Puu Mpobitara 13 - Wunta Mempori

Hinaano I Simeso

¹ To Isaraeli mpoweweu iramo mbo'u anu mosa'o a pongkita-Do i Ue. Onaemo ka Ondae i Ue meweengako ira a ngkaedo to Pelisiti pato pulu nta'u tehineno.

² I tempo atuu hinao asa mia te'inso i Sora, te'inso a inuledo to Dani, neeno i Manoa. Kombiano biita, nahina anano.

³ Ka i'amba Malaeka-Do i Ue mepopokita ia beine atuu ka ipepauakono, ”Mentee omue biita, nahina anamu, sine ikomentia ka me'anaako asa ana ntama.

⁴ Gagi dagaio koroimu, sipo'inu anggoro ke inua anu mompokomolangu ka sipongkaa kaanga anu inonto.

⁵ Nde omue ikomentia ka me'anaako asa ana ntama. Uluno nahi ta umaluo piso pekeru, nde nana'ote atuu ta gagi nasiri-Do Ue Ala tumampu'u da inso a laro kompono ineno. Onaemo ta mompu'u montolosi to Isaraeli inso a ngkaedo to Pilisiti.”

⁶ Ka i'amba beine atuu tepohawekono tamano ka ipotae, ”Haweomo ndi ongkue asa tetenaa-Do Ue Ala, rupano kana rupa mala'eka-Do Ue Ala, tedoa mongkokodoito. Nahi kusikenoo ba isua insoano, ka onae koa mbo'u nahi pauo neeno ndi ongkue.

⁷ Ipotae ndi ongkue: Ikomentia ka me'anaako asa ana ntama. Onaemo sipo'inu anggoro ke inua anu mompokomolangu ka sipongkaa kaanga anu inonto, nde te'inso ia laro kompono ineno nana'ote atuu ta gagi mia anu meweengakono tumuwuno ndi Ondae Ue Ala ranta hawe a oleo mateano.”

⁸ Ka i'amba i Manoa mo'ema ndi Ondae i Ue, ”O Ue, po'ineeomo tetenaa-Do Ue Ala anu tinena Miu atuu aiwa mbo'u ndi omami ka ipagurukami hapa anu asalakono kimeweweuo a ana anu ta hina atuu.”

⁹ Dorongeomo Ue Ala po'emano i Manoa. Mala'eka-Do Ue Ala hawe mbo'u a beine atuu, tempono ipentoro i lere, i Manoa tamano nahi kongko saru onae.

¹⁰ Beine atuu tumampu'u melulu pauakono tamano, ipotaeakono, ”Mia anu tempo atuu hawe ndi ongkue, mepopokita mbo'u ndi ongkue.”

¹¹ Mentadeomo i Manoa tumondao beineno. Mansano hawe ia mia atuu ipoteakono, ”Omiumo ke mia anu hawe mepauakono beineku?” Sangkino, ”Mentee!”

¹² Motae i Manoa, ”Tewala gagi anu pinau-Miu atuu, kana'umpe te'ingka tumuwuno ka peleluno nana'ote atuu?”

¹³ Sumangki Mala'eka-Do i Ue ndi Manoa, ”Beine atuu asalakono ka ipekariao koroino a luwuno anu Kupauakono.

¹⁴ Kasi pongkaa hapamokoa anu inso a keu anggoro. Anggoro ke inua anu mompokomolangu, nahi moiko i'inuo ka luwuno anu inonto nahi moiko ikaano. Asalakono itondao a luwuno anu kuparentaakono ndi onae.”

¹⁵ Motae i Manoa a Mala'eka-Do i Ue, ”Ipemoikoomo, ba ki'onto Komiu i ndi'ai, ka kipokomponahua Komiu ana bembe.”

¹⁶ Sine sangkido Mala'eka-Do i Ue ndi Manoa, ”Maupo u'onto Aku i ndi'ai, ninahumu nahi Aku kumaano. Sine ba uweweuo gagi pesomba tinunu, pesombaakonomo ndi Ondae i Ue.” I Manoa nahi pokoto'orio motae Ondae Mala'eka-Do i Ue.

¹⁷ Ka i'amba mesikeno i Manoa ndi Mala'eka-Do i Ue atuu, ”Isema ke nee-Miu? Nde ba gaagi anu pinau-Miu atuu, kami melangkai Komiu.”

¹⁸ Sine sumangki Mala'eka-Do i Ue atuu ndi onae, ”Tembio kau pesikenoakono nee-Ku? Nee atuu tedoa kinohali-haliako.”

¹⁹ Umarino atuu i Manoa mo'ala ana bembe ka pesomba kaanga, ka ipesombaakono ndi Ondae i Ue, a wawo watu. Ka i'amba Doweweuo anu kinohali-haliako, kontongaano i Manoa ka beineno kumikitao.

²⁰ Tempono langano api mewuatako i langi te'inso a pontunua pesombaa, Mala'eka-Do i Ue mewuatako mbo'u a laro langano api pontunua pesombaa atuu. Kumitao atuu i Manoa ka beineno metuundu hawe a wita.

²¹ Mompu'u itempo atuu Mala'eka-Do i Ue nami pepopokita ndi Manoa ka beineno. Ito'oriomo i Manoa Ondae atuu Mala'eka-Do i Ue.

²² Mepauomo i Manoa ia beineno, ”Asalakono kita mate, nde tokita Iramo Ue Ala.”

²³ Sine sumangki beineno ndi onae, ”Ba mansa Ondae i Ue, Ira mepate kita, nahi Ira sumangkao pesomba tinunu ka pesomba kaanga inso a ngkaeto. Ka nahi Ira mopokitao ndi ontae luwuno atuu, ka nahi Ira mopoto'oria kita mongkona anu kanatuu kanandio-andio.”

²⁴ Beine atuu me'anaako asa ana ntama ka ineeakono i Simeso. Nana'ote atuu gagi langkai ka Doronsoo i Ue.

²⁵ Ka i'amba Penaa-Do i Ue mompu'u lumeluo aroano i Simeso i Mahane-Dani, anu i olono Sora ka Esitao.