Puu Mpobitara 2 - Wunta Mempori

Mala'eka-Do i Ue mompopoto'ori i kota Bokohi

¹ Ka i'amba Mala'eka-Do i Ue lumako inso i Giliga tetutu i Bokohi ka mepau, ”Kukongkomi komiumo mpeluarako inso i Masiri ka Kuwawa komiu ia wita anu Kudandiakomiu saru sumpa ndi ue mpu'umiu. Mepau Akumo: Komba Aku balio pedandi-Ku ndi omiu ranta nahina tampulaano,

² sine omiu, sii mpoweweu pedandia saru palili wita andio. Pontunua pesombado asalakono ka impobangkuo. Sine nahi imperorongeakono pau-Ku. Tembio ka imempoweweu kanandio?

³ Onaemo ka Kupepau mbo'u: Komba Aku sumaari ira mia atuudo te'inso i aromiu, ranta ka domegagi iwalimiu ka anu pinesombaido ta gagi ohomiu.”

⁴ Umarino Mala'eka-Do i Ue mepau kona pau-Do atuu ia luwuno to Isaraeli, mpengese iramo tongku atuu tedoa meroku.

⁵ Onaemo ka inineeako Bokohi po'iangaa atuu. Ka i ra'ai dompompesombaako pesomba ndi Ondae i Ue.

To Isaraeli mpelahumoa i tempono puu mpobitara

⁶ Mansano i Yosua tumena ira melako, mpekule iramo to Isaraeli atuu, sompo-sompo mia ia wita pusakado, iramo mpo'iangario wita atuu.

⁷ Tongku atuu mpesomba ndi Ondae i Ue, itempono i Yosua ka itempono luwuno mia memotota'u anu melai tinuwuno sekonopo i Yosua, ka anu sumakosiiomo luwuno wineweu-Do i Ue anu langkai, a nto Isaraeli.

⁸ I Yosua anano i Nunu, tetenaa-Do i Ue, mate ia ntinuwuno asa etu ka hopulu nta'u;

⁹ Onae kinaburu ia wita pusakano, i Timina-Heresi, a mentorukuno Eparai, i utara torukuno Gaa.

¹⁰ Mansano luwuno inuledo atuu mempinumpu a ue mpu'udo, mehina iramo mbo'u inuledo anu susua, anu nahi domento'ori Ira i Ue, ke ba anu wineweu-Do a nto Isaraeli.

¹¹ Onaemo ka to Isaraeli mpoweweu anu mosa'o i aro-Do i Ue, ka mpesomba iramo ia Ba'ala.

¹² Dompebungkui ira i Ue, Ue Ala ue mpu'udo anu lumuarako ira te'inso i wita Masiri. Domentondao anu pinesombai susua, inso i olono anu pinesombaido tongku anu lumimbu ira. Ka dompesombaio anu pinesombaido atuu anu mokotensilao tekuda-Do i Ue.

¹³ Kanandiomo domebinta Ira i Ue, ka mpesomba ia Ba'ala ka luwuno Asitore.

¹⁴ Ka tekuda-Do i Ue tensila ia nto Isaraeli. Dopeweengako ira ia ngkaedo puu pompomuru ka dompomuru ira. Do'asa ira a ngkaedo iwali anu lumimbu ira, ka nami domempolio mbo'u umaropi ira iwalido.

¹⁵ Sompo ba dompelelu melako, kae-Do i Ue umewai ira, ka moweeako ira masukara, kana anu Dopopoto'oriako ira Ondae i Ue, ia sumpa, ranta ka dontepakada.

¹⁶ Ka Ondae i Ue moweeako ira puu mpobitara anu tumolosi ira inso ia ngkaedo puu pompomuru atuu.

¹⁷ Sine puu mpobitara atuu nahi domperioo koa mbo'u, hangano ponsosabo ira ka domentondao anu pinesombai susua ka mpesombaio. Ronga ira mepansia inso ia nsala anu tinondado mia mpu'udo anu mpomperorongeako songka-Do i Ue; nahi dompoweweu kana ue mpu'udo.

¹⁸ Sompo tempo Ondae i Ue moweeako ira puu pobitara, Ondae i Ue kumongkomi ira puu mpobitara atuu ka tumolosi ira inso ia iwalido, tempono domentuwu puu pobitara atuu. Nde Domongkokolaroako Ira i Uerumongeo rumorandaido i arodo luwudo mia anu bobarasai ira.

¹⁹ Sine ba puu mpobitara atuu mate, wali ira mpoweweu anu mosa'o, laluaopo sekono ue mpu'udo, mentondao anu pinesombai susua; mpesomba ira a anu pinesombai atuu ka mpenggolontu mpesombaio. Nahi dompenaa-naakono wineweudo ka leludo anu mpe'ulu watu.

²⁰ Tensilaomo tekuda-Do i Ue a nto Isaraeli, ka Dopepau, ”Hangano tongku andio molalo pedandia anu Kutenaako iramo ue mpu'udo, ka nahi domerongeo pau-Ku,

²¹ nami Aku behe mbo'u monsaari inso i arodo maupo te'asa inso a luwuno tongku anu binintano i Yosua itempono ka imate.

²² Onaemo mesala ia luwuno tongku atuu Aku umarahako ira to Isaraeli, ke ba dakongkodo mentuwu montonda sala anu Dotisoako ira i Ue, kana anu wineweudo ue mpu'udo, ba naahi.”

²³ Gaagi, Dopo'inee ira i Ue luwuno tongku atuu mpo'ia ka nahi doronga sumaari ira. Nahi Dopeweengako ira ia ngkaeno i Yosua.