Puu Mpobitara 15 - Wunta Mempori

I Simeso umewai ira to Pelisiti

¹ Nahi tehine, ia konsowia gandu, lumako i Simeso tepohaweakono beineno, mowawa asa ana bembe. Ka ipotae, ”Aku tepohaweakono beineku i bolongko.” Sine, amano beine atuu nahi eheakono mewinso.

² Motae amano beine atuu, ”Potaeku u'o'aliaakonomo ntu'u. Onae koa ka kupeweengakono ia walimu. Nde nahi tekosiopo ke uaino sekono onae? Alaomo onae gagi euno.”

³ Motae i Simeso ndi ondae, ”Pohona andio nahina salaku ia nto Pelisiti, ba kupowawaako ira masolaa.”

⁴ Lumakoomo i Simeso, morako tolu etu dahu tobu, i'alao pansona, ipanggo ira pada ikido ka ipe'onggoakono pansona ia olono orua dahu.

⁵ Ka i'amba molangao pansona atuu ka ipotola ira dahu atuudo ia lere gandu to Pelisiti anu napi sinowi, onaemo ka imo'ai howuno gandu ka gandu anu napi sinowi saru lere saitu.

⁶ Mpotae iramo to Pelisiti, ”Wineweuno isema ke andio?” Mesangki ira mia, ”I Simeso, ponino to Timena atuu, nde i'alaomo beineno i Simeso ka ipeweengakono a walino i Simeso.” Ka i'amba melako ira to Pelisiti atuu mentunuo beine atuu saru amano.

⁷ Motaeomo i Simeso ndi ondae, ”Ba kanandio wineweumiu, nahi aku hori menaa-naa ba napi kupombaloakono ndi omiu.”

⁸ Hangano pobongono anu tedoa moroso ipuro-puro ira. Ka i'amba lumakoomo ka ipo'ia i larono kunepo a pongku watu Etami.

⁹ Melako iramo to Pelisiti atuu mpekemah i wita Yehuda ka dompesiarawo i Lehi.

¹⁰ Mpotae iramo to Yehuda, ”Tembio ke ka ime'aiwa mensapoi kami?” Mesangki ira, ”Me'aiwa kami, kami me'onggoo i Simeso ka kami meweweuo kana iweweu kami.”

¹¹ Ka i'amba mpetii ira tolu nsowu mia inso ia tongku Yehuda lumako a ngkunepo torukuno watu Etami ka dompotae ndi Simeso, ”Nahi uto'orio ke, motae to Pelisiti mempabawa ira ndi ontae? Tembio kau poweweu kanandio ndi omami?” Sine isangki ira, ”Kana'umpe domeweweu aku, kanatuu koa mbo'u kuweweu ira.”

¹² Mpotae ira ndi onae, ”Me'aiwa kami i ndi'ai, kami me'onggoko ka peweengakomu ia ngkaedo to Pilisiti.” Sine sumangki i Simeso ndi ondae, ”Impesumpamo ndi ongkue, motae nahi komiu sumapoi aku.”

¹³ Mpotae ira ndi onae, ”Naahi, kami butu me'onggoko ka mpeweengakomu a ngkaedo. Nahi kami mpepateko.” Dome'onggoomo ka orua koloro wo'ohu ka domewawao inso a pongkuno watu atuu.

¹⁴ Mansado mehawe i Lehi, to Pelisiti tumotowoo ka domengkokora-kora. Ka i'amba Pena-Do i Ue mewinsokio, ranta koloro a ngkaeno gagi kana seami anu piingko ikaano api ka luwuno ponguno ntebibite inso a ngkaeno.

¹⁵ Ka i'amba ihaweo asa wuku aseno kalide anu da wo'ohu. I'alaomo wuku atuu, ka ipepate ira asa nsowu mia.

¹⁶ Motaeomo i Simeso, ”Mompake aseno kalide, luwuno kalide atuu kupepate ira, Mompake aseno kalide asa nsowu mia kupepate ira.”

¹⁷ Umarino motae kanandio, ipewunoakono wuku ase atuu inso a ngkaeno. Ka i'amba po'iangaa atuu nineeako Rama Lehi.

¹⁸ Mansano tedoa mokoranga, mebooliomo ndi Ondae i Ue, ”Kae tetenaa Miu andio Ipowee aku poponangi anu langkai. Sine kanandio, akumo mate mokoranga ka tedonta a ngkaedo mia anu nahi dompetindi andio!”

¹⁹ Ka i'amba Dobansio Ue Ala watu mebolo anu i Lehi, ka meluarakoomo uwoi inso i tu'ai. Umarino mo'inu, waliomo moroso mbo'u. Onaemo pu'uno kai nineeako Eni Hakore, ranta kanandio da kongko i Lehi.

²⁰ I Simeso moparenta gagi puu mpobitara ia to Isaraeli rua pulu nta'u tehineno i tempodo to Pilisiti.