Puu Mpobitara 20 - Wunta Mempori

To Isaraeli umewai ira to Benami

¹ Melako iramo luwudo to Isaraeli, te'inso i Dani hawe i Bereseba ka inso i wita Gilea, pepumpu iramo mperonga-ronga mpe'aro ndi Ondae i Ue i Misipa.

² Mpentade iramo petewawa inso a luwuno tongku atuu, inso a luwuno to Isaraeli, anu mpowawa bawaa-Do Ue Ala pato etu nsowu mia mpelempa anu mpompake ponai.

³ Domerongeomo to Benami, motae to Isaraeli melako i Misipa. Mpotae iramo to Isaraeli, ”Tutuluomo kana'umpe teweweuno gau mosa'o atuu.”

⁴ Onaemo ka to Lewi tamano beine anu pinepate atuu sumangki, ”Ongkue ka kombia pinekariaku hawe i Gibea po'iangaado to Benami, kami mperato i ra'ai.

⁵ Sine mia to Gibea mehawe mebolilio raha peratoaku itempono wongi ira mensapoi aku. Ira mpepate aku, sine kombia pinekariaku domegauo ranta ka i mate.

⁶ Ku'alao wata ngkoroi mate kombia pinekariaku, kupole-poleo ka ku'oliwio ia wita pusakado to Isaraeli, nde mia atuudo mpoweweu iramo hala ka anu mokoburu i olodo to Isaraeli.

⁷ Kanandio-andio omiu to Isaraeli, mendio komiumo luwu i ndi'ai. Imempauomo i ndi'ai pontimbangamiu ka patudumiu.”

⁸ Borono luwuno tongku atuu mpentade ka dompotae, ”Maupo te'asa mia ndi ontae, nahi ta lumako ia kemano, maupo te'asa mia nahi ta mekule i rahano.

⁹ Ndiomo anu kita weweuo ndi Gibea, sumapoio molalo undi.

¹⁰ Kita mpobiniki te'inso ia luwuno suku Isaraeli tehopulu mia i olodo anu asa etu, ka asa etu mia i olodo anu asa nsowu, asa nsowu mia i olodo anu hopulu nsowu, mo'ala kaanga tiado sorodadu hadio andio. Ka bamehawe iramo tomeweweuomo ndi Gibea-Benami menunu kana hala wineweudo i olodo to Isaraeli.”

¹¹ Borono to Isaraeli atuu mpepumpu ntepo'asa umewaio kota atuu.

¹² Ka do'amba luwuno suku Isaraeli mpontena mia lumako ia luwuno suku Benami saru pe'oliwido, ”Mosa'oa kana'umpe anu gagi ndi omiu!

¹³ Kanandio-andio impeweengakonomo luwuno mia atuu, onaemo mia anu memosa'o gauno i Gibea, ka kami mpepate ira, nde ba kanandio kita umoninio hapa anu mosa'o i olodo to Isaraeli.” Sine inuleno i Benami nahi domebehe mperorongeakono hapa anu pinaudo pepaekompodo, to Isaraeli.

¹⁴ Tendeano, inuleno i Benami inso ia luwuno kota susuaano, ntepumpu i Gibea ira melako umewai ira to Isaraeli.

¹⁵ I oleo atuu dinoaomo luwudo inuleno i Benami inso ia luwuno kota susuaano, rua pulu ka onoo nsowu anu mo'ini ponai, napi tewinso anu mpo'ia i Gibea, anu dinoaomo opitu etu mia tebiniki hadiono.

¹⁶ Inso ia luwudo sorodadu hinao opitu etu anu manggali, ka luwudo mempande ira mpompake kembi, anu asalakono ta toosi a iwali, nahi tepahe maupo te'asa wuu.

¹⁷ To Isaraeli dinoa koa mbo'u hadiodo, nahi tewinso suku Benami, hinao pato etu nsowu mia mo'ini ponai, luwudo atuu sorodadu.

¹⁸ Ka to Isaraeli melako i Beteli. I ra'ai mpesikeno ira ndi Ondae Ue Ala, ”Isemake anu inso ndi omami anu ta se'elu lumako metea umewai ira inuleno i Benami?” Sangki-Do i Ue, ”Suku Yehuda anu tese'elu.”

¹⁹ Onaemo ka to Isaraeli mpewangu da mo'oru mpekema mebolilio Gibea.

²⁰ Ka do'amba melako to Isaraeli mpetea umewai ira suku Benami, to Isaraeli umatorao baresi mpeteado umewai ira umpeda i Gibea.

²¹ Kanatuu koa mbo'u inuleno i Benami lumako umewai ira inso i Gibea ka dompepate ira rua pulu ka orua nsowu mia to Isaraeli oleo atuu.

²² Sine sorodadudo to Isaraeli mepumpuo luwuno rosodo, ka dome'atorao mbo'u baresi peteado a mpebaresiado amba-ambano.

²³ Ka do'amba melako to Isaraeli, ka mpengese i aro-Do i Ue hawe ngkiniwia, umari atuu mpesikeno ira ndi Ondae i Ue, ”Ba kami melako mbo'u ke mpetea umewai ira inuleno i Benami, pepaekompomami atuu?” Sangki-Do i Ue, ”Imelakomo umewai ira.”

²⁴ Sine mansado to Isaraeli i oleo anu ko'orua hawe umpedaako ira inuleno i Benami,

²⁵ i oleo ko'orua atuu melako ira to Benami inso i Gibea sumapoi ira, ka dompepate ira mbo'u hopulu ka oalu nsowu to Isaraeli, luwuno anu mo'ini ponai.

²⁶ Ka do'amba melako luwu to Isaraeli, onaemo luwudo tongku atuu, hawe i Beteli. I ra'ai dompo'ia mpengese i aro-Do i Ue, mempuasa hawe ngkiniwia oleo atuu, ka mpompesombaako pesomba tinunu ka pesomba tetolosia i aro-Do i Ue.

²⁷ Mpesikeno ira to Isaraeli ndi Ondae i Ue. Tempo atuu kongko i ra'ai Burua Pedandia-Do Ue Ala,

²⁸ ka i Pinehasi anano i Eleasa anano i Haruni gagi sando mpesomba-Do Ue Ala tempo atuu. Dompotae, ”Da kami melako mbo'uke te pohonapo mpetea umewai ira inuleno i Benami, pepaekompomami atuu, ke kami mpenaa-naa?” Sangki-Do i Ue, ”Imelakomo, nde tisomo Aku meweengako ira ia ngkaemiu.”

²⁹ Onaemo ka to Isaraeli mponaa sorodadu mpotowoki melimbuo Gibea.

³⁰ Ia oleo anu ko'otolu melako iramo to Isaraeli umewai ira inuleno i Benami ka dome'atorao baresido umewaio Gibea kana anu se'eluno.

³¹ Melako iramo inuleno i Benami sumapoi ira sorodadu atuu. Ntepaani ira inso i kota, kana se'eluno, mpompu'u iramo mensapoio sorodadu atuu ia orua sala langkai anu tumondao sala lumako i Beteli, ka sala anu susua lumako i Gibea telalo a ntonga mpada. Bara'ura ta tolu pulu ira mia memate i olodo to Isaraeli.

³² Mpotae iramo inuleno i Benami, ”Mia atuudo mentenangi iramo kana se'eluno.” Sine to Isaraeli lano se'eluno ntepo'asa iramo, ”Aiwa tompolai ka topaani ira inso ia kota lumako ia sala langkai.”

³³ Gagi to Isaraeli mpelungka ira inso ia mpo'iangaado ka dome'atorao baresido i Baala-Tamari, ka to Isaraeli anu mpontowoki atuu mpepobingko mpeluarako inso ia mpo'iangado, onaemo po'ianga anu kolingaa umpeda i Geba,

³⁴ ka hawe i arono Gibea, hadiodo hopulu nsowu mia anu tebiniki inso ia luwudo to Isaraeli. Peteaa atuu mongkokongiri sine nahi domento'orio inuleno i Benami nine masukara ta umalu ira.

³⁵ Ondae i Ue weweu ira to Benami mentenangi ia nto Isaraeli ka ia oleo koa mbo'u atuu to Isaraeli rumopu ira rua pulu ka olima nsowu ka asa etu mia to Benami anu mpo'ini ponai.

³⁶ Domengkitao to Benami, motae mentenangi iramo. Kontongaado to Isaraeli mposuka i arodo suku Benami, nde domperorohi iramo mpontowoki anu ninaado sumapoio Gibea.

³⁷ Mpopari-pari iramo mensapoio Gibea. Melako iramo sumapoio luwuno kota mompake ponai.

³⁸ Sine to Isaraeli mpe'asa aroa iramo saru anu mpontowoki atuu ira mesongkoo kota ka ahuno mokapa mewuatako i langi.

³⁹ Itempono to Isaraeli mponsuka a mpeteaado atuu, to Benami mpompu'u sumapoi ira to Isaraeli, onae ka domempinepate bara'ura tolu pulu mia, nde dompewowoloo, ”Manasa mia atuudo ira mentenangi ndi ontae, kana peteaa se'eluno.”

⁴⁰ Sine tempo atuu mompu'uomo mewuatako ahuno api anu mokapa inso i kota. Suku Benami mpengkita i bungkudo, domengkitao luwuno kota mo'aiomo, apino mewuatako i langi.

⁴¹ To Isaraeli melako iramo mbo'u. Mpondende-ndende iramo to Benami, domengkitao masolaa hawe umalu ira.

⁴² Gaagi mpolai iramo inso i arodo to Isaraeli, tumondao sala tetutu i pada one, sine peteaa atuu nahi dompokotepotola. Ka i'amba mia te'inso i kota hawe mepate ira luwu.

⁴³ Domelimbuo suku Benami atuu, domelulu ira mpiha ka domeropu ira hawe i arono Gibea, i sabaano oleo.

⁴⁴ Inso a inuleno i Benami anu mate hopulu ka oalu nsowu mia, luwudo mia memosia.

⁴⁵ Anu mehano mpekule ka mpolai i pada one, a ntorukuno watu Rimoni. Sine a ntonga sala langkai da hinao mbo'u pompepatea i olodo, olima nsowu mia. Melinulu ira ranta hawe i Gideomi ka domempinepate orua nsowu.

⁴⁶ Gagi anu memate a nsuku Benami i oleo atuu rua pulu ka olima nsowu mia mompake ponai ka luwudo mia anu memosia.

⁴⁷ Sine nomo etu mpekule mpolai i pada one, ia torukuno watu Rimoni. Mpo'ia ira opaa wula tehineno i torukuno watu atuu.

⁴⁸ Sine to Isaraeli mpekuleti ira to Benami ka dompepateako ira ponai, mia, pinotuwu ka hapamo koa anu kongko i ra'ai. Ka luwuno kota i ra'ai domesongkoo.