Puu Mpobitara 3 - Wunta Mempori

Tongku anu pino'inee mo'ia i Kana'a

¹ Ndiomo luwuno tongku anu pino'inee-Do i Ue mpo'ia, mesala ndi ondae Do'arahako ira to Isaraeli atuu luwuno anu nahi pembasaio peteaa i Kana'a,

² ka luwuno inuledo to Isaraeli anu nahi pembasaio peteaa anu laloomo, mempinaguru ira mpetea:

³ olima ira mokole kota to Pilisiti, luwudo to Kana'a, to Sido ka to Hewi, anu mpo'ia a mentorukuno Libano, inso i torukuno Baala-Heremoni hawe ia nsala anu tetutu i Hama.

⁴ Mekongko ira mpiha, ka mesala ndi ondae, to Isaraeli inarahako ka iteto'ori ke domerongeokoa parenta anu Doweeako ira i Ue ia ue mpu'udo mesala ndi Musa.

⁵ Kanandiomo to Isaraeli atuu mpo'ia ia olodo to Kana'a, to Heti, to Amori, to Perisi, to Hewi ka to Yebusi.

⁶ To Isaraeli mpo'ala ira ana beinedo gagi kombiado ka dompeweengakono ana beinedo ia ana ntamado mia atuu, ka dompesomba a lahumoado.

I Otinieli

⁷ To Isaraeli mpoweweu anu mosa'o i aro-Do i Ue, domengkolupe Ira i Ue, Ue Alado, ka mpesomba ia luwuno Bala ka luwuno Asera.

⁸ Onae pu'uno ka itensila tekuda-Do i Ue a nto Isaraeli, onae ka Do'asa ira a nto Kusani-Risataimi, mokole Arami-Mesopotamia. Ka to Isaraeli mpetuundu ira ndi Kusani-Risataimi oalu nta'u tehineno.

⁹ Ka do'amba mpebooli to Isaraeli ndi Ondae i Ue, onaemo pu'uno Ondae i Ue moweeako ira asa mia pontolosi a nto Isaraeli anu motola ira, onaemo i Otinieli, anano i Kenasi, uaino i Kalebi.

¹⁰ Penaa-Do i Ue pabawaio ka igagi petewawado to Isaraeli. Lumakoomo metea, ka Ondae i Ue mewengakono i Kusani-Risataimi, mokoledo to Arami, onaemo ka inangio i Kusani-Risataimi.

¹¹ Rodoomo wita atuu pato pulu nta'u tehineno. Ka i'amba mate i Otinieli anano i Kenasi.

I Ehu

¹² Sine to Isaraeli da mpoweweu ira mbo'u anu mosa'o i aro-Do i Ue. Ondae i Ue weweuo i Egelo, mokole to Moabi, pabawai ira to Isaraeli, nde mpoweweu ira anu mosa'o i aro-Do i Ue.

¹³ Mokole andio popandei ira inuleno Amoni ka inuleno Amale gagi pe'asano. Melako iramo sumapoi ira ka dontenangi to Isaraeli. Kota Keu Kuruma dompentorokio.

¹⁴ Hopulu ka oalu nta'u tehineno to Isaraeli mpetenunu ndi Egelo, mokole to Moabi.

¹⁵ Ka do'amba to Isaraeli mpebooli ndi Ondae i Ue, ka Ondae i Ue moweeako ira asa mia pontolosi onaemo i Ehu, anano i Gera, to Benami, onae mia manggali. I Ehu gagi mia i olono to Isaraeli mo'oliwi peki'ue ndi Egelo mokole to Moabi.

¹⁶ Ka i Ehu moweweu ponai montaso mompombali, anu ondauno asa hiku, iwunio a laro lembano, ia puu mpa'ano anu koana.

¹⁷ Ka i'amba mewengakono peki'ue ndi Egelo, mokole to Moabi. I Egelo asa mia anu tedoa mewalo.

¹⁸ Umarino i Ehu meweengakono peki'ue atuu, itena ira mia mpowawa peki'ue atuu ka dompekule.

¹⁹ Sine, onae menaa-naa ia watu-watu anu pina'o, umpeda i Giliga, ka i'amba mekule a mokole. Motaeomo, ”Hinao pe'oliwi rahasia anu kuwawaa komiu, o mokole.” Motae i Egelo, ”Siipo'ari!” Luwudo mia anu mpentade i tu'ai mpeluarako.

²⁰ Mewinsoomo i Ehu tepohaweakono, tekonai mentoro asa-asano ia bolongko pe'angi-angiano. Motaeomo i Ehu, ”Hinao pau-Do Ue Ala anu winawaku ndi omiu, o mokole.” Ka i'amba mentadeomo te'inso ia pentoroano.

²¹ Ka i'amba kae manggalino i Ehu butao ponaino te'inso ia puu pa'a koanano ka ipetoboakono ia kompono mokole.

²² Gaagi sekonopo tangkeno ponai mewinso saru matano. Taba kompono tumutuwio mata ponaino, nde ponai atuu nahi butao inso ia kompono mokole. Ka i'amba meluarako ia pewowa i bungkuno.

²³ Kanatuumo i Ehu, hawe ia tambino. Tondono bolongko anu i wawono ikunsio inso i bungkuno.

²⁴ Da iaopo ipeluarako mehawe iramo atano mokole kumitao, sine bolongko anu i wawono kinunsi. Ka dompotae, ”Bara'ura tekonai lumako te'eme i bungkuno pe'angi-angiano!”

²⁵ Domensisikorio ranta ka domebulalingo, sine ondae mokole nahi dohori umungkahio tondono bolongko anu iwawono atuu. Ka do'amba mpo'ala kunsi, dome'ungkahio tondo, domengkitaomo uedo mate tepombole ia horo.

²⁶ Itempono nahi dompopari-pari, i Ehu molai, telalo ia watu pina'o, molai lumako i Seira.

²⁷ Mansano hawe i ra'ai a mentorukuno Eparai ipuurio tawuwua, ka do'amba mpentii to Isaraeli saru onae inso a mentorukuno atuu, ka onae i arono.

²⁸ Motaeomo ndi ondae, ”Imentonda aku, nde Ondae i Ue Dopewengakonomo iwalimiu to Moabi atuu ia ngkaemiu.” Mpetii iramo mentondao, domerontuo pesakiakoa i koro Yarade, tetutu i Moabi. Nahina maupo te'asa mia dompo'ineeo mesakiako.

²⁹ Itempo atuu mia pinepatedo bara'ura ta tehopulu nsowu mia te'inso i Moabi, luwudo mia anu moroso ntu'u; maupo te'asa mia nahina tepotola.

³⁰ Oleo atuu to Isaraeli domenangi ira to Moabi, rodoomo wita atuu, halu pulu nta'u tehineno.

I Samaga

³¹ Umarino onae, petewawa lembuino i Samaga anano i Anata; Ipepate ira nomo etu to Pelisiti mompake tuko pontamba sapi. Kanatuumo ikadudui ira to Isaraeli.