Puu Mpobitara 16 - Wunta Mempori

I Simeso i Gasa

¹ Itempono i Simeso lumako i Gasa, i ra'ai ikitao asa beine belesu, ka ipewowaliakono.

² Domempinauako to Gasa, ”I Simeso haweomo i ndi'ai.” Ka do'amba mengkaduo ka dompomporaakono asa wongi a pewowano kota. Asa wongi atuu nahi dompoweweu hapa-hapa, hangano pinewowolodo, ”Umpeda meenepo to mpepateo.”

³ Sine i Simeso moturi butu hawe porontonga wongi. Mewanguomo porontonga wongi, ka i'amba uminio orua lewe tondo kota atuu ka orua karuno tondo. Ibutao luwu saru lansono kai po'ahao a oweano patimbali. Ka i'amba luwuno atuu itandeo iwawao a punsuno torukuno anu tepo'aroako Hebero.

I Simeso ka i Delila

⁴ Umari atuu i Simeso mompekokonoomo asa beine i lembono Soreka, anu meneeako i Delila.

⁵ Me'aiwa iramo mokoledo to Pelisiti a beine atuu ka dompotae, ”Popandeio ka sikenoo tembio ka itedoa moroso ka kana'umpe ka kimpokonangio saru memponguo ka nami pokompe'ewa. Kami pada mpoweeko asa nsowu ka asa etu lempe doi salaka.”

⁶ Ka i'amba i Delila motae ndi Simeso, ”Pauakunemo tembio ka utedoa moroso ka kana'umpe ba upinongu ka utenangi koa?”

⁷ Sumangki i Simeso, ”Ba pinonguako aku opitu koloro pana anu wo'ohu ka napi motu'i, akumo molema kana mia mehano.”

⁸ Ka do'amba mokoledo to Pelisiti mpowawa a beine atuu opitu koloro pana anu wo'ohu ka napi motu'i. Iponguomo i Simeso mompake koloro atuu,

⁹ kontongaano hinao mia mompora i bolongkono. Mebooliomo beine atuu ndi onae, ”To Pelisiti ira merakoko, Simeso!” Sine, ibitesi ira koloro pana atuu kana koloro seami kinaano api, ka napi tino'ori te'inso isua rosono.

¹⁰ Motaeomo i Delila ndi Simeso, ”Menteeano upemae-maeakunemo ka ugaupi aku. Kanandio pauakunemo menteeano kana'umpe ka upinokopongu.”

¹¹ Sumangki i Simeso, ”Tewala mododo ntu'u kupinonguako koloro wo'ohu anu napi hori pinake a hapamo koa, aku gagi molema kana mia mehano.”

¹² Ka i'amba i Delila mo'ala koloro wo'ohu, ka iponguakono koloro atuu. Ibooliomo i Simeso, ”To Pelisiti ira merakoko, Simeso!” Kontongaano atuu hinao mia i bolongko anu mpepatinda ira merakoo. Sine, luwuno koloro atuu ibitesio inso a ngkaeno kana koa bana.

¹³ Motaeomo mbo'u i Delila ndi Simeso, ”Ranta kanandio kongkomu memae-maeakune ka gumaupi aku. Pauakunemo kana'umpe ba upinongu.” Sumangki i Simeso, tewala pino'asa opitu mpiu wuuku saru bana ka itinanggo ia rere, akumo gagi molema kana mia mehano.

¹⁴ Umarino beine atuu mokorosoo piniu atuu mompake paso, mebooli ndi onae, ”To Pelisiti ira merakoko, Simeso.” Telikeomo ka ipesintakiakono tebuta pasono wuu anu pino'asa atuu.

¹⁵ Motaeomo beine atuu ndi onae, ”Nde kana'umpe kau potae, ’Kupekokonoko’, ka hinaano aroamu nahi buke ntu'u ndi ongkue. Pentolumo upemae-maeakune, ka nahi ubehe pauakune tembio ka utedoa moroso.”

¹⁶ Hangano sompo oleo beine atuu mengese ka kongkono dumadaio, telusaomo aroano kana tamo mate.

¹⁷ Ipauakonomo luwu anu winunino aroano, ”Uluku nahi hori kumonao piso pekeru, nde tumampu'u inso ilaro kompono ineku, ongkue andio nasiri-Do Ue Ala. Ba kineru uluku, tetadiomo rosoku ka aku gagi molema kana mia mehano.”

¹⁸ Mansano kumitao i Delila, nine i Simeso ipauakonomo luwu anu winunino aroano, montenaomo mia moboi ira mokole to Pelisiti ka ipe'oliwi, ”Pohona andio ime'aiwamo, nde ipauomo luwu ndi ongkue luwuno winunino aroano.” Me'aiwa iramo mokole kota to Pelisiti atuu ndi onae ka mpowawa doi.

¹⁹ Ka i'amba beine atuu popandeio moturi mepa'ulua a mpa'ano ka ipompoboi asa mia kumeruo opitu mpiu wuuno. Kanandiomo beine atuu mompu'u numangio i Simeso, nde rosono moliuomo.

²⁰ Mebooliomo beine atuu, ”To Pelisiti ira merakoko, Simeso!” Mekaangakoomo i Simeso inso ia mpoturiano; pompewowolono, ”Kana anu se'eluno, aku koa mokompepalu ka kutola.” Sine nahi pokonto'orio nine Dobintaomo i Ue.

²¹ Domerakoomo to Pilisiti, domensunggeio orua matano ka domewawao i Gasa. I ra'ai dometorungkuo ka domeranteakono rante mala ka inanggano butu mogili.

²² Sine wuuno mompu'uomo mbo'u tuwu umarino kineru.

Mateno i Simeso

²³ Umarino atuu tepumpu iramo luwuno mokole kota to Pelisiti ira mporame-rame langkai pesomba sinumbele ndi Dagoni, pelahumoaado, ira tedoa pompemaroa. Dompotae, ”Dopeweengakonomo anu pinesombaito ia ngkaeto, i Simeso iwalito.”

²⁴ Ka itempono domengkitao mia i Simeso, do'unde-undeo anu pinesombaido, ka dompebooli, ”Dopeweengakonomo anu pinesombaito ia ngkaeto iwalito, anu sumolangio witato, ka anu mepate ira hadio wali-walito.”

²⁵ I tempono mawongko aroado, mpotae iramo, ”Poboiomo i Simeso ka ipo'o'awatiakita.” Dompoboiomo i Simeso inso ia torungku, ka ipo'o'awati i arodo, ka do'amba mentenao mentade i olono karu raha.

²⁶ Motaeomo i Simeso ia nana'ote anu tumaateo, ”Potola aku, po'ineomo ka kuperare ia karu raha andio, ka kupokompehonda.”

²⁷ Raha atuu bukeako tama ka beine; luwuno mokoledo to Pelisiti bara'ura hadiono ta te'otolu nsowu tama ka beine mpo'ia ira i wawono, anu mpongkikita po'o'awatino i Simeso atuu.

²⁸ Mebooliomo i Simeso ndi Ondae i Ue, ipotae, ”O Ue Ala, ipewowolo aku Ue, i powee aku roso, maupo tepohonamo koa, O Ue Ala, ka kupombaloakono orua mataku ia to Pilisiti.”

²⁹ Ka i'amba i Simeso kumopuio orua karu raha anu i tongano, parantadano raha atuu, parantadano anu asa ikoanano ka parantada anu susua i manggalino.

³⁰ Motaeomo i Simeso, ”Po'ineomo kumate merongaako ira to Pelisiti andiodo.” Me'odoomo ka ipeteahako, tebangkuomo raha langkai atuu, dumunsi ira luwuno mokole kota atuu ka luwudo mia anu i larono. Anu memate tempo atuu hadioopo sekono anu memate se'eluno itempono ituwu.

³¹ Umarino atuu mehawe iramo luwuno pe'etuno ka pepaekompono, domentandeo ka domewawao inso i tu'ai. Domengkaburuo i olono Sora ka Esitaoli ilarono kaburuno i Manoa, amano. Ipoparenta gagi puu mpobitarado to Isaraeli rua pulu nta'u tehineno.