Puu Mpobitara 19 - Wunta Mempori

Hala anu wineweu i Gibea

¹ Ia tempo atuu i Isaraeli nahina mokoledo. Ka i asambalino mentorukuno i Eparai hinao asa to Lewi mo'ia kana mia hawe. Onae mongkombia beine gagi samburueno inso i Beteleme-Yehuda.

² Sine samburueno atuu nahi moleo ndi onae, lumako ndi amano i Beteleme-Yehuda opaa wula tehineno.

³ Mompakaleomo tamano atuu ka ilako popandeio beine atuu kai pokuleo, meronga saru atano ka asa pasa kalide. Tempono beine atuu wawao mewinso i rahano amano ka ikitao amano, mawongkoomo aroano tepohaweakono.

⁴ Ponino, amano beine atuu, nahi beheakono lumako, onaemo ka ipo'ia otolu oleo tehineno a mponino. Mongkaa, mo'inu merato i ra'ai.

⁵ Sine ia oleo anu ko'opaa, itempono dompewangu mo'oru, ka mia Lewi atuu mompakale ta lumako, motaeomo amano beine atuu ia ponino, ”Pebaku ari maupo te'asa nsibi roti, ka u'amba lumako.”

⁶ Mpentoro iramo, ka dompongkaa ka mpo'inu mperonga-ronga. Ipotae amano beine ia ntama atuu, ”Moiko ba utepakosi mo'ia mbo'u merato ka imawongko koa aroamu.”

⁷ Sine mansano mia atuu mewangu ta koa lumako, ponino atuu dumadadaio ka da ipo'ia merato.

⁸ I oleo anu ko'olima, mansano mewangu mo'oru ta lumako, motaeomo amano beine atuu, ”Aiwa pebaku ari, ka upo'ia mbo'u tesarai, ranta tenggoli oleo.” Ka do'amba mongkaa orua ira.

⁹ Mansano mia atuu mentade ta lumako, saru samburueno ka atano, motaeomo ponino, amano beine atuu ndi onae, ”Kitaomo, tamo sumoo oleo; Moikoomo perato mbo'u po'ineomo ka i mawongko aroamu. Tisomo mo'oru ka ipewangu melempa mekule i rahamu.”

¹⁰ Sine mia atuu nahi behe mo'ia merato. Mompakaleomo ka ilako. Kanandiomo ka ihawe ia wita anu tepo'aroako Yebusi, onaemo Yerusale. Meronga saru onae hinao asa pasa kalide linampi ka samburueno.

¹¹ Mansado umpeda i Yebusi ka mata oleo tamo wongi, mepauomo atano atuu ia ueno, ”Aiwamo tontetoro a kotado to Yebusi ka tomperato i tu'ai.”

¹² Sine sumangki ueno, ”Komba kita mperato ia kotado mia susua anu komba iniado to Isaraeli, sine kita mpelempa mpiha hawe i Gibea.”

¹³ Ka ipepau mbo'u ia atano, ”Aiwa tompelempa hawe ia asa po'ianga atuu ka mewongi i Gibea ke i Rama.”

¹⁴ Ka do'amba mpotilalo mpelempa. Mata oleo sumoomo, itempono dome'umpeda i Gibea, po'iangaado tongku Benami.

¹⁵ Onaemo ka domentetoro i Gibea, ka dompewinso mperato i tu'ai, ka mansado mehawe, mpentoro iramo ia tana lapa kota. Sine nahina mau te'asa mia moboi ira ka domperato a raha.

¹⁶ Sine ia wongi atuu haweomo asa mia mota'u anu mekule inso a mpo'anggaano i lere. Mia atuu te'inso a mentorukuno Eparai ka mo'ia i Gibea kana mia hawe, sine palili anu mpo'ia i tu'ai to Benami.

¹⁷ Itempono ikita ira mia anu kontongaado mpelempa i tana lapa kota, mepauomo mia mota'u atuu, ”Isua ba imelako, ka isua insoamiu?”

¹⁸ Dosangkio, ”Tekonai kami mpelempa inso i Beteleme-Yehuda melako i asambalino mentorukuno Eparai. I ra'ai insoaku ka hieno lumakoaku i Beteleme-Yehuda, kanandio kontongaamami mpelempa mpekule i raha. Sine nahina mia moboi aku lumako irahano,

¹⁹ maupo ndi ongkue hinao seami ka kaangano kalidemami, hinao roti ka anggoro pototoku, pototono beine ka atamu anu merongaakomu andio, nahi kami memakura.”

²⁰ Motaeomo mia mota'u atuu, ”Sii danggara! Luwuakoano anu kineremu ongkue anu tumangguio, sine siperato ia tana lapa andio.”

²¹ Umari atuu iwawa ira mewinso ia laro rahano, ka kalidedo ipaka ira. Dowo'ohiomo karudo, mpongkaa ka mpo'inu.

²² Sine kontongaado memawongko mehawe iramo mia anu a ngkota atuu, mia melambaha, mensapoio raha atuu. Domedodandao pewowano ka dompotae ia mia mota'u ueno raha atuu: Luarakono mia anu hawe ia rahamu atuu, kami mpewowaliakono.

²³ Meluarakoomo ueno raha atuu ka ipepauako ira, ”Naahi pepaekompoku, si mpoweweu anu mosa'o; nde mia andiodo mpewinso iramo ia laro rahaku, si mpoweweu hala.

²⁴ Sine hinao anaku anu da ana beine, ka samburueno mia atuu, moikoomo kuwawa ira meluarako. Igau iramo, montonda hapa anu pinemoikomiu, sine a mia andio si mpoweweu anu mosa'o.”

²⁵ Sine mia atuudo nahi domperorongeakono pauno. Onaemo to Lewi atuu rumakoo samburueno, ka iwawao meluarako, ka domegauo asa wongi atuu, hawe mo'oru. Umpeda meene ka do'amba mpotolao beine atuu.

²⁶ Da mo'oru ntu'u mekuleomo beine atuu, sine tebangku i arono pewowano raha peratoano ueno, tepombole hawe meene.

²⁷ Itempono ueno mewangu mo'oru, i'ungkahio pewowa, ta motilaloakono pelempaano, sine ikitao beine atuu, samburueno tepombole saru kaeno i arono mpewowa raha.

²⁸ Motaeomo ia beine atuu, ”Pewangumo, aiwamo ka to lako.” Sine nahina sangkino. Ka i'amba tumandeo wata ngkoroi mate atuu a wawo kalide, mepatindaomo kai lako ia mpo'iangano.

²⁹ Kohaweno i raha, i'alao piso, isumbeleo, ka ipole-poleo montonda wukuno, gagi hopulu ka orua mpole, ka i'amba umoliwio ia luwuno witado to Isaraeli.

³⁰ Ka luwudo anu mengkitao, dompotae, ”Anu kanandio napi hori gagi ka napihori mpongkita, tumampu'u to Isaraeli mpeluarako inso i wita Masiri ranta hawe kanandio-andio. Penootiomo, timbangao, ka impepaumo.”