Puu Mpobitara 17 - Wunta Mempori

Tinaha pinesombaino i Mika

¹ Hinao asa mia te'inso a mentorukuno Eparai, i Mika neeno.

² Motaeomo ndi ineno, ”Doi salaka anu asa nsowu ka asa etu atuu, anu inalado mia inso ndi omiu, onaemo ka itotonaao, ongkueku anu rumongeo pau miu atuu, lano doi atuu ndio ndi ongkue, ongkue anu umalao.” Mepauomo ineno, ”Doronsoko i Ue anaku”

³ Umari atuu ipokuleomo doi salaka asa nsowu ka asa etu atuu ndi ineno: Sine ipotae ineno, ”Aku mokomemporio doi atuu ndi Ondae i Ue, aku metiakono ndi anaku, ka iwineweu tinaha, ka tinaha hinola te'inso ia doi atuu. Kanandio, doi atuu kupokuleo ndi omue.”

⁴ Sine mia atuu ipokuleo doi atuu ndi ineno, ka beine atuu umalao rua etu doi salaka ka iweeakono ia puu mpoweweu salaka anu moweweu tinaha ka tinaha hinola te'inso ia doi atuu; onaemo ka tinaha atuu ninaa i rahani Mika.

⁵ I Mika andio hinao raha pesombaano. Iweweuo lemba epo ka terapi ka ipotoroo asa anano anu tama gagi sando mpesomba.

⁶ I tempo atuu napi hina mokole i olodo to Isaraeli, sompo mia moweweu hapa anu mentee montonda pinewowolono onaeno.

⁷ Hinao asa mia mongura te'inso i inia Beteleme-Yehuda, inso ia tongku Yehuda. Onae to Lewi mo'ia i ra'ai kana mia hawe.

⁸ Meluarakoomo inso i Beteleme-Yehuda ta mo'ia maupo kana mia hawe isuamokoa ipohawe po'ianga anu umeheo. Ia pelempaano haweomo a mentorukuno Eparai i rahano i Mika.

⁹ Mesikeno i Mika, ”Isuake insoamu?” Isangkio, ”Ongkue to Lewi te'inso i Beteleme-Yehuda, aku lumako isuamokoa anu umehe aku mo'ia kana mia hawe.”

¹⁰ Ipotaeakono i Mika, ”Po'iamo ndi ongkue ka gagimo ama, ka sando mpesomba ndi omami. Sompo ta'u aku moweeko hopulu lempe doi salaka, asa pasa sangka saru kaangamu.”

¹¹ To Lewi atuu me'induomo ka mo'ia ndi onae. Mia mongura atuu kanaomo anano.

¹² Ipotoroo i Mika to Lewi atuu, gagi sando mpesomba ka mo'ia i rahano i Mika.

¹³ Motaeomo i Mika, ”Kanandio kuto'oriomo, asalakono Ondae i Ue Ira moweweu anu moiko ndi ongkue, hangano hinao asa mia to Lewi gagi sando mpesombaku.”