Puu Mpobitara 21 - Wunta Mempori

Suku Benami anu da mentuwu

¹ To Isaraeli mpesumpa iramo i Misipa, kanandio, ”Maupo te'asa mia inso ndi ontae nahi ta hina meweengakano anano beine a nto Benami gagi kombiano.”

² Itempono tongku atuu hawe i Beteli, ka mpo'ia i ra'ai i aro-Do i Ue, Ue Ala ranta ngkiniwia, mpengese ira tedoa meroku,

³ dompotae, ”Tembio, O Ue, Ue Alado to Isaraeli, ka igagi kanandio i olono tongku Isaraeli, onaemo oleo andio asa suku inso ia tongku Isaraeli tetadi?”

⁴ Tisomono da mo'oru tongku atuu mpowangu iramo meda mpotunua pesomba i tu'ai, ka dompompesombaako pesomba tinunu ka pesombaa tetolosia.

⁵ Ia tempo atuu mpontae iramo to Isaraeli, ”Isemake anu te'inso ia luwuno to Isaraeli anu nahi pontonda bawaa andio mesomba ndi Ondae i Ue?” Nde mpesumpa iramo a menteano ntu'u mongkona mia anu nahi petonda mesomba ndi Ondae i Ue i Misipa, kanandio, ”Asalakono ta hinuku mate.”

⁶ To Isaraeli anu mehohawa ira to Benami, pepaekompodo atuu, dompotae, ”Oleo andio hinao asa suku tetadiomo inso a nto Isaraeli.

⁷ Hapake anu ta wineweuto a mia anu tebinta atuu ba tompo'ungkeako ira kombiado, nde ontae mpesumpa kitamo a nee-Do i Ue nine nahi kita mpoweeako ira maupo te'asa ana beineto gagi kombiado?”

⁸ Onae ka dompotae, ”Inso ia luwuno suku Isaraeli hinaoke anu nahi hawe mesomba ndi Ondae i Ue i Misipa?” Tengkitaomo nine anu te'inso a palili Yabesi-Gilea nahina maupo te'asa mia anu hawe ia pekemaado bawaa atuu.

⁹ Pinaresaomo hadiono tongku atuu, mengkaaomo nahina maupo te'asa mia anu hawe te'inso ia palili Yabesi-Gilea.

¹⁰ Onaemo inso a tepumpua atuu, mpontena ira hopulu ka orua nsowu mia anu moroso ntu'u mentinena ira kanandio, ”Imelakomo, mpeteaako ira palili Yabesi-Gilea mompake mponai, kanatuu koa mbo'u luwuno beine ka nanaote.

¹¹ Weweuomo kanandio: Butu luwuno tama ka luwuno beine anu horiomo moturi saru tama i ropu ira.”

¹² Mpohawe ira i olodo to Yabesi-Gilea pato etu anu da ana beine, anu napi dohori mpoturi saru tama. Onaemo ka luwuno ana beine atuu dowawa ira ia mpekemaado i Silo, wita Kana'a.

¹³ Umari atuu luwudo bawaa atuu mpontena mia mpowawa pe'oliwi a inuleno i Benami anu mo'ia i torukuno watu Rimoni, ka ipauako ira manangai ndi ondae.

¹⁴ Itempo atuu mpekule iramo suku Benami ka domewineeako luwuno beine anu mempino'inee tuwu inso i olodo beine Yabesi-Gilea, sine napi sompo hadiono.

¹⁵ Nde tongku atuu dopehohawa iramo suku Benami, hangano Ondae i Ue moweweu teposisalaa i olodo luwuno suku Isaraeli.

¹⁶ Ka do'amba mpotae mia memota'udo bawaa atuu, ”Hapake anu kita mpokoweweuako ira anu da tebinta andio kai hina koa kombiado? Nde luwuno beine pingkoomo a nsuku Benami.”

¹⁷ Ka dompotae mbo'u, ”Tia pusakado mia anu da mentuwu asalakono kongko mpiha mo'ia a nsuku Benami, ka sihina suku anu tetadi i olono to Isaraeli.

¹⁸ Sine ontae andio nahi kita mpoweeako ira kombiado inso a luwuno ana beineto.” Nde to Isaraeli mpesumpa iramo kanandio, ”Tetotonaaomo mia anu mompopokombiaako anano beine ia nsuku Benami!”

¹⁹ Ka dompotae mbo'u, ”Sompo ta'u hinao pompelangkai ndi Ondae i Ue i Silo i utarano Beteli, i sabaano oleo sala langkai anu tetutu inso i Beteli lumako i Sikemi ka te'alaako i selata Lebona.”

²⁰ Mpe'oliwi iramo a inuleno i Benami, kanandio, lakomo mpontowoki a luwuno lere anggoro.

²¹ Pepenteeo temoiko; tewala ana beine i Silo meluarako menari, peluarakomo inso ia lere anggoro atuu, ka nte'o'asa mia mompolaiako asa ana beine i Silo atuu gagi kombiano ka ilako i wita Benami.

²² Tewala hinao ama ke pepaekompono anu tama hawe ta motuntu ndi omami, kami mpotaeako ira: Impeweengako iramo ndi omami temoiko, nde a larono peteaa nahi to mpokomporako te'asa ana beine ta gagi kombiado nte'o'asa mia. Lano omiu nahi komba komiu mompoweengako ana beinemiu ndi ondae, nde ba kanandio mensala komiu.

²³ Mpo'ala ira kombiado inso a luwuno ana beine menari anu rinontudo. Hadiono mengkena kana hadiodo. Ka Do'amba mpekule ia ntia pusakado ka dowali mewanguo luwuno kotado mpekule ka mpo'ia i ra'ai.

²⁴ I tempono atuu melako iramo to Isaraeli inso i ra'ai, sompo mia montonda suku ka pepe'etuado mpekule ia tia pusakado.

²⁵ Ia tempo atuu nahina mokole i olodo to Isaraeli. Sompo mia moweweu hapa anu mentee montonda po'eheno onaeno.