado nahi pinoko doa. Hawedo i wita atuu ira mpokoropu ira.

⁶ To Isaraeli tedoa ira memarasai, hangano wineweudo to Midia atuu. Ka do'amba to Isaraeli mpebooli ndi Ondae i Ue.

⁷ Mansado to Isaraeli mpebooli ndi Ondae i Ue, hangano to Midia atuu,

⁸ Ondae i Ue montena nabi ia nto Isaraeli anu mompauako ira, ”Kanandiomo pau-Do i Ue, Ue Ala to Isaraeli: Ongkuemo anu wawakomiu mpeluarako te'inso i Masiri ka anu wawakomiu mpeluarako inso a tepe'ataamiu.

⁹ Kupotola komiu inso ia to Masiri ka inso ia ngkaedo luwuno mia anu mokomarasai komiu, ka Kusaari ira inso i aromiu ka witado Kupeweengakono ndi omiu.

¹⁰ Kupauomo ndi omiu: Ongkuemo Ue, Ue Alamiu. Sii mpesomba a anu pinesombaido to Amori, anu witado impo'iangario. Sine omiu nahi mperorongeakono pau-Ku atuu.”

¹¹ Ka i'amba hawe Mala'eka-Do i Ue, mentoro ia totongkeu tarabanti i Opara, anuno i Yoasi, to Abieseri atuu. I Gideo ka anano monsesa gandu a mpotirisaa anggoro, kai tewuni te'inso a nto Midia.

¹² Mala'eka-Do i Ue mepopokita ndi onae ka Dopepau kanandio, ”Ondae i Ue kumongkomiko, o tadulako anu mosia.”

¹³ Sumangki i Gideo ndi Ondae, ”Tabeamiu, Ue, ba Ondae i Ue kumongkomi kami, tembio ka luwuakoano andio umalu kami? Isua ke luwuakoano wineweu-Do anu kinohali-haliako mami, kana dotutuluakami ue mpu'u mami ndi omami, dompotae: Nde komba Ondae i Ue ke anu kumongkomi kita meluarako te'inso i wita Masiri? Sine kanandio Ondae i Ue Dobinta kami ka Dopeweengako kami ia ngkaedo to Midia.”

¹⁴ Mewolili Iramo i Ue ka Dopepauakono, ”Lakomo montonda morosomu ka upotola ira to Isaraeli inso ia ngkaedo to Midia. Nde komba Ongkue ke anu tumenako?”

¹⁵ Sine sangkino ndi Ondae, ”Tabea Miu, Ue, saru hapa ke ba kutolosiako ira to Isaraeli? Ikitaomo, tongkuku anu lalu kodei i olodo tongku Manase ka ongkue andio mia anu lalu mongura i rahado amaku.”

¹⁶ Mepau Iramo i Ue ndi onae, ”Aku kumongkomiko, ranta kau nangi ira to Midia kana anu asa mia koa.”

¹⁷ Sumangki i Gideo ndi Ondae, ”Ba mohawe aku pempohohawa montonda pongkita Miu, Ipowee akumo petondoni motae Omiumo anu mepau ndi ongkue.

¹⁸ Sikomba Ilako te'inso i ndi'ai, ranta ka kuhawe mowawa pesombaku ndi Omiu ka numaao i aro-Miu.” Pau-Do, ”Aku kongko mo'ia ndi'ai ranta ka upekule.”

¹⁹ Mewinsoomo i Gideo i larono, isumbeleo asa ana bembe ka inahuo ka ipoweweu roti anu nahi peragi inso ia asa efa tarigu. Inaao bau atuu ia baki ka uwoino ia ngkuro, iwawao i aro-Do itotono keu tarabanti, ka ipatindao.

²⁰ Mepau Ira Mala'eka-Do i Ue Ala ndi onae, ”Alaomo bau ka roti anu nahi peragi atuu, naaomo a wawo watu andio, tawao uwoino.” Kanatuumo iweweuo.

²¹ Mala'eka-Do i Ue tumasio tuko anu ia ngkae-Do, untuno dumanggio bau ka roti atuu. Melangaomo api inso ia watu atuu tumunuo bau ka roti ranta kai pingko. Umari atuu moliuomo Mala'eka-Do i Ue inso ia pongkitano.

²² Ito'oriomo i Gideo, motae ondae Mala'eka-Do i Ue, ka ipotae, ”Masola akumo, o Ue Ala! Nde kutepoaroako Iramo Mala'eka-Do i Ue.”

²³ Sine Pau-Do i Ue ndi onae, ”Tekaduduikomo! Si doito, nahi komate.”

²⁴ Onaemo ka i Gideo mowangu pontunua pesombaa i ra'ai tia-Do i Ue ka ineeakono: Ondae i Ue pu'uno manangaia. Pontunua pesombaa atuu da kongkoo mpiha hawe tempo andio ndi Opara, i kotado to Abieseri.

²⁵ Wongi koa atuu Ondae i Ue mepauakono, ”Alaomo asa sapi lakino amamu, sapi laki ko'orua, anu opitu nta'u tinuwuno. Rongkao pesombaa Baala amamu, ka tuehio karuno pelahumoaa anu ihorino.

²⁶ Wanguomo pontunua pesombaa tia-Do i Ue, Ue Alamu, tepo'api moiko ia mantandeano bente atuu, ka u'amba umalao sapi laki anu ko'orua hieno ka pesombaakonomo, pesomba tinunuako keu karuno pelahumoaa anu tinuehimu atuu.”

²⁷ Ka i'amba i Gideo mowawa atano hopulu ira ka iweweuo kana pau-Do i Ue ndi onae. Sine hangano idoitoako ira pe'etuno ka luwuno mia a laro kota atuu, komba iweweuo tempono meene, sine itempono woongi.

²⁸ Da mo'oru ntu'u, mansado mia a kota mpewangu, domengkitao pontunua pesombaa Baala atuu rinongkaomo, karuno pelahumoaa anu i horino tinuehiomo, ka sapi laki ko'orua pinesombaakoomo i wawono pontunua pesomba anu winangu atuu.

²⁹ Pada iramo ntepopau, ”Isema ke anu moweweu andio?” Mansado memparesao ka pesisikeno, mpotae iramo, ”I Gideo anano i Yoasi, onae weweuo luwuakoano andio.”

³⁰ Umarino atuu mpotae iramo luwu mia i kota ndi Yoasi, ”Wawao anamu meluarako! Asalakono ta mate, hangano irongkaomo pontunua pesombaa Baala, ka ituehio karuno pelahumoaa anu i horino.”

³¹ Sine sumangki i Yoasi ia luwuno mia anu lumimbuo atuu, ”Komiu me'ala-alaakono Baala? Ke komiu mentulungio? Isema anu umala-alaakono Baala, ta pinepate napi mo'oru. Tewala Baala atuu Ue Ala, po'ineomo kai peteahakono koroino onaeno, umarino pontunua pesombaa rinongka.”

³² Oleo koa atuu i Gideo domeneeakono mia Yerubaala, hangano dompotae, ”Po'ineeomo i Baala kumorahakono koroino umewaio i Gideo, hangano onae rumongkao pontunua pesombaano atuu.”

I Gideo mo'ema pontodoni

³³ Luwuno to Midia ka to Amale ka luwudo mia inso i sabaano oleo mpepumpu iramo. Mpesakiako iramo ka mpoweweu kema i lembono Yisereeli.

³⁴ I tempo atuu i Gideo bukeako Penaa-Do i Ue ipuuriomo tawuwua ka iteahako ira to Abieseri tumondao.

³⁵ Montena mbo'u mia a luwuno tongku Manase ka iteahako ira tumondao. Montena mbo'u mia lumako ia tongku Asere, Sebulo ka Napatali, ka luwuno tongku andio tepo'asaako ira.

³⁶ Ka i'amba motae i Gideo ndi Ondae Ue Ala, ”Ba Komiu tumolosi ira to Isaraeli mesala ndi ongkue, kana anu pinau Miu,

³⁷ akumo monaa wulu bimba anu ginonti i wawono ponsesaa. Tabulu butu iwawono wulu bimba anu ginonti atuu hinao tontoru, sine a luwuno wita i tu'ai kongkono motu'i, akumo tumo'orio nine Komiu tumolosi ira to Isaraeli mesala ndi ongkue, kana anu pinau Miu.”

³⁸ Ka gagiomo kanandio. Tisomono mo'oru ipewangu, ka ipuro'io wulu bimba anu ginonti atuu. Tontoru anu pinisino inso a wulu bimba anu ginonti atuu, buuke asa tonde.

³⁹ Motaeomo i Gideo ndi Ondae Ue Ala, ”Si tedoa tumekudaakune, ba aku mepau mbo'u, pohonamo koa ndio. Po'ineeomo tepohonapo mbo'u kuwali mo'arahako mo'ala wulu bimba anu ginonti atuu, kuporaraa matao butu wulu bimba atuu anu motu'i, sine ia luwuno wita atuu hinao tontoru.”

⁴⁰ Kanandiomo Doweweuo Ue Ala ia wongi atuu: butu wulu bimba anu ginonti atuu anu motu'i, sine ia luwuno wita atuu hinao tontoru.