Puu Mpobitara 5 - Wunta Mempori

Penanido i Debora ka i Bara

¹ I oleo atuu menani iramo i Debora ka i Bara anano i Abinoa:

² Nde pongkiarido i Isaraeli iramo mpetea, nde tongku atuu dompeweengakono koroido ia po'eheno aroano, unde-unde Ira i Ue!

³ Imerongeomo, o luwuno mokole! Imenta'oo biri miu, o luwumiu petewawa! Aku mingki menani, aku mingki menani tia-Do i Ue, aku mingki menani po'unde-unde tia-Do i Ue, Ue Alado to Isaraeli.

⁴ O Ue, tempono Ipelungka te'inso i Seiri, tempono Ipelempa te'inso i wita Edomi, leluomo tolino, telompa langi, ka seru te'i'iti uwoino;

⁵ luwuno torukuno melelu, i aro-Do i Ue, tamoako Sinai, i aro-Do i Ue, Ue Alado Isaraeli.

⁶ Itempono i Samaga anano i Ana, itempono i Yaeli, mia mpebalu-balu nami hina mbo'u, mia anu mpelempa mpontonda sala anu melengku-lengkuako.

⁷ Inia i Isaraeli boni-boni, o boni-boni, ranta ongkue, i Debora, hawe, hawe kana ine i Isaraeli.

⁸ Itempono mia mpobiniki anu pinesombai wo'ohu, mpetea ia mpewowano inia. Menteeano, maupo te'asa kanta ba kansai nahi tengkita i olono pato pulu nsowu mia i Isaraeli.

⁹ Aroaku tetutu ia luwuno petewawa Isaraeli, ndi ondae anu mpeweengakono koroido mpo'angga mpena i olono tongku atuu. Unde-unde Ira i Ue!

¹⁰ Omiu, anu mpesawi a ngkalide waino anu mopute, omiu, anu mpentoro ia ompeo anu tekosi, ka omiu, anu mpelempa ia nsala, tutuluomo mongkona atuu!

¹¹ Ia luwuno pontambua uwoi, i olono anu suarado anu mpontia uwoi, i ra'aimo mia mpenaniako anu wineweu-Do i Ue anu moleo, wineweu-Do anu moleo ia luwuno mia-Do i inia Isaraeli. Itempo atuu mpetii ira bawaa-Do i Ue ia tondo mpewowano inia.

¹² Pewangumo, pewangumo, Debora! Pewangumo, pewangumo, penaniakonomo asa penani! Pentademo, Bara! Ka wawa iramo mia tinabuamu, o anano i Abinoa!

¹³ Mpetii iramo luwuno anu langkai po'iado anu mentola, bawaa-Do i Ue metii merongaakune kana pongkiari.

¹⁴ Inso i Eparai dome'aiwa i lembono, mentondako, o tongku Benami, saru sorodadu miu. Inso i Makahi mpetii ira luwuno petewawa inso i Sebulo luwuno anu mpowawa tuko petewawa.

¹⁵ Luwuno petewawa i Isakara kumongkomio i Debora, kana i Isakara, kanatuumo i Bara, domentondao melako i lembono. Sine i olodo tongku Rube hadio pontimbanga i laro aroado.

¹⁶ Tembio ka ukongko mpiha mentoro a mpada pompakambia momperorongeako unino siloli pompoboi pinotuwu? I olono tongku Rube hadio pontimbanga i laro aroado!

¹⁷ To Gileadi kongko mpo'ia mpiha i asatowano koro Yarade; ka tongku Dani, tembio ka dompo'ia umpeda a ngkapala? Tongku Asieri mbo'u mpentoro iwiwi ntahi, kongkodo mpiha mpo'ia i kolo-kolono.

¹⁸ Sine to Sebulo onaemo tongku anu mosia meta'oakono penaado, kanatuukoa mbo'u tongku Napatali, a mantandeano tonga mpada.

¹⁹ Luwuno mokole hawe mpetea, i tempo atuu luwuno mokoledo to Kana'a mpetea i Tanaka, umpeda mata uwoi Megido, sine maupo salaka nahi dompokomporontu.

²⁰ I langi mpetea ira anano wula, a lumeleano dompeteaakono Sisera.

²¹ Koro Kisoni telele mompu'u i ndi'ipua, korono atuu mompolomo iwali, Lakomo tompaano morosomu, o penaaku!

²² Tempo atuu teronge ngara mpelempa, pompalari iramo ngarado, pompalari ira tedoa magasi.

²³ ”Totonaao kota Mero!” Pau-Do Mala'eka-Do i Ue, ”Totonaaki ira palilino, hangano nahi dome'aiwa tumeahako Ira i Ue, tumeahako Ira i Ue i olodo luwuno pongkiari.”

²⁴ Rinonsoomo i Yaeli, kombiano i Heberi, to Keni atuu, lalua sekono beine anu susua, rinonsoomo onae, laluaopo sekono luwuno beine anu ilarono kema.

²⁵ Mia atuu mo'ema uwoi, sine susu anu iwineeako, tabano susu i patindaakono a ntonde ulea mokole.

²⁶ Kaeno mo'ala pandora, kae ngkoana mo'ala palu-palu, ipalukio i Sisera, ipeha-pehao uluno, tepuro ka lompahi a nipi-nipino.

²⁷ Tebangku mia atuu a olono karuno, tedonta mate tepombole, tebangku ka tedonta a olono karuno, ia tebangkuano, i ra'aimo mia atuu imate.

²⁸ Inso ia pentangoa ineno i Sisera mentango, ka ipebooli inso i wawono, ”Tembio karetano naapo koa i hawe? Tembio karetado napi teronge?”

²⁹ Anu lalu pande i olodo ana beine ulea mokole sumangkio, ka onae koa mbo'u wali pauo, pauno onaeno,

³⁰ ”Komba ondae ke mpohawe sangka pinomuru ka dompetiatiao, asa ke orua ana beine sompo sorodadu, sangka pinomuru anu tekokosi tiano i Sisera, sangka pinomuru sinula hadio sorano, sangka pinomuru orua lewe sinula hadio sorano tiano we'uku!”

³¹ Kanandiomo domeropu luwu iwali-Miu, o Ue! Sine mia anu mehohawa Ira kana sabano oleo ia marambaano. Sintuwuomo wita atuu pato pulu nta'u tehineno.