Puu Mpobitara 1 - Wunta Mempori

Tenangino Kana'a umarino mate i Yosua

¹ Mansano mate i Yosua, mpesisikeno iramo to Isaraeli ndi Ondae i Ue, ”Isema ke anu i olo mami ta tese'elu umaropi ira to Kana'a mpe'iwaliako ira?”

² Pau-Do i Ue, ”Tongku Yehuda anu ta lumako. Menteeano kupeweengakonomo wita atuu ndi onae.”

³ Mepauomo i Yehuda ndi Simeo, pepaekompono atuu, ”Tolakomo meronga-ronga saru ongkue tumutuio wita anu inundiomo gagi tiaku ka moikoomo tompeteako ira to Kana'a, ka ongkue mbo'u, aku lumako merongaakomu tumutuio wita anu inundiomo gagi tiamu.” Meronga-ronga iramo saru i Simeo lumako saru onae.

⁴ Melako iramo tongku Yehuda, ka Ondae i Ue meweengako ira to Kana'a ka to Parisi ia ngkaedo, ka dompepate ira i Bese, hopulu nsowu ira hadiodo.

⁵ I Bese dotepohaweakono i Adoni-Bese ka ipe'iwaliakono, donangi ira to Kana'a ka to Perisi.

⁶ Sine i Adoni-Bese molai, ka domeluluo, domerakoo ka domentotopio ine ntoniso kaeno saru ine ntoniso karuno.

⁷ Motae i Adoni-Bese, ”Hinao pitupulu mokole anu tinotopi ine ntoniso kaeno saru ine ntoniso karuno. Mpobini ira toreano kaanga a ntoto medaku; kanamo anu wineweuku, kanandiomo Dosulooakune i Ue Ala ndi ongkue.” Ka do'amba mewawao i Yerusale, ka imate i ra'ai.

⁸ Umari atuu inuleno i Yehuda mpe'iwaliako ira to Yerusale, dompoko'alao ka donangiako ira mata mponai ka domesongkoo kota atuu.

⁹ Ka do'amba inuleno i Yehuda lumako sumapoi ira to Kana'a anu mpo'ia a mentorukuno, i Wita Nege ka i Wita Sepela.

¹⁰ Ka i'amba tongku Yehuda melako sumapoi ira to Kana'a anu mpo'ia i Hebero, neeno Hebero se'eluno onaemo Kiriati-Araba. Donangi ira to Sesai, to Ahimani ka to Talamai.

¹¹ Te'inso i ra'ai domensapoi ira palili Debire. Neeno Debire se'eluno onaemo Kiriati-Sepere.

¹² Mepauomo i Kalebi, ”Ba isema numangio ka moko'alao Kiriati-Sepere, aku weeakono anaku i Akasa, gagi kombiano.”

¹³ I Otinieli, anano i Kenasi uaino i Kalebi, numangio kota atuu, onaemo ka i Kalebi, meweengakono i Akasa, anano, gagi kombiano.

¹⁴ Kohaweno beine atuu, ipopandeio tamano mo'ema asa ntia wita ia amano. Metiiomo beine atuu te'inso ia keledaino, mesikenoomo i Kalebi ndi onae, ”Hinao hapa?”

¹⁵ Sangkino ndi onae, ”Ipowee aku tamboku tondonino poronso. Iwee'akumo Wita Nege anu morungku, ipowee aku koa mbo'u mata uwoi.” Ka i'amba i Kalebi moweeakono mata uwoi anu i uluno ka i ilino.

¹⁶ Inuleno i Hoba, oleono i Musa, mia i Keni atuu, melako mperonga-rongaako ira inuleno i Yehuda inso i Kota Keu Kuruma ia pada one Yehuda i Wita Nege umpeda Ara; mpo'ia ira i ra'ai mpesaloako ira palili i ra'ai.

¹⁷ Tongku Yehuda melako ira saru tongku Simeo pepaekompono atuu, donangi ira to Kana'a, palili Sepata. Domempakosio kota atuu ira meropuo. Onaemo kota atuu ka domeneeakono Horoma.

¹⁸ Umari atuu tongku Yehuda dompoko'alao Gasa saru witano, Asikeloni saru witano, Ekero saru witano.

¹⁹ Ondae i Ue kumongkomi ira tongku Yehuda, onaemo ka dompentorokio mentorukuno atuu, sine nahi dopokosaari ira palili anu mpo'ia i lembono nde mia atuudo mpompake ira kereta labu.

²⁰ Ndi Kalebi wineakoomo i Hebero, kana anu pinauno i Musa ndi'ipua, ka te'inso i ra'ai isaari ira anano i Ena otolu ira.

²¹ Sine to Yebusi palili kota Yerusale, nahi dosaari ira inuleno i Benami, gaagi mia Yebu atuu da mpo'ia mpesaloako ira inuleno i Benami i Yerusale ranta kanandio.

²² Inuleno i Yusupu ndada lumako sumapoi ira to Beteli, ka Ondae i Ue kumongkomi ira.

²³ Inuleno i Yusupu tumena ira padasoo Beteli atuu. Neeno kota atuu se'eluno onaemo Lusu.

²⁴ Mansano domengkitao mia mpopadaso atuu asa mia meluarako te'inso ia kota atuu, ka dompotaeakono, ”Itulungi kami tisoakami ba kana'umpe ka kimpokompewinso i kota andio, ka kami koa meweweuko kana sambe'e mami.”

²⁵ Itisoako iramo ba kana'umpe ka dompokompewinsokio kota atuu. Domenangiako ira ponai, sine mia atuu saru luwudo pe'etuno dompo'inee ira melako.

²⁶ Mia atuudo melako i witado to Heti ka mpompontade kota anu domeneeakono Lusu. Kanatuumo neeno kota atuu ranta kanandio.

Luwuno tongku anu napi sinaari

²⁷ Tongku Manase nahi dosaari ira palili Beti-Seani ka luwuno inia, palili Ta'anaka saru luwuno inia, palili Doro saru luwuno inia, palili Yibeleami saru luwuno inia, palili Megido saru luwuno inia, nde mia Kana'a atuu mpekorahako ira mekongko mpo'ia mpiha i wita atuu.

²⁸ Mansano memoroso iramo to Isaraeli, domempakasaa ira to Kana'a mpo'angga mobea, sine nahi domensinaari ntu'u.

²⁹ Tongku Eparai mbo'u nahi dosaari ira mia Kana'a anu mpo'ia i Gesere, onaemo mia Kana'a atuu kongkodo mpo'ia i olodo i Gesere.

³⁰ Tongku Sebulo nahi dosaari ira palili Kitiro ka palili Nahalo, onaemo ka domekongko mpo'ia i olodo, maupo domempakasaa ira mpo'angga mobea.

³¹ Tongku Asieri nahi dosaari ira palili Ako, palili Sidoni, saru Ahalabi, Akasibi, Heleba, Ape, Reho.

³² Gaagi to Asieri atuu mpo'ia i olodo mia Kana'a, palili anu lano mpo'ia ia tongku atuu, nde mia atuudo nahi dosaari ira.

³³ Tongku Napatali nahi dosaari ira palili Beti-Seme ka palili Beti-Anata, onaemo ka domekongko mpo'ia i olodo mia Kana'a, lano mia mpo'ia ia wita atuu se'eluno; sine palili Beti-Seme ka palili Beti-Anata gagi mia anu mempinakasaa mpo'angga mobea ndi ondae.

³⁴ To Amori humidi ira inuleno i Dani i asambalino mentorukuno ka nahi do'eheako ira mpetii i lembono.

³⁵ To Amori atuu mpekorahako mpo'ia mpiha i Hari-Heresi, i Ayalo ka i Salabimi, maupo domentedado te'inso ia inuleno i Yusupu, nde gagi ira mia mempinakasaa mpo'angga mobea.

³⁶ Witado to Amori atuu mompu'u ia mporakea Akarabi, inso i Sela motilalo i wawono.