Puu Mpobitara 11 - Wunta Mempori

I Yepeta ka to Gilea

¹ I Yepeta to Gilea, asa tadulako anu moroso ntu'u. Onae anano beine belesu, amano i Yepeta onaemo i Gilea.

² Kombiano i Gilea me'anaako ira ana ntama. Mansado melolangkai anano kombiano atuu, domensaario i Yepeta, ka dompotaeakono, ”Omue nahi komohawe pusaka ndi omami, nde omue anano beine anu susua.”

³ I Yepeta molai binta ira pepaekompono atuu ka ipo'ia i wita Tobo. I ra'ai mia ntesosaelo mpe'asaakono ka domelako mpompomuru saru onae.

⁴ Nahi tehine inuledo to Amoni dompe'iwaliako ira to Isaraeli.

⁵ Itempo inuledo to Amoni me'iwaliako ira to Isaraeli, mia memota'u Gilea melako mentotowoo i Yepeta inso i wita Tobo.

⁶ Dompotaeakono i Yepeta, ”Aiwa, gagimo tadulakomami ka aiwamo tompe'iwaliako ira inuledo to Amoni.”

⁷ Motae i Yepeta ndi ondae mia memota'u i Gilea atuu, ”Nde komba omiu ke anu umo'aliaakune ka sumaari aku inso ia somborido amaku? Tembio ka ime'aiwa ndi ongkue kanandio-andio, itempono imentedungku?”

⁸ Ka do'amba mia motota'u i Gilea mpotae ndi Yepeta, ”Lano kanandio-andio me'aiwa kami ndi omue. Tewala utonda kami me'iwaliako ira inuledo to Amoni, omue kogagi petewawa mami, ka luwuno palili Gilea.”

⁹ Motae i Yepeta ia luwuno mia memota'u Gilea, ”Moiko, ba ikomiu memawa aku mekule me'iwaliako ira inuledo to Amoni, ka Ondae i Ue meweengako ira ndi ongkue, aku gagi petewawamiu.”

¹⁰ Ka do'amba mpotae mia memota'u to Gilea ndi Yepeta, ”Ia Nee-Do i Ue anu rumongeo, gagi sakosii i oloto: Kami meweweuo kana paumu atuu.”

¹¹ Lumakoomo i Yepeta tumonda ira mia memota'u to Gilea, ka tongku atuu mempotoroo gagi petewawa ka tadulakodo. Luwuakoano atuu ipohaweo i Yepeta i aro-Do i Ue, i Misipa.

I Yepeta ka inuledo to Amoni

¹² Ka i'amba i Yepeta montena mia lumako a mokole inuledo to Amoni, pe'oliwino, ”Hapa ke tinoomu ndi ongkue, ranta ka u'aiwa ta me'iwaliakono iniaku?”

¹³ Sumangki mokole inuledo to Amoni a mia tinenano i Yepeta, ”To Isaraeli merontuo witaku, te'inso a Koro Aranoni hawe a Koro Yaboko ka Koro Yarade, i tempono dompeluarako inso i Masiri. Kanandio, pokuleomo luwuno atuu temoiko ka sihina teposisalaa.”

¹⁴ I Yepeta wali montena mia lumako a mokole to Amoni

¹⁵ ka pe'oliwino, ”Kanandiomo potaeno i Yepeta: to Isaraeli nahi domerontuo witado to Moabi, ke ba wita inuledo to Amoni.

¹⁶ Itempono dompeluarako inso i Masiri, to Isaraeli melaloo pada one hawe a Ntahi Teberau ka hawe i Kadesi.

¹⁷ Tempono atuu to Isaraeli mpontena mia lumako a mokole wita Edomi po'emado: I'ehe kami melaloo witamu. Sine, mokole i wita Edomi nahi behe rumongeo. Ondae pontena ira mbo'u mia lumako a mokole wita Moabi, sine onae mbo'u nahi behe, ranta ka to Isaraeli mpo'ia i Kadesi.

¹⁸ Ka do'amba mpelempa melaloo pada one, tumanggolilio wita Edomi ka wita Moabi, hawe i sabaano oleo wita Moabi. Mpekema ira i asatowano koro Aranoni, sine nahi dompewinso a witado to Moabi, hangano Koro Aranoni onaemo tidano wita Moabi.

¹⁹ To Isaraeli mpontena mia lumako ndi Sihoni, mokoledo to Amori, mokole i Hesiboni, ka to Isaraeli mpo'ema ndi onae: I'eheakomimo melaloo witamu hawe ia mpo'ianga tetutuamami.

²⁰ Sine i Sihoni nahi pe'ala-ala ira to Isaraeli anu melaloo witano. Ipumpu Ira luwuno palilino ka dompekema i Yahasi ta me'iwaliako ira to Isaraeli.

²¹ Sine Ondae i Ue, Ue Ala Isaraeli, meweengakono Sihoni ka luwuno palilino ia ngkaedo to Isaraeli, anu numangi ira. Ka i'amba to Isaraeli mpentorokio luwuno wita Amori, palilino wita atuu.

²² Kanandiomo to Isaraeli dompentorokiomo luwuno witado to Amori, inso a Koro Aranoni hawe a Koro Yaboki ka inso a pada one hawe ia Koro Yarade.

²³ Gaagi, kanandio-andio Ue, Ue Ala Isaraeli, dompoko'alaomo anudo to Amori tiado to Isaraeli, bawaa-Do. Nde ikorumontuo mbo'u ke anudo to Isaraeli atuu?

²⁴ Nde komba ke anu rinontuno i Kamosi, anu pinesombaimiu, onaemo gagi tiamu? Kanandiomo luwuno anu rinontu-Do i Ue, Ue Ala mami, ndi omami, onaemo atuu gagi tia mami.

²⁵ Ka moikokopo ke sekono i Bala anano i Sipora mokole Moabi? Horio ke me'u'uako ira to Isaraeli ke ba me'iwaliako ira?

²⁶ To Isaraeli mpo'ia iramo i Hesiboni ka luwuno kotano anu kodei, i Aro'eri ka luwuno kotano anu kodei, ka luwuno kota a wiwi ngkorono Aranoni patimbali tolu etu nta'u tehineno. Tembio itempo atuu, nahi urontuo luwuno kota atuu?

²⁷ Gagi nahina salaku ndi omue, sine omue moweweuko anu mosa'o ndi ongkue upe'iwaliakune. Ondae i Ue, puu Mpobitara atuu, Ondaemo anu gagi puu mpobitara oleo andio i ilodo to Isaraeli ka inuledo to Amoni.”

²⁸ Sine mokole inuledo to Amoni nahi perorongeakono pau anu domempaukono luwuno tinenano i Yepeta.

Pontangano i Yepeta

²⁹ Ka i'amba i Yepeta bukeako Penaa-Do i Ue. Ilaloo wita Gilea ka wita Manase. Ka i'amba lumaloo Misipa i Gilea, ka inso i Misipa i Gilea lumako i wita inuledo to Amoni.

³⁰ Montangaomo i Yepeta ndi Ondae i Ue, ”Tewala Komiu meweengakono ntu'u inuledo to Amoni a ngkaeku,

³¹ hapamokoa anu meluarako inso a tondono rahaku anu ta tumotowo aku, itempono kupekule moiko inso ia inuledo to Amoni, onae atuu ta gagi tia-Do i Ue, ka aku mesombaakono gagi pesomba tinunu.”

³² Ka i'amba i Yepeta telalo a wita inuledo to Amoni ta sumapoi ira, ka Ondae i Ue meweengako ira ia ngkaeno.

³³ Onae numangi ira ntu'u inso i Aro'eri hawe umpeda Miniti, rua pulu kota hadiono, ka hawe i Abeli-Kerami, onaemo inuledo to Amoni pinokontenangi i arodo to Isaraeli.

³⁴ Itempono i Yepeta mekule i rahano i Misipa, tengkitaomo anano anu beine meluarako tumotowoo motingko rabana ka ipelense. Onaemo anano asa-asa. Nahina mbo'u anano tama ke beine.

³⁵ Kumitao anano atuu, ipeberisakono i Yepeta sangkano, ka ipotae, ”Oo wainto anaku, tedoa upokomasusao aroaku, ka upokomasola aku! Montanga akumo ndi Ondae i Ue, ka nami aku mokobalio.”

³⁶ Sumangki anano atuu ndi onae, ”Ama, ba te'alu komiumo montanga ndi Ondae i Ue, iweweuomo ndi ongkue kana anu tinanga miu nde Ondae i Ue dopombaloakomiumo a inuledo to Amoni, iwali miu.”

³⁷ Motae mbo'u ndi amano, ”Butu, i'eheakunemo weweuo anu ndio: Powee aku tempo orua wula saru wali-waliku ka kulako melempa a mentorukuno ka mengeseio tinuwuku anu kongko ana beine ranta ka kumate.”

³⁸ Sumangki i Yepeta, ”Lakomo.” I'eheakonomo anano lumako orua wula tehineno. Lumakoomo ana beine atuu saru wali-walino a mentorukuno mengeseio tinuwuno anu kongko ana beine.

³⁹ Mansano laloomo orua wula, mekuleomo ndi amano, ka i'amba amano atuu weweuo hapa anu tinangano. Ana beine atuu napi hori montepoto'oriako tama. Kanandiomo gagi gau a nto Isaraeli

⁴⁰ nine sompo ta'u luwuno ana beine to Isaraeli mompengesei ana beineno i Yepeta, to Gilea atuu, i larono opaa oleo sompo ta'u.