Powadi 7 - Wunta Mempori

¹ Hei anaku, pe'inimo a mpauku, ka naaomo parentaku i laro aroamu.

² Pe'inimo a parentaku, ka omue ko tuwu; naaomo pompaguruku kana ihi matamu.

³ Tanggoomo luwuno atuu a wunga ngkaemu, ka buriomo atuu i laro aroamu.

⁴ Potaemo a ponto'ori anu mentee, ”Omuemo pepaekompoku” ka pauomo ponto'ori atuu pe'etumu,

⁵ ka ikaduduiko inso a beine belesu, a beine lansara, anu hadio pauno.

⁶ Hangano tempono kupengkita-kita, inso a ntaraliku, inso a pentangoano rahaku,

⁷ kukitao i olodo anu napi hina pinembasaido, kuhaweo i olodo mia mongura asa ana ntama kontuwuano anu nahi molino pinewowolono,

⁸ anu me'asambaliako umpeda siuno sala, ka i'amba melempa me'aro a rahano beine atuu,

⁹ i tempono tekamburi, ngkiniwia, a wongi anu wongi-wongi.

¹⁰ Aiwaomo asa mia beine tumotowoo, mesangka belesu saru aroa mpe'akala;

¹¹ hadio mpau ka lansara beine andio, karuno nahi pokorodo i raha,

¹² kanandio andio onae a nsala, te'ingka mbo'u a ntanalapa, umpeda sompo pelengkua onae metowoki.

¹³ Ka i'amba i'iniomo ana ntama kontuwuano atuu ka iwoo-wooo, saru rupa mokapa ipotaeakono,

¹⁴ ”Asalakono aku mompesombaako pesomba tekaduduia, ka a oleo andio ku'owahiomo tinangaku atuu.

¹⁵ Onaemo pu'uno ka kupeluarako tumotowoko, aku umungkeko ka kanandio-andio kuhaweko.

¹⁶ Kuwileomo umpeo tekosi a wawo mpoturiaku, sawu lena mperupa-rupa sorano inso i Masiri.

¹⁷ Pepomboleaku kuporawoakonomo mire, gaharu ka keu mo'ahi.

¹⁸ Aiwamo topotendeo tesingka hawe mo'oru, ka meronga-ronga menamio pompesanaa.

¹⁹ Hangano tamaku nahi kongko i raha, onae tekonai a laro pelempaa olai.

²⁰ Asa kadu-kadu doi winawano, da saraipo ipekule tamo hawe wulantii.”

²¹ Mia mongura atuu ipopandeiakono mperupa-rupa pompopandei, saru pandeno wiwi mepau i'oluakono.

²² Mepobingko mia mongura atuu tumondao kana sapi anu winawa a mposumbelea, ka kana mia benge-benge anu tepongu ta hinuku,

²³ hawe ana mpana lumompahio aroano; kana manu-manu montuturako te'aro a mporakoa, nahi pokonto'orio nine tuwuno ta masolaa.

²⁴ Onaemo pu'uno, hei nana'ote, ronge akumo, pekokoongakonomo pinauno ngangaku.

²⁵ Si pelengkuako aroamu a luwuno pesalaano beine atuu, ka si pokontesaao koroimu a ntelaloano.

²⁶ Hangano hadioomo anu mobela pinepateno, tedoaomo hadio mia anu pinepateno.

²⁷ Rahano onaemo pesalaa lumako a ntolinodo mia mate, anu metii a luwuno bolongko matea.