Powadi 9 - Wunta Mempori

Inoluno ponto'ori anu mentee ka inoluno benge-bengea 9:1-18

¹ Ponto'ori anu mentee mowanguomo rahano, montadeo opitu karuno,

² sumampao pinotuwu sinumbeleno, monsalo anggorono, ka mompatinda kaangano.

³ Luwuno puu pompekakaako beine itena iramo mpeboo-booli a luwuno po'ianga mantande a ngkota,

⁴ ”Isema anu napi hina pinembasaino, tetoromo ramai”; ka anu nahi molino pinewowolono, ipotae,

⁵ ”Aiwamo, pongkaamo rotiku, ka inuomo anggoro anu kusaloomo;

⁶ tadiomo benge-benge, ka komiu mentuwu, ka tondaomo pesalaano ponto'ori.”

⁷ Isema mompaguru asa mia anu mompasinggiri, moweweu pasinggiriano koroino onaeno, ka isema anu mongkuahako mia mosa'o gauno, mohawe pontetewehi.

⁸ Si pongkuahako mia mompasinggiri ka si o'aliaakomu, kuahakonomo mia pande mosongka, ka ta mehohawako.

⁹ Poweeakonomo patudu mia pande mosongka, ka onae ta gagi lalu pande mosongka, paguruomo mia mentee, ka ponto'orino ta tetiangi.

¹⁰ Pompu'uano ponto'ori anu mentee onaemo doitoako Ira i Ue, ka tumo'ori Ira Anu Tedoa Mempori onaemo ponto'ori.

¹¹ Hangano, ongkue tinuwumu pinokomelai, ka luwuno ta'u tuwumu tiniangi.

¹² Tewala omue pande mosongka, pandemu mosongka atuu tiamu omuemu, tewala omue mompasinggiri, omue isa'a anu kotumembio.

¹³ Beine monge-monge atuu hadio mpau, tedoa napi hina pinembasaino, ka nahi ponto'ori hapa-hapa.

¹⁴ Onae mentoro i arono pewowano rahano a wawo ngkadera a luwuno po'ianga mantande a ngkota.

¹⁵ Luwuno mia anu telalo a nsala, anu moleo pelempano i'oluakono pau,

¹⁶ ”Isema napi hina pinembasaino, tetoromo ramai”; ka a mia anu nahi molino pinewowolono, ipotae,

¹⁷ ”Uwoi pinonako mo'ahi, ka roti anu kinaa mewuni-wuni mo'ahi namino.”

¹⁸ Sine, mia atuu nahi to'orio nine i ra'ai mekongko ira onitu, ka nine luwuno mia anu inolu atuu kongko i tolinodo mia mate.