Puu Mpobitara 14 - Wunta Mempori

Pekombiano i Simeso ka singguruno

¹ Metiiomo i Simeso lumako i Timena ka i ra'ai ikitao aasa beine to Pilisiti.

² Mekuleomo ka ipauako ira amano ka ineno, ”I Timena kukitao asa beine to Pilisiti. Kanandio-andio, ilakomo umalao gagi beineku.”

³ Sine ama ka ineno motaeakono: ”Nami hina ke asa ana beine i olodo ana beine pe'etumu ke i olodo tongkuto ranta kau po'ala kombiamu inso a nto Pelisiti anu nahi dompetindi atuu?” Sumangki i Simeso ndi amano, ”Lakomo alaakune, nde onaemo moko'alao aroaku.”

⁴ Ama ka ineno nahi doto'orio motae mongkona atuu te'inso ndi Ondae Ue. Onae lano mo'ungke-ungkeako a nto Pelisiti. Itempo atuu to Pelisiti parenta ira to Isaraeli.

⁵ Metiiomo i Simeso lumako i Timena saru amano ka ineno. Mansado hawe i lere anggoro Timena, asa singa mongura menggere te'aro ndi Simeso.

⁶ I tempono koa atuu mewinsoomo Penaa-Do i Ue ndi Simeso, onaemo ka i Simeso sumempaakono kaeno singa atuu kana mosempa ana bembe. Sine nahi tutuluako ira amano ka ineno hapa anu wineweuno atuu.

⁷ Lumakoomo i Simeso mesaritaakono beine atuu, hangano beine atuu ipongko'alao aroano.

⁸ Mansano ba opia tempo mekuleomo mbo'u ta kumobiao beine atuu. Mansano pansia ta kumitao wata ngkoroino singa atuu ikitaomo hoani me'inena ia wukuno singa atuu ka siuno.

⁹ I'alaomo siu hoani atuu ka ikaano kontongaano melempa mpiha. Ka i'amba lumako ndi amano ka ineno, ka ipoweeako ira mbo'u ndi ondae ka dokaano. Sine nahi tutuluako ira nine siu hoani atuu inalano inso a wukuno singa.

¹⁰ Mansano amano lumako ia beine atuu, i Simeso moweweu gawe i ra'ai, nde kanandiomo mia memongura dowela mpoweweu.

¹¹ Itempono domengkitao i Simeso, domebiniki iramo tolu pulu mia anu mokowalio.

¹² Ipotaeako ira i Simeso, ”Aku pauakomiu asa singguru. Ba impokoguruo sangkino i larono opitu oleo pogawea andio, aku moweeakomiu tolu pulu sangka lena ka tolu pulu sangka popelangkai.

¹³ Sine ba nahi mpokoguruo asalakono omiu anu mpowee aku tolu pulu sangka lena ka tolu pulu sangka popelangkai.” Dompotae ndi onae, ”Pauomo singgurumu atuu, ka kimerongeo.”

¹⁴ I potae ndi ondae, ”Inso anu mongkaa meluarako kaanga, inso anu moroso meluarako anu mesiu.” Otolu oleo tehineno nahi dompokosangkio singguru atuu.

¹⁵ A oleo ko'opitu mpepau iramo ndi beineno i Simeso, ”Popandeio tamamu, ka ipauakami sangkino singguruno atuu. Ba naahi, omue ka luwuno ihino rahano amamu kami mesongkoo. Nde u'olu kami, ka kigagi memongkokolaro ke? Naahi?”

¹⁶ Mengeseomo beineno i Simeso i horino, ka ipotae, ”Omue tedoa ntu'u u'o'aliakune ka nahi upehohawa aku. Upoweeako ira singguru a mia pe'asa tongkuku, sine nahi upokomengkaao ndi ongkue.” Sumangki i Simeso, ”Sekonopo ndi amaku ka ineku nahi kupauako ira, tamo ndi omue aku pauakomu?”

¹⁷ Ilarono opitu oleo dompogawe, beineno mengese mpiha ihorino. Poko'ariano a kopitu oleono ipauakonomo a beineno, hangano beineno mengeseli ndi onae. Ka i'amba beine atuu ipauako ira pengkonaano singguru atuu a mia pe'asa tongkuno.

¹⁸ A ko'opitu oleono atuu, napi sumoo oleo, mpotae iramo mia i kota atuu ndi onae, ”Hapa ke anu lalu mesiu sekono siu hoani?” Hapa ke anu lalu moroso sekono singa? Isangki ira, ”Ba nahi mpompadekoako sapi waiku, nahi komiu hori mehaweo sangkino singguruku.”

¹⁹ Mewinsoomo Penaa-Do i Ue ndi onae. Onae metii lumako i Asikeloni ka ipepate ira tolu pulu mia iraane. Ilohu ira sangkado ka iweeako ira sangka pompelangkai atuu a luwuno mia anu mehaweo sangkino singguruno. Ka i'amba mekule a rahano amano, da tedoa mokula aroano.

²⁰ Beineno i Simeso pineweengako ia walino anu hori tumondao.