Puu Mpobitara 10 - Wunta Mempori

I Tola

¹ Umarino i Abimele, mewanguomo i Tola anano i Pua anano i Dodo, asa mia Isakari, ta tumolosi ira to Isaraeli. Onae mo'ia i Samiri, a mentorukuno Eparai.

² Onae moparenta gagi puu mpobitara a nto Isaraeli rua pulu ka otolu nta'u tehineno. Ka i'amba mateomo, ka ikinaburu i Samiri.

I Yairi

³ Umarino onae, mewanguomo i Yairi, to Gilea. Onae moparenta gagi puu mpobitara a nto Isaraeli rua pulu nta'u tehineno.

⁴ Anano tolu pulu ana ntama, anu mompesawiki tolu pulu kalide laki, ka kotado tolu pulu, ranta kanandio domeneeakono Hawo-Yairi, i wita Gilea.

⁵ Ka i'amba mateomo i Yairi kinaburu i Kamo.

Inuledo to Amoni bobarasai ira to Isaraeli

⁶ To Isaraeli mpoweweu iramo mbo'u anu mosa'o ia pongkita-Do i Ue. Mpesomba ira ia Baala ka ia Asitore, a luwuno anu pinesombaido to Arami, anu pinesombaido to Sidoni, anu pinesombaido to Moabi, anu pinesombaido inuledo to Amoni ka anu pinesombaido to Pilisiti. Domebinta ira i Ue ka nami dompesombai Ira.

⁷ Onaemo ka Dotedoa tekuda i Ue ia nto Isaraeli, ka Dopeweengako ira a ngkaedo to Pelisiti ka inuledo to Amoni.

⁸ A ta'u koa mbo'u atuu dompe'ata ira ka dobobarasai ira to Isaraeli. Hopulu ka oalu nta'u dompe'ata ira luwuno to Isaraeli anu mpo'ia i asatowano koro Yarade, i witado to Amori i Gilea.

⁹ Inuledo to Amoni domensakio koro Yarade ira mensapoio tongku Yehuda, tongku Benami ka inuledo i Eparai, ranta to Isaraeli tedado ira tepakada.

¹⁰ Mpebooli iramo to Isaraeli ndi Ondae I Ue, ”Mpoweweu kamimo hala ndi Omiu, nde kimebintaomo Ue Ala mami ka mpesomba ndi Baala.”

¹¹ Sine Pau-Do i Ue a nto Isaraeli, ”Nde komba Ongkue ke anu tumolosikomiu te'inso a ngkaedo to Masiri, to Amori, inuledo to Amoni, to Pilisiti,

¹² to Sidoni, to Amale ka to Maoni anu bobarasai komiu, itempono kai mpebooli ndi Ongkue?

¹³ Sine imebinta Akumo ka impesomba a anu pinesombai susua. Onaemo, ka nahi Aku tumolosikomiu mbo'u.

¹⁴ Imelakomo mpebooli ia luwuno anu pinesombai susua anu bininikimiumo atuu, po'ineomo ka ondae anu tumolosi komiu itempono imentedungku.”

¹⁵ Sine dompotae to Isaraeli ndi Ondae i Ue, ”Mpoweweu kamimo hala. Iweweuomo ndi omami hapa anu moiko a pongkita-Miu. Tendeano, itulungi kamimo kanandio-andio.”

¹⁶ Ka do'amba imeliahakono luwuno anu pinesombaido mia hawe atuu ka dowali mpesomba ndi Ondae i Ue, ranta kanami dopokotahao i Ue aroa-Do kumitao masukarado to Isaraeli.

¹⁷ Itempono atuu inuledo to Amoni mewinawa ira ka dompekema i Gilea, kontongaado to Isaraeli mpepumpu ka mpekema i Misipa.

¹⁸ Luwuno petewawa palili i Gilea, pada mpepau, ”Isema ke mia anu ta mompu'u sumapoi ira inuledo to Amoni atuu? Onaemo anu ta gagi petewawado luwuno palili i Gilea.”