Puu Mpobitara 4 - Wunta Mempori

I Debora ka i Bara

¹ Mansano mate i Ehu, to Isaraeli mpoweweu iramo mbo'u anu mosa'o i aro-Do i Ue.

² Ka Ondae i Ue meweengako ira a ngkaeno i Yabi, mokole to Kana'a, anu meparenta i Hasoro. Tadulako sorodadudo, onaemo i Sisera, anu mo'ia i Haroseti-Hagoimi.

³ Mpebooli iramo to Isaraeli ndi Ondae i Ue, hangano hinao osio etu kareta labuno i Sisera ka ipokonsii ira to Isaraeli rua pulu nta'u tehineno.

⁴ I tempo atuu i Debora kombiano i Lapido gagi nabi beine, moparenta gagi puu mpobitara a nto Isaraeli.

⁵ Onae wela mentoro a toto ngkeu kuruma Debora i olono Rama ka Beteli a mentorukuno Eparai, ka to Isaraeli wela ira mehawe mpo'ema moleoa.

⁶ Metenaomo moboio i Bara anano i Abinoa inso i Kadesi i wita Napatali, ka ipotaeakono, ”Nde Ondae i Ue, Ue Alado to Isaraeli, meparenta kanandio: Imelakomo i torukuno Tabori wawa ira hopulu nsowu mia inuleno i Napatali ka inuleno i Sebulo merongaakomu,

⁷ ka Aku weweuo i Sisera, tadulako sorodadudo to Yabi, saru luwuno kareta ka sorodaduno lumako umaropiko, i Korono Kisoni, ka Aku meweengakono ia ngkaemu.”

⁸ Sumangki i Bara ndi Debora, ”Tewala lumakoko ongkue mbo'u aku lumako, sine ba nahi ulako ongkue mbo'u nahi aku lumako.”

⁹ Motae i Debora, ”Moiko, aku metonda! Butumokoa, nahi komohawe pompelangkai ia pelempaamu andio, nde Ondae i Ue ta mewengakono i Sisera ia ngkaeno asa beine.” Mentadeomo i Debora merongaakono i Bara lumako i Kedesi.

¹⁰ Ipumpu ira i Bara tongku Sebulo ka tongku Napatali melako i Kedesi. Hopulu nsowu mia anu tumondao. Kanatuu koa mbo'u i Debora lumako saru onae.

¹¹ Sine i Heberi, to Keni atuu, lumako tensia inso ia tongku Keni, inso ia luwuno anano i Hoba oleono i Musa. Ka wela melimba-limba mowangu kema hawe ia ngkeu tarabanti i Sa'ananima umpeda i Kedesi.

¹² Mansano pinaleleako i Sisera, motae i Bara anano i Abinoa lumako i torukuno Tabo,

¹³ ipumpuo luwuno karetano, hadiono osio etu kereta labu, ka luwuno sorodadu perongano, inso i Harose-Hagoimi tetutu i Korono Kisoni.

¹⁴ Motaeomo i Debora ndi Bara, ”Pepatindamo, oleo andio Ondae i Ue mewengakono i Sisera ia ngkaemu. Ondae i Ue melempa i aromu.” Metiiomo i Bara inso ia Torukuno Tabori ka hopulu nsowu mia tumondao.

¹⁵ Ondae i Ue mokotensiarawoo i Sisera ka luwuno karetano ka luwuno sorodaduno hangano mata ponai i arono i Bara. I Sisera metii inso ia karetano molai.

¹⁶ Ilulu ira i Bara kareta ka sorodaduno atuu hawe i Harose-Hagoi, ka luwuno sorodaduno i Sisera memateako hangano mata mponai; nahina anu tuwu mau te'asa mia.

¹⁷ Sine i Sisera melulu molai hawe a ngkemano i Yaeli, kombiano i Hebe, to Keni. Nde mesambe'e ira i Yabe, mokole Hasoro ka pe'etuno i Hebe, to Keni.

¹⁸ Meluarako i Yaeli tepohaweakono i Sisera, ka ipotae, ”Itetoro ueku, ipewinso. Sii doito!” Tetoro i Sisera a ngkemano beine atuu ka itutuwiakono hawu.

¹⁹ Motae ia beine atuu, ”Powee aku uwoi tedei, mokoranga aku.” Ka i'amba beine atuu umungkahio ponaapa susu, ka ipoweeakono ka ipo'inu ka ikolimbuo mbo'u.

²⁰ Ipotae mbo'u a beine atuu, ”Pentade i arono pewowano kema, ka ba hinao mia hawe mesikeno ndi omue: Hinao mia ke ndi'ai? Sangkio: Nahina.”

²¹ Sine i Yaeli kombiano i Hebe, mo'ala pandorano kema ka palu-palu, ka i'umpedaakono meningka-ningka. Ipandorao ia nipi-nipino i Sisera lompahi hawe a wita, kontongaano moturi roodo hangano mokendo, ka mateomo i Sisera.

²² Tempono atuu haweomo i Bara anu lumuluo i Sisera. Melurakoomo i Yaeli ka ipotaeakono, ”Aiwa, ka kutisoakomu mia anu inungkemu atuu.” Ka i'amba mewinsoomo i Bara i larono ka ikitao i Sisera mate kombole-mbole saru pandora ia nipi-nipino.

²³ Kanandiomo i oleo atuu Ondae i Ue Ala numangio i Yabi, mokole to Kana'a i arodo to Isaraeli.

²⁴ Pabawado to Isaraeli komoro-morosono dumansoo i Yabi, mokole to Kana'a ranta ka dompepateo i Yabi, mokole to Kana'a atuu.