Powadi 8 - Wunta Mempori

Patudu ponto'ori anu mentee

¹ Kombake ponto'ori anu mentee meboo-booli, ka ponto'ori merorongeakono suarano?

² I wawono luwuno po'ianga mantande a wiwi nsala, a pesampaano luwuno sala, i ra'aimo ipentade,

³ i horino luwuno pewowa langkai i arono kota, a nsala pewinsoa, onae mebooli meroku,

⁴ ”Hei luwuno tama, ndi omiumo kupebooli, a luwuno anano mia kupo'aroo suaraku.

⁵ Hei mia anu napi hina pinembasaino, ungkeomo pande, hei mia monge-monge, to'oriomo i laro aroamu.

⁶ Rongeomo, hangano aku pau ira mongkona anu maramba ka aku umungkahio wiwiku mongkona luwuakoano anu mentee.

⁷ Hangano eloku mompau menteea, ka gau mosa'o atuu mokoburuno wiwiku.

⁸ Luwuno pinauno ngangaku moleo, nahina anu melengku-lengkuako ke pansia.

⁹ Luwuno atuu mengkaa a mia anu pande, moleo a mia anu hinao ponto'orino.

¹⁰ Tarimaomo pompaguruku lalua sekonopo salaka, ka ponto'ori lalua sekonopo wulaa bininiki.

¹¹ Hangano ponto'ori anu mentee masuliopo olino sekonopo paramata, maupo hapa anu ineheno mia, nahi pokopengkenaakono.

¹² Ongkue, ponto'ori anu mentee, mo'ia meronga-ronga saru pande, ka ongkue mohawe ponto'ori ka pande mosongka.

¹³ Doitoako Ira i Ue onaemo umo'aliaakono wineweu mosa'o; ku'o'aliaakono pompelangka-langkai, pompe'anu-anu, pelelu anu mosa'o, ka nganga buke pe'akala.

¹⁴ Ndi ongkue hinao patudu ka pontimbanga, ongkuemo ponto'ori, ndi ongkuemo roso.

¹⁵ Hangano ongkue luwuno mokole moparenta, ka luwuno anu langkai potorono mempakosio moleoa.

¹⁶ Hangano ongkue luwuno anu langkai potorono mempabawa, saru mbo'u luwuno inuledo mokole, luwuno puu mpobitara anu moleo.

¹⁷ Ongkue mehohawao mia anu mehohawa aku, ka mia anu mokua umungke aku ta humawe aku.

¹⁸ Kaeaa ka pompelangkai kongko ndi ongkue, saru mbo'u arataa anu nahina balino ka moleoa.

¹⁹ Wuaku masuliopo olino sekono wulaa, maupo sekono wulaa motu'a, hasiliku lalua sekonopo salaka bininiki.

²⁰ Melempa aku a nsala menteea, i tonga-tongano sala moleoa,

²¹ ka kupopo'umbuakono arataa a anu mehohawa aku, ka ku'ihiio buke ponaapado arataa.

²² Dopokogagi akumo i Ue gagi pompu'uano anggaa-Do, se'eluno luwuno winewu-Do i ndi'ipua.

²³ Wineweu akumo tempono i ndi'ipua, amba-ambano, se'eluno ihina tolino.

²⁴ Se'eluno ihina tahi malua asa wawontolino, hina akumo, se'eluno ihina luwuno insoano uwoi anu hadio.

²⁵ Se'eluno luwuno torukuno tepaho ka tese'elu sekono luwuno pongku hina akumo;

²⁶ se'eluno Doweweuo tolino ka luwuno padano ke pampawuno wita motu'i anu amba-ambano.

²⁷ Tempono Dopatindao langi, ongkue i ra'ai, tempono Dogaresio karuno langi a luwuno wawo ntahi malua,

²⁸ tempono Dopakosio luwuno seru i wawono, tempono Doweweuo mata uwoi tahi malua i totono lulua,

²⁹ tempono Dotantuio tidano tahi, ka si limpaio uwoi parenta-Do, ka tempono Dopakosio luwuno empehino tolino,

³⁰ ongkue kongko saru Ondae gagi ana pinehohawa, ongkue gagi poko'inehe-Do sompo oleo, ka wela mepali-palindo i aro-Do;

³¹ mepali-palindo aku i wawontolino-Do ka luwuno anano mia gagi ineheku.

³² Onaemo pu'uno, hei nana'ote, ronge akumo, hangano me'ura iramo anu mekariao luwuno pesalaaku.

³³ Rongeomo pompaguru, asalakono komiu mempande mposongka; si mperuanahio.

³⁴ Me'uraomo mia anu rumonge aku, anu sompo oleo mesikori a mpewowaku, anu dumagaio karuno pewowa langkaiku.

³⁵ Hangano isema humawe aku, mohawe tuwua, ka onae Ira memoikoo i Ue.

³⁶ Sine isema nahi hawe aku, mokorugio koroino; luwuno mia anu umo'aliaakune, mongkekewoi matea.”