Puu Mpobitara 18 - Wunta Mempori

Tinaha pesombaano i Mika rinontu

¹ I tempo atuu nahina mokoledo to Isaraeli ka tongku Dani kontongaado po'ungke tia pusakado ta po'iangaado mpiha, nde ranta i'oleo andio napi dompohawe tia pusakado i olodo tongku to Isaraeli.

² Onaemo inuleno i Dani montena olima mia inso ia luwuno tongkudo, luwudo mia anu moroso ntu'u, te'inso i Sora ka Esitaolo, anu paresao inia atuu ka dopotaeako ira, ”Imelakomo padasoo inia atuu.” Mansado mehawe a mentorukuno Eparai rahano i Mika, mperato iramo i ra'ai.

³ Itempono dome'umpeda i rahano i Mika, teto'oriomo inso ia pauno nine mia mongura atuu to Lewi, onaemo ka domentetoro ka dompotaeakono, ”Isemake anu wawako ramai? Hapake inanggamu ka inorusumu i ndi'ai?”

⁴ Ipauako ira, ”Kanandio, kanatuumo anu wineweuno i Mika ndi ongkue, itambo aku, gagi sando mpesombado.”

⁵ Mpotae ira ndi onae, ”Pesikeno ndi Ondae Ue Ala, ka kimento'orio, mongkona pelempamami andio, ba ta me'ura.”

⁶ Ipotaeako ira sando mpesomba, ”Imelakomo pelempamiu atuu Dopemoikoo i Ue.”

⁷ Umari atuu melako iramo olima mia atuu hawe i Laisi. Domengkitaomo nine palilido mesintuwu ira, kana gaudo to Sidoni, roodo ka manangai. Palili atuudo nahina makurado hapamokoa anu hina i wawo ntolino, tendeano mengkaea ira. Po'iangaado tepo'olai ka to Sidoni, ka nahi dontepoto'ori maupo isemamokoa.

⁸ Mansado mpekule ia pe'etudo i Sora ka i Esitaoli, mpesikeno iramo ndi ondae, ”Hapake anu hinawemiu i ra'ai?”

⁹ Sangkido, ”Impepantindamo, me'aiwamo ka tomelako mensapoi ira, nde kimengkitao witado lano tedoa moiko. Tembio ka nahi mpelelu! Si mpeluweki tomelako mpewinso mpentorokio wita atuu.

¹⁰ Ba mpewinso komiumo, komiu kumita ira palili anu mentuwu manangai, ka wita atuu malua i manggali ka i koana. Asalakono, Ondae Ue Ala Ira meweengakono ia ngkaemiu. I tu'aimo po'ianga anu nahina makurano i wawo ntolino.”

¹¹ Mpelungka iramo inso i ra'ai, inso i Sora ka Esitaoli, onoo etu mia tongku Dani, saru sangka mpeteado.

¹² Melako ira, mpekemah i Kiriati-Yearimi i Yehuda. Onaemo po'ianga atuu ka i nineeako Mahane-Dani ranta kanandio; po'iangano i sookano oleo Kiriati-Yearimi.

¹³ Inso i ra'ai melako ira a mentorukuno Eparai ka domehawe i rahano i Mika.

¹⁴ Mpotae iramo mia olima atuu anu umari mempadasoo wita Laisi atuu. Mpotae ira ia pe'etudo, ”Imento'orioke, motae ilaro raha andiodo hinao lemba epo, terapi, tinaha ka tinaha hinola? Onae ka imento'oriomo hapa anu ta wineweumiu!”

¹⁵ Ka do'amba melako a mpo'ianga atuu, hawe iramo i rahano mia mongura to Lewi atuu, irahano i Mika ka dompesikenoakono ke da tuwu.

¹⁶ Ka inuleno i Dani anu nomo'etu ira saru sangka mpetea, mpetade ira ia mpewowano kota.

¹⁷ Ka olima ira anu melako iramo padasoo wita atuu mpelempa mpiha, mpewinso i larono ka dome'alao tinaha, epo, terapi, tinaha hinola atuu. Sando mpewomba atuu mentade ia mpewowa kota, saru nomo'etu mia anu mpesangka mpetea atuu.

¹⁸ Sine mansano anu mehano mpewinso ia laro rahano i Mika ka dome'alao tinaha, epo, terapi, ka tinaha hinola atuu, motaeomo sando mpesomba atuu ndi ondae, ”Mpoweweukomiu hapake andio?”

¹⁹ Sine domesangkio, ”Po'ia, si pepau. Tonda kamimo, ka igagi ama ka sando mpesomba ndi omami. Isuake anu lalu pinemoikomu: gagi sando mpesomba tiano ihino raha asa mia, ke gagi sando mpesomba tiano asa tongku, i olodo to Isaraeli?”

²⁰ Mawongkoomo aroano sando mpesomba atuu. I'alao epo, terapi, tinaha atuu, ka ipewinso i olodo mia hadio.

²¹ Ka do'amba mpepokule, ka domelako saru nana'ote, pinotuwu ka luwuno sangka anu mentudu domenaao i arodo.

²² Mansado me'olai te'inso irahano i Mika, itena ira mia anu me'umpedaakono rahano i Mika, ka domelulu ira inuleno i Dani atuudo.

²³ Dobooliki ira inuleno i Dani, ka do'amba mpepokule mia atuudo ka dompotaeakono i Mika, ”Hapake tinoomu ka upontena mia atuu?” Isangki ira,

²⁴ ”Lahumoa anu wineweuku saru sando mpesomba ime'alao ka imewawao. Hapa mbo'u anu datebinta ndi ongkue?” Tembio kau potaeakune: Hapake tinoomu?

²⁵ Mpotae iramo inuleno i Dani ndi onae, ”Siimo mbo'u kimerongeo paumu, ta mansa hina mia sumapoiko hangano mahaki aroa, ka imeropu asa raha.”

²⁶ Mpotilalo iramo inuleno i Dani, ka hangano pongkitano i Mika memoroso irapo sekono onae, mepokuleomo i rahano.

²⁷ Ka i'amba inuleno i Dani domewawao luwuno sangka anu wineweuno i Mika saru sando mpesombano, melako mentutuio Laisi, onaemo palili anu mentuwu roodo ka manangai. Domensapoiako ira ponai ka iniado sinongko.

²⁸ Nahina mia anu aiwa montulungi, hangano kota atuu olai inso i Sidoni ka luwuno mia i kota atuu nahi dontepoto'oriako ira maupo isemamokoa. Po'iangano kota atuu i lembono Beti-Rehobo. Ka do'amba inuleno i Dani wali mewanguo kota atuu ka dompo'ia i ra'ai.

²⁹ Domeneeakono kota atuu Dani, montonda neeno anu umule ira onaemo i Dani anu pine'anaako tiado to Isaraeli, sine kota atuu se'eluno meneeako Laisi.

³⁰ Inuleno i Dani mpowangu ira tinaha tiado. I Yonata anano i Geresomi anano i Musa saru luwuno anano gagi sando mpesomba tongku Dani, ranta palili inia atuu domewawa ira gagi kana mia tinadi.

³¹ Kanandiomo domenaao tinaha anu wineweuno i Mika gagi tiado, ka tinaha atuu kongko i ra'ai tempono raha-Do Ue Ala kongko i Silo.