Puu Mpobitara 12 - Wunta Mempori

I Yepeta ka to Eparai

¹ Pinarenta iramo to Eparai ka domelako i Saponi. Mpotae ira ndi Yepeta, ”Tembio ka ulako me'iwaliako ira inuledo to Amoni ka nahi upoboi kami melako merongaakomu? Rahamu ka omue kami mesongkoo!”

² Sumangki i Yepeta ndi ondae, ”Ongkue ka paliliku mpewinso kamimo a mpe'iwalia anu langkai saru inuledo to Amoni. Kupoboi komiu, sine omiu nahi mehawe mentolosi aku inso a ngkaedo.

³ Mansano kukitao, motae nahina inso ndi omiu anu aiwa tumolosi aku, kupeta'oakono penaaku, lumako aku umewai ira inuledo to Amoni atuu, ka Ondae i Ue meweengako ira a ngkaeku. Tembio oleo andio ka ime'aiwa ndi'ai mpe'iwaliakune?”

⁴ Ka i'amba i Yepeta pumpu ira luwu to Gilea ka dompe'iwaliako ira tongku Eparai, ka to Gilea numangi ira tongku Eparai. Nde, mia Eparai mpotae, ”O mia Gilea, omiumo mia mpolai inso a tongku Eparai!” To Gilea atuudo mpo'ia ira i olodo tongku Eparai ka tongku Manase.

⁵ To Gilea mpetorokio luwuno pesakiakoa koro Yarade ta umaropi ira tongku Eparai. Bahinao anu molai inso a tongku Eparai motae, ”I'ehe akumo me'asatowaako,” to Gilea motae ndi onae, ”Nde to Eparaikoke?” Tewala sumangki, ”Nahi,”

⁶ mpotae ira ndi onae, ”Po'arahako pauo: Sibolet.” Ba ipauo sibolet, ka nahikona ba ipauo, domerakoo ka domesumbeleo umpeda ia mpesakiakoa koro Yarade atuu. Itempo atuu inso a tongku Eparai memate ira pato pulu ka orua nsowu mia.

⁷ I Yepeta moparenta gagi puu mpobitara a nto Isaraeli ilarono onoo nta'u. Ka i'amba i Yepeta to Gilea atuu mate ka kinaburu i kotano i Gilea.

I Ebasani

⁸ Umari onae, i Ebasani te'inso i Beteleme moparenta gagi puu mpobitara a nto Isaraeli.

⁹ Onae hinao anano tama tolu pulu. Tolu pulu anano anu beine ipopokombiaako ira mia anu komba inso ia tongkuno ka tolu pulu ana beine i'alao komba te'inso ia tongkuno ta mopopokombiaako ira anano anu tama. Onae meparenta ia to Isaraeli opitu nta'u tehineno.

¹⁰ Ka i'amba i Ebasani mate ka kinaburu i Beteleme.

I Eloni

¹¹ Umarino onae, i Eloni mia Sebulo moparenta gagi puu mpobitara a to Isaraeli. Onae moparenta a to Isaraeli hopulu nta'u tehineno.

¹² Ka i'amba mate i Eloni, to Sebulo atuu, ka i kinaburu i Ayalo i wita Sebulo.

I Abadoni

¹³ Umarino onae, i Abadoni anano i Hileli, to Pirato, moparenta gagi puu mpobitara a to Isaraeli.

¹⁴ Pato pulu anano anu tama, ka tolu pulu ana ueno anu tama, pompesawiki pitu pulu kalide laki. Ipoparenta a to Isaraeli oalu nta'u tehineno.

¹⁵ Ka i'amba mateomo i Abadoni anano i Hileli, to Pirato atuu, ka ikinaburu i Pirato, i wita Eparai, a mentorukuno to Amale.